Read MAASAI REVISED PROTESTANT Enaidurra 15 Bible Online

Enaidurra 15 - MAASAI REVISED PROTESTANT bible

Enaidurra 15

¹Neranyaki Musa o ltung'ana loo Siraeli Olaitoriani ele sinkolio ejo, “Karanyaki nanu Olaitoriani, amu etimirishe te nkitoo; ore mbarrtan o lakedok lenye netanang'aka atua enaiposha.

²Olaitoriani engolon ai naa osinkolio lai, netaa sii enjeunoto ai; Enkai ai ena naa kaisis ninye, Enkai oo loo papa lai, naa karrep ninye.

³Ore Olaitoriani neisula to larrabal; keji enkarna enye Olaitoriani.

⁴“Etanang'aka ingarrin oo mbartan e Farao o enjore enye atua enaiposha, ore ilkituaak lenyena gelunot eimiso te Enaiposha Nanyokie.

⁵Eimulumulaitie ninche inkariak; nepuo ninche aadoiki atua eng'uton anaa osoit.

⁶Keitore enkaina ino e tatene te ngolon, iyie Olaitoriani, Kegiligili enkaina ino e tatene ilmang'ati, iyie Olaitoriani,.

⁷Ore te ngolon e nkitoo ino, nimir lelo liking'orunore; irriwaa engoro ino neyupuyupoki ninche anaa enkima olkujita.

⁸Ore te nkutata oo nkumeishin inono neiturrurro nkariak, neitashe inkariak aarupa, neibung'a aatiu anaa osoit tiatua e negut enaiposha.

⁹Etejo olmang'atinta, ‘Ekasujaa, ekainepu; naor nanu iyarunot enye naya pooki toki nayieu; nashutu nanu olalem lai, near enkaina ai ninche metuata.’

¹⁰Itukuta te nkijape ino, neitemoo ninche enaiposha; neimis anaa osoit tiatua inkariak kituaak.

¹¹“Kaing'ae likinyaanyukie, iyie Olaitoriani, tiatua inkaitin? Kaing'ae otiu anaa iyie, kitok te sinyatisho, Olourei too nkiaasin e nkitoo, oas isapuki e nking'asia.

¹²Intorioyie iyie enkaina ino e tatene, neijoo ninche enkop.

¹³“Te nyorrata ino nauno itoriko lelo tung'ana litokordua, ituutayie iyie te ngolon ino meshomo emanyisho ino sinyati.

¹⁴Etoning'o iloreren, neikirikira ninche; enoto emion lelo ootoni te Filistia.

¹⁵Eiputukunyo ilaiguanak le Edom; eibung'a ilarikok le Moabu olokirikiri; Etalepori to lkirutoto lelo pooki oomanya Kanaan.

¹⁶Nejing ninche olkirutoto o enkuretisho; te nkaraki enkitoo e nkaina ino, eitirring'ate ninche anaa osoit, o metaba anaa nelusoo iltung'ana linono, Olaitoriani, o metaba anaa nelusoo lelo apa linyiang'ua.

¹⁷Intijing'u iyie ninche atua, niun ninche te nchumata o ldoinyo lino, ine wueji, Olaitoriani, nintobira te nkaraki emanyisho ino, ine nesinya, Olaitoriani, nintobira iyie te nkaina ino.

¹⁸Ekeitoreisho Olaitoriani ntarasi o ntarasi.”

¹⁹Kake ore apa pee epuo mbartan e Farao o ngarrin enyena oo mbartan o lakedok lenyena loo mbartan atua enaiposha, neyau Olaitoriani ashuku inkariak e naiposha shumata ninche; kake eshomo iltung'ana loo Siraeli te nkop natoyio te mpolos e naiposha.

²⁰Neitoki Miriam, ina oiboni e Nkai, anashe e Aaron, adumu entampuri te nkaina enye; neipang inkituaak pooki aasuj ninye too ntampurini eipidipid aaranyisho.

²¹Neranyaki Miriam ninche ejo: “Entaranyaki Olaitoriani amu etimirishe te nkitoo; ore mbarrtan o lakedok netanang'aka ninche atua enaiposha.”

²²Nerikoo Musa Isiraeli dukuya aaing'uaa Enaiposha Nanyokie, nepuo olpurkel le Shuri; nepuo nkolong'i uni to lpurkel neitu etum enkare.

²³Ore ake pee epuonu Mara, neitu eidim aatook enkare e Mara amu kedua, neaku etejoki ine Mara.

²⁴Neing'unyung'unyaki iltung'ana Musa, ejo, “Kainyoo kiok?”

²⁵Neishiraki ninye Olaitoriani; neitodol ninye Olaitoriani olchani, nenang'aki atua enkare nemelonu enkare. Neisho ninche Olaitoriani nkitanapat o nkikoot teine naatum aaishuyie, netem ninche teine ejo,

²⁶“Tinining'ining'i intae oltoilo lo Laitoriani Enkai inyi, niasiasa ina sidai too nkonyek enyena, nining'ining'i nkitanapat enyena nimbung'ubung'u pooki, nemapik hoo nabo oo nkeyaitin ntae apa natipika Ilmisiri; amu kara nanu Olaitoriani oishiunye intae.”

²⁷Neitoki ninche aapuonu Elim, ine apa netii nchorroi tomon o are e nkare o ltuka ntomoni naapishana, neitayu ilng'oborri teine te mbata e nkare.