Read MAASAI REVISED PROTESTANT Enaidurra 20 Bible Online

Enaidurra 20 - MAASAI REVISED PROTESTANT bible

Enaidurra 20

¹Neiro Enkai kulo rorei pooki ajo,

²“Kara nanu Olaitoriani Enkai ino, ilo likiyawua aitung'uaa enkop e Misiri, aitung'uaa enkop e sinkaisho.

³Miserem ake kulie aitin neme nanu.

⁴Mintobiraki kewan enkitanyaanyukoto nagueta, aashu ae nanyaanyukie ae toki te shumata aashu enatii abori enkop, aashu enatii abori nkariak te nkop.

⁵Mirrugokino ninche aashu isiaai ninche; amu ore nanu Olaitoriani Enkai ino kara Enkai olom, naitusuj inkera nkitarruorrot oo loo menye o metabaiki eishoi e uni o eni ong'uan e lelo laaiba nanu,

⁶kake kaitodolu enyorrata nauno too nkalifuni oo ishoritin e lelo laanyor nanu neibung inkitanapat aainei.

⁷“Mimpot enkarna o Laitoriani Enkai ino pesho amu keiguanare Olaitoriani ilo ooipot enkarna enye pesho.

⁸ “Tadamu enkolong e Sabato, mbung'a nintisiny.

⁹ Too nkolong'i ile taasisho, nias isiaaitin inono pooki;

¹⁰kake ore te nkolong e naapishana naa Sabato to Laitoriani Enkai ino; ore teina olong nimiaas hoo ae siaai, iyie aashu olayioni lino, aashu entito ino o sinka lino lee, aashu esinka ino, aashu inkishu inono, aashu olomoni otadokuo otii atua enkang ino.

¹¹Amu too nkolong'i ile eitobira Olaitoriani keper o enkop o enaiposha o nena pooki naatii atua ninche, neyeng'iyeng'a te nkolong e naapishana. Metaa etamayiana Olaitoriani enkolong e naapishana neitaa sinyati.

¹²“Iyanyita minyi o ng'utunyi pee itum atobikoi teina kop nikincho Olaitoriani Enkai ino.

¹³“Miar metua.

¹⁴“Miloloito.

¹⁵“Mipurrisho.

¹⁶“Minteeniki ole latia ino elejare.

¹⁷“Ming'uar enkaji eilo le latia ino; ming'uar enkitok e ilo le latia ino, aashu osinka lenye, aashu esinka enye, aashu olkiteng lenye, aashu osikiria lenye, aashu hoo ae toki ole latia ino.”

¹⁸Ore ake pee ening iltung'ana pooki ndarat nedol inkiwuang'at o embuakunoto e sekekua o empuruo to ldoinyo, neirut iltung'ana neikirikira, nelamari aaitashe tenelakua.

¹⁹Nejoki ninche Musa, “Irorie iyie iyiook, amu eikining; kake nchoo metaa mme Enkai nairorie iyiook, mikiye ake.”

²⁰Nejoki Musa iltung'ana, “Emiureshoyu, amu keewuo ake Enkai atem intae, pee aa ore euriata enye nelotu dukuya nkonyek inyi, pee miasiasa ake ing'ok.”

²¹Nelamari iltung'ana aaitashe te nelakua, etaa kenyikaki Musa ina aimin nairrusha teine netii Enkai.

²²Nejoki Olaitoriani Musa, “Ena tiaaki iltung'ana loo Siraeli: ‘Itoduaakita ntae ate nchere airorie nanu intae atii keper.

²³Mintayuyu nkaitin e nkosholai pee eaku te nebo nanu, nimintaikiki sii ate nkaitin e saabu.

²⁴Olperere le nkulupuoni ninye kintaikiki nanu nikipolosakiki te nchumata enye ilasarri linyi oopejori o lasarri linyi le seriani; enker inyi o lkiteng linyi. Ore pooki wueji nagelu metadamunyeki enkarna ai naa kalotu enitii namayian intae.

²⁵Naa ti nikintaikiki intae nanu olperere lo lasar loo soito, mishetutu too soito oogueta, amu ti niguetiguete te ntolu nisarkionienie.

²⁶Nimikedikede too nkedeta olperere lai lo lasar, pee mimbalayuyu ajo minchopopo.’