Read MAASAI REVISED PROTESTANT Enaidurra 22 Bible Online

Enaidurra 22 - MAASAI REVISED PROTESTANT bible

Enaidurra 22

¹“Te nepurroo oltung'ani olkiteng aashu enker, neyieng aashu emir, nelak ninye ilmong'i imiet to lkiteng obo o nkerra ong'uan te nker nabo.

²Meeta nchere melak ninye ina toki natupurroyie. Te nemeeta ninye toki, nemiri ninye anaa orrindik, pee elak ina natupurroyie.

³Te netumi ina ng'ues natupurroyie ninye tiatua imasaa enyena, aa enkiteng, osikiria aashu enker nelak ninye are te nabo.

⁴Te neibung'i olapurroni egilita enkaji kewarie neari metua; ore ilo otaara ninye metua nemeeta iloikop. Kake tenaa dama neeta ninye iloikop.

⁵“Te neisho oltung'ani inkishu edaa te nkurma anaa te nkurma oo sabibu anaa epalaa enkiteng meshomo anya enkurma e likae tung'ani meeta inchere pee meitalakuni teina naisul naing'uaa enkurma enye oo sabibu.

⁶Te nenya enkima enkop, neibung inkiku o metaa ore enkanasa nateenaki aashu enkano naitashe aashu enkurma nabulu einosa enkima, ore ilo oinua enkima nelak pooki.

⁷“Te neisho oltung'ani ole latia enye impisai aashu intokitin metushuma, nepurrorri te nkaji enye, ore te netumi olapurroni, nelak ninye katitin are.

⁸Te neitu etumi olapurroni, ore ilo openy e nkaji nelotu ataaniki Enkai, aitodolu tenaa ketipika ninye enkaina enye atua intokitin ole latia enye aashu eitu epik.

⁹“Ore olomoni pooki opong'oreki, tenaa te nkaraki olkiteng anaa, te nkaraki osikiria, anaa te nkaraki enker, anaa te nkaraki inkilani aashu pooki toki naimina najoyie oltung'ani, ‘Ninye ena’, neyauni enchankar oo nkaloli pokira dukuya Enkai; ore ilo odung'oki Enkai enkiguana nelaaki katitin are ilo le latia enye.

¹⁰“Te neisho oltung'ani ole latia enye osikiria aashu olkiteng, aashu enker, aashu ae ng'ues pooki meing'ura, neye, aashu etum olbae, aashu eyae, eitu eduaaya hoo ng'ae,

¹¹nenya pokira olmumai to Laitoriani pee edoli tenaa ketipika ninye enkaina enye atua imasaa e ilo le latia enye. Nenyorraa olopeny olmumai nemeitalaku enyamu.

¹²Naa tenaa ketupurroyioki too nkaik enyena, nelaaki naa ninye olopeny.

¹³Tenaa ing'uesi e ntim naatara inchoo ninye eyau shakenisho; nemelak ninye enyamu teina nataara ing'uesi e ntim.

¹⁴“Te neisilenoo oltung'ani ae toki to le latia enye, netum olbae aashu eye metii olopeny, nelak enyamu pooki.

¹⁵Naa te netii olopeny te nebo ina kiteng nemelak. Tenaa entoki apa naisilenuoki aasishore nelakieki enatoning'okinoteki.

¹⁶“Te neirorie oltung'ani entito neitu eyami, neboitare ninye, neishoru ninye intokitin e nkaputi te nkaraki ninye, neitaa ninye enkitok enye.

¹⁷Te neany menye eisho ninye meyama, nelaaki impisai naarisiore ine nkiyama oo ntoyie neitu aekata eyiolou olee.

¹⁸“Taara metua enkasakutoni.

¹⁹“Ore pooki ng'ae ololoitore eng'ues neari metua.

²⁰“Ore pooki ng'ae opolosaki kulie aitin neme Olaitoriani ake neishuni tukul.

²¹“Eminyal olomoni aashu imbooki ninye enkop, amu irara sii apa intae ilomon te nkop e Misiri.

²²Minosie osina enkoliai aashu enkerai okishi.

²³Naa ti ninosie ninche osina naaishiraki ninche nanu, naa kaning nanu olkiyioi lenye,

²⁴neyupuyup engoro ai, naar nanu intae to lalem, neaku inkituaak inyi inkolia, neaku inkera inyi okishin.[3]

²⁵“Ti nisilenoki impisai obo loo ltung'ana laainei otii atua intae ora aisinani, mitiu te ninye anaa oloitalaku esile niming'oru dupoto te ninye.

²⁶Te nelo niya olkila le ilo le latia ino pee intalakunye esile tushukoki ninye eitu edoyio enkolong,

²⁷amu ninye ake eitoipore, ninye enkitoipet to sesen lenye; kainyoo naa eitoipore? Naa te naaishiraki ninye nanu, naning amu kara oloata olng'ur.

²⁸“Misukeny Enkai nimidek olarikoni loo ltung'ana linono.

²⁹“Mimutie te nkishorunoto e nkiputakinoto e nkikesare ino o te mborei nadooyo e naisho oo sabibu. “Ore olkikau loo layiok linono nikincho nanu.

³⁰Ninko sii neijia too lmong'i o too ntare; inchoo eboitare ng'otonye too nkolong'i naapishana; ore te nkolong e naapishana nikincho nanu.

³¹“Iakuku intae iltung'ana ooitisinyaki te nkaraki nanu; metaa eminyanya inkiri oo ng'uesi naatara lowuarak, enchoo ildiein.