Read MAASAI REVISED PROTESTANT Enaidurra 16 Bible Online

Enaidurra 16 - MAASAI REVISED PROTESTANT bible

Enaidurra 16

¹Nedumunye Isiraeli aapuo aaing'uaa Elim, nepuonu olturrur pooki loo ltung'ana loo Siraeli olpurkel le Sini, otii erishata e Elim o Sinai, te nkolong e tomon o imiet o lapa li are eidipa aashom te nkop e Misiri.

²Neing'unyung'unyaki olturrur pooki loo ltung'ana le Israel Musa o Aron te ilo purkel,

³nejoki ninche, “Enaikash apa tenaa eikituata te nkaina o Laitoriani te nkop e Misiri, ina kata apa kitoni te mbata oo motiok oo nkiri nikinya imukateni aaraposho; amu intupukutuo intae iyiook aayau ele purkel, matuata ena umata pooki te sumash.”

⁴Neitoki Olaitoriani ajoki Musa, “Ng'ura, ekashau imukateni naaing'uaa shumata te nkaraki intae; naa kepuo iltung'ana aaiturrurru endaa naidip ina olong, pee atem ninche tenaa keibung nkitanapat aainei anaa emeibung.

⁵Ore te nkolong e ile nereten nena naayau atua aji naa keaku katitin are te nena naiturrur anaake.”

⁶Nejoki Musa o Aron iltung'ana pooki loo Siraeli, “Ore teipa niyiolouu aajo Olaitoriani apa oyaua intae aitung'uaa enkop e Misiri;

⁷ore tadekenya nidolidolo enkitoo o Laitoriani amu etoning'o ninye enking'unyung'uny inyi ing'unyung'unyakiki Olaitoriani amu eikira iyiook nyoo pee ing'unyung'unyakiki iyiook?”

⁸Nejo Musa, “Te neisho intae Olaitoriani teipa inkiri ninyanya neisho intae tadekenya imukateni aiputaki, amu etoning'o Olaitoriani enking'unyung'uny inyi ning'unyung'unyakita ninye. Eikira iyiook nyoo? Ore enking'unyung'uny inyi neme enaang kake eno Laitoriani.”

⁹Nejoki Musa Aron, “Tiaaki olturrur pooki loo ltung'ana loo Siraeli, ‘Entinyiku wootu dukuya Olaitoriani, amu etoning'o ninye enking'unyung'uny inyi.’ ”

¹⁰Ore anaa enairorie Aron olturrur pooki loo ltung'ana loo Siraeli, neing'or enkalo o lpurkel, nemaniki etaliee enkitoo o Laitoriani te nkatampoi.

¹¹Nejoki Olaitoriani Musa,

¹²“Atoning'o inking'unyung'unyat oo ltung'ana loo Siraeli; tiaaki ninche, ‘Ore teipa ninyanya inkiri, ore tadekenya neiputakini intae imukateni, pee iyiolouu aajo kara nanu Olaitoriani Enkai inyi.’ ”

¹³Ore teipa nepuonu nkurlen neiput lelo ng'oborri; ore tadekenya neiput enkoilelio aman lelo ng'oborri.

¹⁴Ore ake pee edumunye enkoilelio te nkop netii enkoriong e ilo purkel entoki naibor, napurupurana natii oriong enkop, (naikununo anaa isoito le nchan).

¹⁵Ore ake pee edol iltung'ana loo Siraeli nejokino maate, “Kainyoo ena?” Amu meyiolo apa ninche aajo kainyoo ina. Nejoki Musa ninche, “Emukate, naa ninye eishoo Olaitoriani intae enosa.

¹⁶Ena eitanapishe Olaitoriani: ‘Entasotu, pooki tung'ani te ntae, anaa enaidim ainosa; ewaita emborei emoti naji omer, te risioroto e siana oo ltung'ana naba anaa enaata ake oltung'ani to lng'obor lenye.’ ”

¹⁷Neas iltung'ana loo Siraeli ina, nesotu ilkulikae inkumok, nesotu kulikae inkuti.

¹⁸Kake ore ake pee etem te mborei e ina moti naji omer, ore ilo apa otasotuo nkumok nemeeta entoki natelekua, ore ilo otasotuo nkuti netaraposhe; etasotuo ake oltung'ani enaba anaa enaidim ainosa.

¹⁹Nejoki Musa ninche, “Emincho oltung'ani eshum o mekenyu.”

²⁰Kake eitu ninche ening Musa; etelekutua embata o mekenyiki neiruj ilkuru neng'uoyu; negorokino Musa ninche.

²¹Nesotu ninche anaake tadekenya, oltung'ani ake anaa enaidim ainosa, kake ore ake pee eirowuaju enkolong neshola.

²²Ore te nkolong e ile nesotu imukateni katitin are oo noshi ake, iyierat are ake oltung'ani; ore ake pee epuonu ilarikok pooki lo lturrur aaliki Musa,

²³nejoki ninye ninche, “Ena eitanapishe Olaitoriani, ‘Enkolong e nkiyeng'iyeng taaisere, Sabato sinyati o Laitoriani; entapej ina nipejipeje niyieriyiere ina niyieriyiere; ore ina pooki naleku nirragiegie o mekenyu.’ ”

²⁴Neirragie ninche o metaba anaa nekenyu, anaa enaitanapa Musa ninche, neitu eng'uoyu neitu ejing ilkuru.

²⁵Nejo Musa “Enosa taata, amu ore taata naa Sabato o Laitoriani, mitumutumu taata ti ong'ata.

²⁶Too nkolong'i ile isotutu; kake ore te nkolong e naapishana aa ene Sabato nemetii hoo toki.”

²⁷Ore te nkolong e naapishana nepuo kulikae tung'ana aasotu neitu etum hoo toki.

²⁸Neitoki Olaitoriani ajoki Musa, “Ianyianya kenya imbungubungu nkitanapat o nkirorot aainei o anu?

²⁹Entayiolo aajo eishoo intae Olaitoriani Sabato, metaa ore te nkolong e ile neisho intae imukateni oo nkolong'i are. Totona pooki tung'ani te ntae te wueji enye, emincho oltung'ani eipang alo te wueji enye te nkolong e naapishana.”

³⁰Neyeng'iyeng'a iltung'ana te nkolong e naapishana.

³¹Nejo enkaji oo Siraeli enkarna e ina daa mana; neikununo anaa ilanterera ooibor, netiu emeloni enye anaa enoo nkaukau naaitobiraki te naisho oo lotorok.

³²Nejo Musa, “Ena eitanapishe Olaitoriani: ‘Enchoo emborei e moti oo nkulupuok naji omer eshumi tiatua iishoritin inyi pooki, pee etum aatodol ina mukate naitotiyie nanu intae to lpurkel, inakata apa pee aitupuku intae aitung'uaa enkop e Misiri.’ ”

³³Nejoki Musa Aaron, “Tudumu embakuli tipika emborei e mana atua nirragie te dukuya o Laitoriani, neshumi tiatua iishoritin inyi.”

³⁴Anaa enaitanapa Olaitoriani Musa, neiko neijia Aaron airragie te dukuya Shakenisho, metushumi.

³⁵Nenya iltung'ana loo Siraeli mana ilarin artam, o metaba anaa nepuonu olpolosie le nkop e Kanaan.

³⁶(Ore omer naa erubata e tomon e efa.)