Read MAASAI REVISED PROTESTANT Enaidurra 30 Bible Online

Enaidurra 30 - MAASAI REVISED PROTESTANT bible

Enaidurra 30

¹“Intobira olperere lo lasar pee ipejie enkorropil enchumata enye. Too nkeek o lerai intobira.

²Naa keaku entemata nabo enkadoro naa entemata nabo endapasho. Nerisioroyu inkaloli pooki, naa intemat are enkilepata; ore mowuarak enyena naa entoki nabo o lperere.

³Tumura te saabu nasila enkoriong enye o matuan o mouarak enyena. Nipik enkamanaa e saabu aitaman.

⁴Nintobiraki ilgiso oaare le saabu, ti abori enkamanaa, too nkaloli enyena pokira are, pee eibung nena bokishi naa ninche enapieki.

⁵Nintayu imbokishi o lerai nimur ninche te saabu.

⁶Nipik ninye dukuya ilo liatua otii embata o sanduku le shakenisho, otii dukuya olorika lo lng'ur, te nchumata shakenisho, teine natumore nanu intae.

⁷Nepej Aron enkorropil naisonkoyo oleng to lperere lo lasar ore anaake tadekenya te neitobir iltaai nepej.

⁸Naa ore te neinok Aron iltaai teipa nepej enkorropil oo nkolong'i pooki te dukuya Olaitoriani tiatua iishoritin inyi pooki.

⁹Mintayuyu ake enkorropil nemesinya te nchumata teine, aashu olasar opejori, aashu olasar le nkurma naidong'o nimibukokiki olasar opikuni.

¹⁰Neitobir Aron olning'o lo sotua too mowuarak enyena kata nabo to lari; teilo sarge lo lasar loo ng'ok lo lning'o lo sotua eitobir ninye olning'o lo sotua nabo kata to lari tiatua iishoritin inyi pooki. Kesinya oleng ilo perere lo lasar to Laitoriani.”

¹¹Nejoki Olaitoriani Musa,

¹²“Teninkenikene ltung'ana loo Siraeli, aayiolou esiana neishoru ake pooki ng'ae elakunoto te nkaraki enkorrok enye to Laitoriani te ninken iyie ninche, pee mejing ake olmeitai atua ninche te ninken iyie ninche.

¹³Ore pooki ng'ae oikenayioki te nkikenare neishoru ena: olpisiai loo mpisai naaji shekeli te risioroto e shekeli eine wueji sinyati. Neitayu olpisiai le shekeli anaa olasar to Laitoriani.

¹⁴Ore pooki ng'ae oikenayioki te nkikena, ebaiki ilarin tikitam neilep, neishoru olasar to Laitoriani.

¹⁵Meishoru olkarsis inkumok nemeishoru olaisinani inkuti, to lpisiai le shekeli, te ninchoru olasar lo Laitoriani aitaiyu olning'o lo sotua te nkaraki kewan ino.

¹⁶Niya iyie impisai o lning'o lo sotua too ltung'ana loo Siraeli, nigelu aitaa ine nkisiaayiare o lng'obor le ntumo, pee eyau iltung'ana loo Siraeli metadamuni te dukuya Olaitoriani, pee intobiribiri olning'o lo sotua te nkaraki intae maate.”

¹⁷Nejoki Olaitoriani Musa,

¹⁸“Intobira emoti o suyai naitukuoreki; ore entonet enye naa eno suyai, pee eitukuoreki. Nipik ninye erishata o lng'obor le ntumo o lperere lo lasar, nipik enkare atua,

¹⁹pee aa ninye eitukuyie Aron o layiok lenyena inkaik enye o nkejek enye.

²⁰Te nepuo atua olng'obor le ntumo, aashu te nepuonu embata o lperere lo lasar aaisiaisho, aapejoki Olaitoriani olasar te nkima, neitukuo ninche te nkare, meye ake.

²¹Neituku ninche inkaik enye o nkejek enye, meye ake. Neaku ena enkitanapata ntarasi te Aron o too ishoritin enyena tiatua ishoritin enye pooki.”

²²Ore tenebo nena neitoki Olaitoriani ajoki Musa,

²³“Ntayu isonkoyoni sidain oleng; shekeli iip imiet e manoo, naruko, o lpisiai le nena loo nkabobok o sinantei naarropil oleng, aa taa shekeli iip are o onom,

²⁴o shekeli iip imiet o sinantei oojuno, te risioroto e ntemata e wueji sinyati, o eilata oo loirienito mboreitin imiet e mpirbil.

²⁵Nintayu iyie te kuna eilata nasinya naputishoreki.

²⁶Nibukoki aitisiny ilo ng'obor le ntumo o ilo sanduku le shakenisho,

²⁷o emisa o ntokitin enyena pooki o enkitashet oo ltaai o ntokitin enyena pooki o lperere le nkorropil

²⁸o lperere lo lasar opejorieki ilasarri tenebo ntokitin enyena o embeshen naitukuoreki o ntonet enye.

²⁹Nteng'ele iyie ninche pee etum aataa sinyat tukul. Ore pooki naiseyie ninye neaku sinyati.

³⁰Nibukoki Aron o layiok lenyena aitisiny ninche, pee aatum aaisiaayia anaa ilapolosak.

³¹Nijoki iyie iltung'ana loo Siraeli, ‘Keaku ena eilata ai sinyati naputishoreki tiatua ishoritin inyi.

³²Nemebukokini iseseni ake le pooki ng'ae, nimintayu ae nanyaanyukie te nkitobirunoto; kesinya ninye, naa keton esinya te iyie.

³³Ore pooki tung'ani oitobira aitushulu ae nanyaanyukie, aashu pooki ng'ae opik ae te ninye oltung'ani le boo neiwuang'ieki tiatua iltung'ana lenyena.’ ”

³⁴Nejoki Olaitoriani Musa, “Intayu intokitin naarropil, naaji natafi o shekeli o kelbena; o ntokitin naarropil te nebo enkorropil nasila nerisioroyu pooki.

³⁵Intobira enkorropil naitushulaki te nkarriyiano olaitobirani loo sonkoyoni natipikaki emunyan aasil neitisinyi.

³⁶Nindong iyie embata enye kiti oleng, nipik embata enye dukuya shakenisho tiatua ilo ng'obor le ntumo teine naatumore nanu iyie; neaku ninye te iyie sinyati oleng.

³⁷Ore enkorropil nintayu te risioroto e enkitushulata enye, nimintayu te nkaraki intae maate, keaku ninye te ntae sinyati to Laitoriani.

³⁸Ore pooki ng'ae oitayu ae nanyaanyukie pee easishore anaa esonkoyo neiwuang'ieki tiatua iltung'ana lenyena.”