Read MAASAI REVISED PROTESTANT Enaidurra 25 Bible Online

Enaidurra 25 - MAASAI REVISED PROTESTANT bible

Enaidurra 25

¹Nejoki Olaitoriani Musa,

²“Irorie iltung'ana loo Siraeli, pee aaitaiki enkishooroto. Tang'amu enkishooroto te rishata ai te pooki tung'ani otonyorra aishoru to ltau lenye, ning'amu iyie enkishooroto te nkaraki nanu.

³Naa ena enkishooroto ning'amu te ninche: saabu o enkosholai o suyai,

⁴nkarash pusi o sinteti, o naanyokie o kitani napuyiapui o lpapit loo nkineji,

⁵ndapan naanota oo lmeregeshi o ndapan oo nkineji, mbaoi oo lera,

⁶eilata oo ltaai o enkorropil o te ilata naaputishoreki o te rropili o lbani,

⁷o soito barrikon ooji oniks o lkulikae soito oopiki olkila lo lapolosani kitok o ina bene enye o lgoo.

⁸Nchoo ninche aaitobiraki nanu ewueji nesinya, pee atum atotona tiatua ninche.

⁹Anaa nena pooki naaitodol iyie naaipirta olchetie to lng'obor lo Laitoriani o masaa enyena pooki, neaku intobir aiko neijia.

¹⁰“Nchoo eitobir ninche osanduku too nkeek o lerai, intemeta are o lpisiai te nkadoro, entemet nabo o lpisiai endapasho, naa entemet nabo o lpisiai enkilepata.

¹¹Nimulumul ninye te saabu nasila, nintoip oriong o atua, nipik enkamanaa e saabu aitaman ninye.

¹²Nipik ilgiso oong'uan le saabu oonapieki, nipik ninche nkejek enyena pokira ong'uan, ilgiso oaare te nchoto enye nabo o lgiso oaare te nkae shoto enye.

¹³Nintayu mbokishi oo nkeek o lchani oji olerai, nimur ninche te saabu.

¹⁴Nipik nena bokishi atua lelo giso too mbat o sanduku pee enapieki ilo sanduku.

¹⁵Netoni nena keek, tiatua lelo giso too mbat o sanduku pee enapieki ilo sanduku; nemeitaini aaitung'uaa ninye.

¹⁶Nipik atua osanduku ina dapidapoi naigerore nkitanapat naaisho nanu iyie.

¹⁷Nintoki aitayu empising'et o lng'ur e saabu nasila; naa intemeta are o lpisiai enkadoro naa entemet nabo o lpisiai endapasho.

¹⁸Nindong'u ilkerubi oaare te saabu nipik nkaloli pokira are e ilo orika lo lng'ur.

¹⁹Intayu olkerubi obo te nkalo nabo nintayu olikae te nkae shoto; te ntoki nabo intobira lelo kerubi o ilo orika lo lng'ur too nkaloli enyena pokira are.

²⁰Nelak lelo kerubi inaipuko enye aaitushur olorika lo lng'ur too naipuko enye, neipira nkomomi enye eing'orita lkerubi ilo orika lo lng'ur.

²¹Naa ipik ilo orika lo lng'ur enchumata o sanduku; ore atua ilo sanduku nipik inena dapidapo naaisho nanu.

²²Teine nanu aalotu atumore, naa te shumata olorika lo lng'ur o te rishata e lelo kerubi ootii enchumata o sanduku le shakenisho, aairorie nanu iyie tialo nena pooki naaisho nanu iyie too nkitanapat te nkaraki itung'ana loo Siraeli.

²³“Naa ntobira emisa oo nkeek olerai ntemat are enkadoro, naa entemata nabo endapasho, naa entemata nabo o lpisiai enkilepata.

²⁴Imulumula te saabu nasila nipik enkamanaa e saabu.

²⁵Nipik aitaman enkamanaa e ntemata e ndapasho endap

²⁶naa ntobiraki ilgiso oong'uan le saabu nieniki lelo giso ilpijat pokira oong'uan too nkejek enyena pokira ong'uan.

²⁷Neirrag lelo giso te mbata e nkamanaa pee eimieki nena bokishi naanapieki emisa.

²⁸Nintayuyu mbokishi o lerai nimur te saabu naa kuna enapieki emisa.

²⁹Naa intobir isaanini enyena e nkorropil o masaa enyena naapikunyeki olasar opikuni, te saabu nasila intobir ninche.

³⁰Nipik emukate nasinya emisa dukuya nanu anaake.

³¹“Naa intobir enkitashet e saabu nasila napiki iltaai. Ore entonata o empolos enye neitobiri te siaai e nkidong'ore; ore nkikompeni enyena, o neeigululu enyena o ntapuka enyena neitaae pooki nabo o enkitashet.

³²Nepiki ilng'osil ile oipang too nkaloli enyena, ilng'osil okuni te nkibung'et te nkalo nabo o lng'osil okuni te nkibung'et te nkae alo enye;

³³netii ake nkikompeni uni naikunuwuaki anaa intapuka o lgulului, eeta ake nabo eneigululu o entapukai, to lng'osila obo o nkikompeni uni naikunuwuaki anaa ntapuka o lgulului, meetae ake ene meeta eneigululu o entapukai, to likae ng'osila, netiu neijia pokira ile ooipang'u teina kibung'et.

³⁴Ore te nkitashet kewan netii inkikompeni ong'uan naikunuwuaki anaa ilgululu, eeta ineigululu o ntapuka,

³⁵netii ake eneigululu nabo abori ilng'osil oaare o oiriamari te lelo ng'osil ile le ina kitashet.

³⁶Ore nena kiyiaa enye oo ntapuka o lng'osil lenye neitaa entoki nabo o ninye; neaku pooki entoki nabo e siaai naidong'uoki te saabu nasila.

³⁷Nintaiki iltaai oopishana, nepiki iltaai pee eitawang'aki dukuya enye.

³⁸Ore intokitin naarieki iltaai o neeiteleikini naa ile saabu nasila.

³⁹Te ntalanta nabo e saabu eitobiri te nebo kuna masaa pooki.

⁴⁰Ning'or nchere, intobira te nkitanyaanyukoto enye, apa nikintoduaaki to ldoinyo.