Read MAASAI REVISED PROTESTANT Enaidurra 31 Bible Online

Enaidurra 31 - MAASAI REVISED PROTESTANT bible

Enaidurra 31

¹Nejoki Olaitoriani Musa,

²“Ng'ura, aaipoto nanu te nkarna e Besalel olayioni le Uri, olayioni le Huri, lo losho le Yuda:

³naiputa nanu ninye Enkiyang'et e Nkai, te nkidimata o te nkalamasisho o te ng'eno o te nkarriyiano pooki.

⁴Pee eipiru mbaa e nkarriyiano, neasisho te saabu o te nkosholai o to suyai,

⁵te ndung'oto oo soito oopiki iwuejitin o te ng'uetata oo nkeek, te siaai e nkarriyiano pooki.

⁶Naa ng'ura, ategelua nanu te nebo ninye Oholiab olayioni le Ahisamak, lo losho le Dan; naishoo nanu iltung'ana pooki oodupa enkidimata, pee etum aaitobira nena pooki naaitanapa nanu iyie:

⁷ilo ng'obor le ntumo o ilo sanduku le shakenisho o ilo orika lo lng'ur otii enchumata enye, o masaa pooki e ilo ng'obor;

⁸emisa o ntokitin enyena o ina kitashet o ltaa le saabu nasila te nebo ntokitin enyena pooki, olperere le nkorropil,

⁹o ilo perere lo lasar opejori te nebo ntokitin, enyena pooki, o emoti naitukuoreki o eneitotonieki enye,

¹⁰o lelo kilani ootiripuaki aaikod le Aron olapolosani, o lkilani loo layiok lenyena, te nkisiaayiare enye anaa ilapolosak,

¹¹o ina ilata naputishoreki o enkorropil naisonkoyo e ine wueji sinyati. Anaa nena pooki naaitanapa iyie. Neas ninche.”

¹²Nejoki Olaitoriani Musa,

¹³“Tiaaki iltung'ana loo Siraeli ‘Embung'a Sabato ai amu olmonokie ele te rishata ai o ntae tiatua iishoritin inyi pooki, pee itumutumu aatayiolo nchere, nanu Olaitoriani oitisiny intae.

¹⁴Embung'a Sabato amu aisinyati te ntae; ore pooki ng'ae oisarkionie neari metua; ore oltung'ani oasisho teina olong neiwuang'ieki ninye tiatua iltung'ana lenyena.

¹⁵Too nkolong'i ile easi esiaai kake ore enkolong e naapishana naa Sabato, enkolong e nkiyeng'iyeng naitisinyi, sinyati to Laitoriani; ore oltung'ani oas pooki siaai te nkolong e Sabato neari metua.

¹⁶Metaa keibung iltung'ana loo Siraeli Sabato, neing'or Sabato tiatua iishoritin enye pooki, anaa osotua loo ntarasi.

¹⁷Olmonekie ele intarasi te rishata ai o ltung'ana loo Siraeli nchere too nkolong'i ile eitobira Olaitoriani keper o enkop; ore te nkolong e naapishana neyeng'iyeng'a.’ ”

¹⁸Neisho Olaitoriani Musa nena dapidapo are e shakenisho ina kata pee eidip airorie te nchumata oldoinyo le Sinai, indapidapo o soit, naaigero to lkimojino le Nkai.