Read MAASAI REVISED PROTESTANT Enaidurra 23 Bible Online

Enaidurra 23 - MAASAI REVISED PROTESTANT bible

Enaidurra 23

¹“Minosaa intae ilomon le lejare. Mimbung'arere oltung'ani torrono aaitayu shakenisho e lejare.

²Mirubarere enkumoi oo ltung'ana aas intorrok, nimintayuyu shakenisho te nkiguana aarubare enkumoi oo ltung'ana pee inturraa esipata.

³Nimintodolu olkep to ltung'ani aisinani te nkiguana enye.

⁴“Ti ninang'are enkiteng aashu osikiria lo lmanga'tinta lino eimina tushukoki ninye.

⁵Ti nidol osikiria leilo likimba etepetikia olola enkop, nimilo aing'uaa, taretoki ninye metudumu olola.

⁶“Mintapong'oo esipata naipirare ilo aisinani te nkiguana enye.

⁷Talama enkitang'oroto e lejare, nimiar metua ole meeta entioto o lasipani, amu maikenaki nanu esipata olarruoni.

⁸Niming'amu entoki e ropare, amu ore eropare naa keitamodok ilkituaak neinyal erishata e lelo loo sipat.

⁹“Misoruru olomoni, iyiololo oltau lo lomoni, amu irara apa intae ilomon te nkop e Misiri.

¹⁰“Too larin ile entuun ninkesikese nkurman inyi;

¹¹kake ore to lari li opishana nipalipala eminkes hoo ae toki nabulu. Pee enya ilaisinak le lelo tung'ana linyi; ore inaaleku nenya ing'uesi e ntim. Ninkoko neijia too sabibu linyi o too lng'anayio linyi.

¹²“Entaas esiaai inyi too nkolong'i ile, kake ore te nkolong e naapishana niyeng'iyeng'ang'a pee etum olkiteng lino o sikiria lino enkiyeng'iyeng, negolu olayioni le rrindik ino o ilo dokunoti.

¹³Embung'a nena pooki natiaaka intae, nimimpotipoto ake nkarn e kulie aitin aashu minchosho metoning'i eimu nkutukie inyi.

¹⁴“Katitin uni to lari kintobirakiki nanu osirua.

¹⁵Embung'a osirua loo mukateni neitu eisuishieki, anaa apa enaaitanapa, ninyanya imukateni neitu eisuishieki too nkolong'i naapishana te nkolong natudung'oki olapa le Abibu amu te ninye apa itupukutuo aaing'uaa Misiri. Meetae oltung'ani olotu dukuya nanu too nkaik naarook.

¹⁶Embung'a osirua le nkikesare oo lng'anayio le dukuya le siaai inyi, te nena nintera aun tiatua enkurma. Embung'a osirua le nkiturrurrorre te nkiting'oto o lari, ti ninturrur te nkurma lelo ng'anayio le siaai inyi.

¹⁷Katitin uni to lari epuonu ilewa linyi pooki dukuya o Laitoriani Enkai.

¹⁸“Mintayu osarge lo lasar lai te nebo imukateni naaisuishieki aashu inchosho eilata o sirua lai eirrag o mekenyu.

¹⁹“Ore ilng'anayio ooituruku le lelo le dukuya le nkop inyi eyau enkaji o Laitoriani Enkai inyi. Miyierie olkuoo kule e ng'otonye.

²⁰“Ng'ura, kairriwaa olmalaika dukuya iyie, pee kirrip iyie te nkoitoi, nikiyau iyie ewueji naidipa aitobira.

²¹Toning'o ninye nias enajo, migolong'aki ninye, amu mikipalaki ninye enkitarruoroto ino; amu etii enkarna ai atua ninye.

²²“Kake ti nining asipu oltoilo lenye nias nena pooki najo, naaku nanu olmang'atinta loo lmang'ati linono nagilunore lelo likigilunore iyie.

²³“Te nelo olmalaika lai dukuya intae, neyau intae atua enkop oo lamori o Ilhiti o Ilperesi o Ilkanaani o Ilhifi o Ilyebusi, te najutu nanu ninche, (aishu),

²⁴nimirrugokino iyie inkaitin enye, aashu aisiaai ninche, aashu aas anaa enaishiaakino isiaatin enye, kake tusulai ninche tukul nibel ing'apeta enye metaa mbelat.

²⁵Olaitoriani Enkai ino isiayiaa, naa kamayian nanu emukate ino o enkare ino; naiwuang'ie imuoyiaritin tiatua intae.

²⁶Ore te nkop ino nemetii enkitok naibiru aashu enkolupi. Kaaisho nanu iyie enkishui naado.

²⁷Kairriu nanu olkirutoto lai meshomo te dukuya ntae napik enkiuyiaui iltung'ana pooki likiarare naisho ilmang'ati linono pooki meibelekenyata nikilany.

²⁸Kapik nanu ilmang'ati linono enkuretisho, naaraa Ilhifi o Ilkanaani o Ilhiti mikishomo aaing'uaa.

²⁹Maaraa nanu ninche meshomo te dukuya iyie to lari obo, pee meaku ake enkop enatii eliyio neponari ilowuarak le ntim nikintanyamal.

³⁰Kaaraa ninche maakutiti meshomo te dukuya iyie, metaba anaa niponariri aaya enkop.

³¹Napik nanu olpolosie lino ebaiki Enaiposha Nanyokie o metabaiki enaiposha oo Lfilisti, o ebaiki olpurkel o metabaiki olkeju le Frati; amu kayau lelo oomanya enkop apik enkaina ino, niaraa iyie ninche te dukuya iyie.

³²Mining'ore aitayunye osotua ninche aashu te nebo nkaitin enye.

³³Metoni ninche te nkop ino, pee mikipik ake easata oo ng'ok tialo nanu; amu ti nisiaai nkaitin enye meeta nchere pee meaku ina orreshet te iyie.”