Read MAASAI REVISED PROTESTANT Enaidurra 32 Bible Online

Enaidurra 32 - MAASAI REVISED PROTESTANT bible

Enaidurra 32

¹Ore ake pee edol iltung'ana aajo eimutie Musa eitu elotu adou to ldoinyo, neiturrurro iltung'ana aasotokino Aron, nejoki ninye, “Inyo, intaiki iyiook inkaitin naapuo te dukuya iyiook, amu ore ele Musa, ele tung'ani laa ninye oyaua iyiook ailepunye aitung'uaa enkop e Misiri, mikiyiolo iyiook enataase te ninye.”

²Nejoki Aron ninche, “Entayutu lelo giso le saabu ootii inkiyiaa oo nkituaak inyi, o ilayiok linyi, o ntoyie inyi, nikiyakiki nanu.”

³Neitayu iltung'ana pooki ilgiso le saabu ootii nkiyiaa enye, neyaki ninche Aron.

⁴Neng'amu ninye ina saabu too nkaik enye, neitobir te ntoki naguetishoreki, neitayu olashe le saabu natosholaki; nejo ninche, “Kuna ninche inkaitin inyi, intae Isiraeli, naayautua aailepunye aaitung'uaa enkop e Misiri!”

⁵Ore ake pee edol Aron ena, neshetu ninye olperere lo laser te dukuya ninye; neitubulaa Aron ajo, “Ore taaisere naa keaku osirua lo Laitoriani.”

⁶Neinyototo ninche aayooki taaisere, neitayu ilasarri oopejori, neyau ilasarri le seriani; netoni iltung'ana aadaa neokisho, neinyototo aaiguran.

⁷Nejoki Olaitoriani Musa, “Tadoi shomo; amu ore iltung'ana linono, laa ninche apa iyaua ailepunye aitung'uaa enkop e Misiri, neinyala ate aagil inkitanapat,

⁸neibelekenyate aapaashaa aasioki aaing'uaa enkoitoi apa naa ninye aitanapa ninche; eitaikitia ate olashe oitobirutua te saabu nashola, neteserema ninche ninye neitaiki ninye olasar, nejo, ‘Kuna ninche inkaitin inyi intae Isiraeli, naa ninche naayautua intae aailepunye aaitung'uaa enkop e Misiri.’ ”

⁹Nejoki Olaitoriani Musa, “Atoduaa kulo tung'ana, naa nayiolou ajo iltung'ana oogol ilukuny

¹⁰ore naa tung'uayioki nanu, pee etum engoro ayupuyupo neirowuaju te ninche amu aidim aidaikie ninche, kake ore te iyie naitayu olorere kitok.”

¹¹Kake etasayia Musa Olaitoriani Enkai enye nejo, “Olaitoriani, kainyoo pee eyupuyup engoro ino airowuaju te nkaraki iltung'ana linono laa ninche apa iyaua aitung'uaa enkop e Misiri te ngolon sapuk o te nkaina e nkidimata?

¹²Kainyoo pee ejo Ilmisiri, e ntorroni apake eyiewakini ninche, pee eitupukuo te Misiri alotu aar metuata too ldoinyo, nemut ninche aiwuang'ie ti oriong e nkop? Mbelekenyayu tapala engoro ino napi, nirridu tena torroni te nkaraki iltung'ana linono.

¹³“Tadamu Abraham, o Isaak, o Israel, isinkan linono, laa te ninche inosa olmumai te kewan ino, nijoki iyie ninche, ‘Kaponaa nanu eishoi ino anaa ilakir le shumata; ore ena kop pooki natonyorra aishoru, naa kaisho nanu eishoi ino nejung ninche ntarasi.’ ”

¹⁴Neirridu Olaitoriani ina torroni natadamua pee itaasiltung'ana lenyena.

¹⁵Neibelekenya Musa, nelo adoyio to ldoinyo eeta mbaoi are e shakenisho too nkaik enyena, mbaoi naaigero too nkaloli pokira are; eigero te nkalo nabo neigero te nkae alo.

¹⁶Ore lelo soito dapashi naa esiaai e Nkai, ore ilkigerot naa ilkigerot le Nkai ootaguetakaki oriong lelo soito dapashi.

¹⁷Ore ake pee ening Yoshua ololepilepi loo ltung'ana ebuakita, nejoki ninye Musa, “Etii ololepilepi lo larrabal atua enkang oo lng'oborri.”

¹⁸Nejo, “Mme oltoilo le mbuakunoto e nkisulata aashu oltoilo le nkishirata e mirata, kake oltoilo le ranyare ilo laning'ito.”

¹⁹Ore ake enyiku aataaniki ilng'oborri nedol ilo ashe o sinkolio, neyupuyup engoro e Musa airowuaju nenang'aa ninye lelo soito oigerore ikitanapat e Nkai too nkaik enyena, nebel ninche te ntonata o ldoinyo.

²⁰Neya ninye ilo ashe oitobirutua ninche, nepejoo ninye te nkima, neidong aitaa empunyua, neidapashaki oriong enkare, neitook iltung'ana loo Siraeli ina are.

²¹Nejoki Musa Aron, “Kainyoo kintaasa kulo tung'ana pee iyaua eng'oki sapuk shumata ninche?”

²²Nejo Aron, “Mincho engoro o lkitok lai eyupuyup airowuaju; iyiolo iyie kulo tung'ana nchere eiulokinote entorroni.

²³Amu aatiaakita ninche nanu, ‘Ntobiraki iyiook inkaitin, naapuo te dukuya iyiook; amu ore ele Musa, ilo tung'ani oyaua iyiook ailepunye aitung'uaa enkop e Misiri, mikiyiolo iyiook enatotiwuo te ninye.’

²⁴Najoki nanu ninche, ‘Enchoo pooki ng'ae oata saabu eitayu,’ naaisho ninche nanu, nanang'aki nanu atua enkima, nepukunye ine ele ashe.”

²⁵Ore ake pee edol Musa ajo meekure eitoriayu iltung'ana (etapalayie Aron metaa meitoriayu, aitukurru ninche tiatua ilmang'ati lenye),

²⁶neitoki Musa aitashe te kishomi e ina ang oo lng'oborri, nejo, “Kaing'ae ole nkalo o Laitoriani? Wou enatii.” Neiturrurro ilayiok le Lawi maate teine netii ninye.

²⁷Nejoki ninye ninche, “Nji ejo Olaitoriani Enkai oo Siraeli, ‘Teena pooki ng'ae olalem te mpolos enye, nilo aman enkang oo lng'oborri pooki ebaiki kishomi o enkae kishomi ning'il ake ashukunye, taara pooki tung'ani olalashe lenye, o le ncholiek enye olelatia enye.’ ”

²⁸Neas ilayiok le Lawi te risioroto ororei le Musa; nebatata ina olong iltung'ana oobaya inkalifuni uni.

²⁹Nejo Musa, “Ore taata nituputo ate te nkisiayiare o Laitoriani, pooki ng'ae te nkinyiang'a o layioni lenye o eno lalashe lenye, pee eisho ninye Enkai ntae emayianata ena olong taata.”

³⁰Ore taaisere nejoki Musa iltung'ana, “Itaasa intae eng'oki sapuk. Ore taata naa kailep alo enetii Olaitoariani; amu ebaiki naitobir olning'o lo sotua te nkaraki ing'ok inyi.”

³¹Neaku enyaaka Musa ashuko alo enetii Olaitoriani nejo, “Wooi etaasa kulo tung'ana eng'oki torrono oleng; eitobiritua inkaitin te saabu neserem ninche.

³²Tapaliki sii ake ninche eng'oki enye; naa ti nimipaliki, tujutoki aatasayia tiatua ina buku ino apa niking'erie.”

³³Nejoki Olaitoriani Musa, “Ore pooki ng'ae otaasa eng'oki tialo nanu, ninye ajut enkarna enye tiatua embuku ai.

³⁴Kake shomo taata toriko iltung'ana ine wueji apa naatiaaka; ng'ura, kelo olmalaika lai te dukuya iyie. Ore ake eyia, ore ina olong nabau nanu naitame ing'ok enye te shumata ninche.”

³⁵Neirriwaki Olaitoriani olmeitai iltung'ana, te nkaraki naitobirutua ilo ashe oitobirua Aron.