Read MAASAI REVISED PROTESTANT Enaidurra 17 Bible Online

Enaidurra 17 - MAASAI REVISED PROTESTANT bible

Enaidurra 17

¹Nepuo olturrur pooki loo Siraeli to lpurkel le Sini too lkirragarien, anaa enaitanapa Olaitoriani, neitayu ilng'oborri te Refidim; kake metii apa enkare naok iltung'ana.

²Neilepilepaki iltung'ana Musa, nejo, “Nchoo iyiook enkare nikiok.” Nejoki Musa ninche, “Kainyoo pee kilepilepakiki nanu? Kainyoo pee itemiteme Olaitoriani?”

³Kake etotiro iltung'ana enkure oleng, neing'unyung'unyaki iltung'ana Musa, nejo, “Kainyoo apa pee iyaua iyiook aaitung'uaa Misiri, nilotu aar iyiook matuata o nkera ang o nkishu ang te nkure?”

⁴Neishiraki Musa Olaitoriani nejo, “Kaa aitaas kulo tung'ana? Etaa ninche kejo pee aanang too soito.”

⁵Nejoki Olaitoriani Musa, “Togiroi iltung'ana te dukuya, nishoroo te nebo iyie embata oo lpayiani loo Siraeli; niya te nkaina ino ina ng'udi apa nitooshie olkeju le Nail, nilo.

⁶Kalo nanu aitashe te dukuya iyie te idie te nchumata e ndapidapoi te Horeb, niosh iyie ina dapidapoi, naa kepuku enkare tiatua ninye, pee etum iltung'ana aatook.” Neas Musa ina te dukuya ilpayiani loo Siraeli.

⁷Nejo ninye enkarna eine wueji Masa o Meriba, te nkaraki enking'unyung'uny oo ltung'ana loo Siraeli, o te nkaraki natetema ninche Olaitoriani ejo. “Ketii Olaitoriani te nebo iyiook aashu metii?”

⁸Neitoki Ilmaleki aapuonu aarare Isiraeli te Refidim.

⁹Nejoki Musa Yoshua, “Tegelaki iyiook ilewa, nimpang'ipang'a aapuo, aarare Ilmaleki; ore taaisere naitashe nanu te nchumata e ndoinyo aata ina ng'udi e Nkai te nkaina ai.”

¹⁰Neas Yoshua enatiaaka Musa, nearare Ilmaleki; nelo Musa o Aron o Huri enchumata e ndoinyo.

¹¹Ore ake te neilepie Musa enkaina, nemirisho Isiraeli, ore ake te neitadou enkaina enye, nemirisho Ilmaleki.

¹²Kake enaurate inkaik e Musa, neyau ninche osoit nepik abori ninye, netonie ninye nedumu Aron o Huri inkaik enyena aailepie, obo ake te nchoto nabo o likae ti ae shoto; metaa keitirring'a eitoriori inkaik enyena o metadoi enkolong.

¹³Nemir Yoshua aitadoyio Ilmaleki o ltung'ana lenyena neidaikie te nepi o lalem.

¹⁴Nejoki Olaitoriani Musa, “Ing'ero ena te mbuku metaa endamunoto niliki Yoshua ajoki ekamut nanu aimisie endamunoto oo Ilmaleki aiwuang'ie ti abori keper.”

¹⁵Neshetu Musa olperere lo lasar nejo enkarna enye, Olaitoriani ninye enanka ai

¹⁶ejo, “Einosa Olaitoriani olmumai nchere kearare ninye Ilmaleki ebaiki eishoi o eishoi.”