Read MAASAI REVISED PROTESTANT Enaidurra 21 Bible Online

Enaidurra 21 - MAASAI REVISED PROTESTANT bible

Enaidurra 21

¹“Kuna ninche inkitanapat nipik dukuya ninche.

²Ti ninyiang'u orrindik loo Lbrania, neasisho ninye ilarin ile, ore to lari liopishana neipang ninye alo elakuno, nemelak toki.

³Tenaa keewuo apa aa ninye ake, nelo ninye aa ninye ake; te neewuo apa eyamishe nelo enkitok enye te nebo ninye.

⁴Te neishoo apa olkitok lenye enkitok neiki ninye ilayiok aashu ntoyie, neaku enkitok o nkera enyena ino lkitok lenye nelo ninye openy.

⁵Kake te neibalunye orrindik ajo, ‘Kanyor olkitok lai o enkitok ai o nkera aainei; malo nanu alakuno,’

⁶neyau olkitok lenye enetii Enkai, neyau ninye kutuk aji aashu eng'ape e kutuk aji neud olkitok lenye enkiok enye to ltidu; neisiaai ninye te nkishui pooki.

⁷“Te nemir oltung'ani entito enye aitaa errindik nemelo aekata anaa enapuo irrindiki lewa.

⁸Te nemeitiship olkitok lenye, laa ninye otisiraka kewan, neisho ninye meinyiang'uni ninye, meeta ninye esipata namirakinye iltung'ana loo loreren amu etonyorra apa ninye te sunkuroisho.

⁹Te nesiraki oltung'ani olayioni lenye entito rrindik neiko ninye anaa entito enye.

¹⁰Te neyamaki kewan enkitok e are nemeitong'or endaa enye o nkilani enyena o enjung'ore e ina kitok botor.

¹¹Naa te nemeitaas olee ninye kuna pokira uni, nelo ninye aing'uaa ninye pesho, metii elaata oo mpisai.

¹²“Ore pooki ng'ae oosh oltung'ani near metua, neari metua.

¹³Kake te neitu eirrag arreshu ninye, kake Enkai ake natorikoyie metabatatakinoyu inkaik enyena, naa kegelaki intae Enkai ewueji naa ninye eisikaki.

¹⁴Kake te neotiki oltung'ani aitirraki olikae pee ear metua, ewaita intae ninye aaitung'uaa olperere lai pee eye.

¹⁵“Ore pooki ng'ae oosh menye aashu ng'otonye neari metua.

¹⁶“Ore pooki ng'ae opurroo oltung'ani, pee emir aashu etumi ninye tiatua imasaa enyena, neari metua.

¹⁷“Ore pooki ng'ae odek menye aashu ng'otonye neari metua.

¹⁸“Te neishankarra iltung'ana neosh obo olikae to soit aashu te nkaina neitu eye oltung'ani eirraga te rruat,

¹⁹ore pee edumunye ilo nelo te ntirma[1], ore ilo otoosho ninye nelakuni; kake kelak ina kata naiturrayie neing'or ninye o meishiu alaari.

²⁰“Te nedumu oltung'ani eng'udi neosh orrindik lenye, aa olee aashu enkitok, neye orrindik teine, neitamei ilo tung'ani.

²¹Kake te neitu eye orrindik te nkolong nabo aashu too nkolong'i are, nemeitamei amu ore orrindik naa emasai enye.

²²“Te neara iltung'ana nepik entuaa[2] olbae o metapololoyu, nemetii ae torroni natusuja, ore ilo otipika ninye olbae neitalaki te risioroto e nkitalakunoto naitalak ninye olpayian le ina kitok; nelak anaa enanyorraa iladung'ok le nkiguana.

²³Te nesuju ae torroni neitalakuni enkishui te nkishui,

²⁴enkong'u te nkong'u, olalae to lalae, enkaina te nkaina, enkeju te nkeju,

²⁵enkinosata e nkima te nkinosata e nkima, olbae to lbae, olkordata to lkordata.

²⁶“Te neosh oltung'ani enkong'u o rrindik lenye, olee aashu enkitok, neitarruoo, neisho ninye ilo rrindik meshomo te nkaraki enkong'u.

²⁷Te neitayu olalae lo rrindik lenye, olee aashu enkitok, nelo ilo rrindik te nkaraki olalae.

²⁸“Te near olkiteng oltung'ani lee aashu enkitok metua, neari ilo kiteng too soito metua; nemenyae inkiri enyena; ore olopeny ilo kiteng nelakuni.

²⁹Kake te netamoo ilo kiteng ear iltung'ana, neikooki olopeny neany ening, near ilo kiteng metua olee aashu enkitok, neari ilo kiteng too soito metua, neari sii olopeny metua.

³⁰Naa te neigeroki metawalu enkishui enye nelak ninye meitajeu enkishui enye esiana pooki naba anaa enatudung'okoki.

³¹Te near olkiteng olayioni le likae tung'ani aashu entito, neiguanareki olopeny te risioroto ena kitanapata nabo.

³²“Te near olkiteng orrindik metua, olee aashu enkitok, neisho olopeny olkitok le ilo rrindiki shekeli tomoni uni e nkosholai. Neari ilo kiteng too soito metua.

³³“Te neing'uaa oltung'ani engumoto menuka aashu te netur oltung'ani engumoto nemenuk, nedoiki olkiteng aashu osikiria atua,

³⁴neitobir olopeny ina gumoto neisho impisai olopeny o lkiteng o sikiria neaku ina natua enenye.

³⁵“Te near olkiteng le likae tung'ani olkiteng le likae metua nemir ninche ilo kiteng oishu neor impisai enyena. Neor sii ina ng'ues natua.

³⁶Naa te neyioloi aajo etamoo oshi ilo kiteng earisho neitu eing'or olopeny, nelak ninye olkiteng to lkiteng neaku ina ng'ues natua enenye.