Read MAASAI REVISED PROTESTANT Enaidurra 19 Bible Online

Enaidurra 19 - MAASAI REVISED PROTESTANT bible

Enaidurra 19

¹Ore te nkolong e dukuya olapa liokuni anaa pee epuo iltung'ana loo Siraeli te nkop e Misiri, ore ina olong nepuonu olpurkel le Sinai.

²Ore pee edumunye te Refidim aapuonu olpurkel le Sinai neitayu ilng'oborri to lpurkel; ore teine nepik Isiraeli ilng'oborri dukuya o ldoinyo.

³Neked Musa alo enetii Enkai, neipot ninye Olaitoriani to ldoinyo, ejo, “Ena iyie ilo ajoki enkaji e Yakobo, niliki iltung'ana loo Siraeli: ajoki,

⁴Itoduaa intae enaikuna Ilmisiri, ina natanapa nanu intae too naipuko o lkurragos nayaki intae kewan ai.

⁵Ore naa taata tinining'ining'i oltoilo lai nimbung'ubung'u nkitanapat osotua lai, niaakuku iltung'ana laainei tukul tiatua iltung'ana pooki; amu ore enkop pooki naa enaai,

⁶naa iakuku intae te nanu enkitoria oo lapolosak o losho osinya. Kulo ninche irorei lilo ajoki nkera oo Siraeli.”

⁷Nelotu Musa neipot lelo payiani loo ltung'ana, neibalie te dukuya ninche kulo rorei pooki ooitanapa Olaitoriani ninye.

⁸Newal iltung'ana pooki te nebo nejo, “Ore nena pooki naatejo Olaitoriani eikiaas.” Nelikioo Musa irorei loo ltung'ana to Laitoriani.

⁹Nejoki Olaitoriani Musa, “Ng'ura, kalotu nanu te nkatampoi nairrusha, pee etum iltung'ana aatoning te naairorie iyie, pee kitum sii ninche aairuko ntarasi.” Neitoki Musa aliki Olaitoriani irorei loo ltung'ana.

¹⁰Nejoki Olaitoriani Musa, “Shomo enetii iltung'ana nintisiny ninche taata o taaisere, nincho ninche meisuja inkilani enye,

¹¹nerretena te nkolong e uni; amu ore te nkolong e uni nelotu Olaitoriani adou enchumata o ldoinyo le Sinai metoduaa iltung'ana.

¹²Nipikaki iltung'ana olpolosie aitamanaa, nijoki ninche ‘Entodol ake mipuopuo shumata o ldoinyo aashu iseyieyie olpolosie lenye; ore pooki ng'ae ororo oldoinyo neari metua.

¹³Nemeetae enkaina naiseyie ninye kake kenang'i too soito aashu eng'ori, aa eng'ues aashu oltung'ani, melo ninye eishu.’ Ore pee eru esekekua ayiataa, naa keilepu ninche aapuonu oldoinyo.”

¹⁴Nedou Musa to ldoinyo alotu enetii iltung'ana, neitisiny ninye iltung'ana neisuj ninche inkilani enye.

¹⁵Nejoki ninye iltung'ana, “Enterretenata te nkolong e uni, nimipuopuo aanyikaki nkituaak.”

¹⁶Ore takedenya te nkolong e uni, netii ndarat o nkiwuang'at o enkatampoi nairrusha e nchumata oldoinyo o endarata sapuk e ntarumpeta o metaa eikirikirate iltung'ana pooki ootii ilng'oborri.

¹⁷Neyau Musa iltung'ana aitung'uaa ilng'oborri meetu aatumore Enkai; neitashe ninche te ntonata o ldoinyo.

¹⁸Neimulumul oldoinyo le Sinai empuruo, amu etadoikio Olaitoriani enchumata enye te nkima, neilep empuruo enye anaa empuruo o lkokuet, neikirikira oldoinyo pooki oleng.

¹⁹Naa ore anaa enadar embuakunoto e sekekua aponari, neiro Musa, newaliki ninye Enkai te ndarata.

²⁰Nelotu Olaitoriani adoiki oldoinyo le Sinai, entopij o ldoinyo; neipot Olaitoriani Musa meshomo entopij o ldoinyo, neilep Musa alo.

²¹Nejoki Olaitoriani Musa, “Tadoi shomo inkoo iltung'ana, melang'u ake olpolosie memuta ake ilkumok lenye.

²²Nchoo sii lelo apolosak oonyikaki Olaitoriani eitisiny ate, pee maitame ake ninche.”

²³Nejoki Musa Olaitoriani, “Mepuonu iltung'ana aailepu oldoinyo le Sinai; amu iyie enkorrok ino oitanapa iyiook, ajo, ‘Entayu ilpolosien to ldoinyo, nintisinyinyi ninche.’ ”

²⁴Nejoki Olaitoriani ninye, “Tadoi shomo nilepu o Aron; kake mincho ilapolosak o ltung'ana elang'u olpolosie aailepu enetii Olaitoriani menang'are ake Olaitoriani ninche.”

²⁵Nelo Musa adoyio enetii iltung'ana neliki ninche.