Read MAASAI REVISED PROTESTANT Enaidurra 34 Bible Online

Enaidurra 34 - MAASAI REVISED PROTESTANT bible

Enaidurra 34

¹Nejoki Olaitoriani Musa, “Tagueta isoito are dapashi oonyaanyukie ilapa le dukuya, pee aiger nanu te lelo soito dapashi irorei ootii lelo soito dapashi le dukuya, apa litebela.

²Tanapayu tadekenya, nilepu alotu oldoinyo le Sinai, niyau kewan enatii teine te nchumata o ldoinyo.

³Meetae oltung'ani oilepu alotu te nebo iyie, naa inchoo metaa meetae oltung'ani odoli to ldoinyo pooki; nchoo eaku medaa nkishu o nkerrai te dukuya ilo doinyo.”

⁴Neguet Musa isoito are dapashi oonyaanyukie ilapa le dukuya, nedumunye ayooki tadekenya neilep alo enchumata oldoinyo le Sinai, anaa enaitanapa Olaitoriani ninye, neya te nkaina enye lelo soito oogueta dapashi.

⁵Nedou Olaitoriani te nkatampoi neitashe te nebo ninye teine neibalunye Laitoriani enkarna o enye.

⁶Neim Olaitoriani dukuya Musa nejo, “Kara Olaitoriani, Olaitoriani Enkai o lng'ur o empiris nemasioki agoro, naabore enyorrata nauno enkisiligata

⁷naibung enyorrata nauno too ltung'ana iip inkuyu, napalaki entorroni o enkitarruoroto o eng'oki, kake mme oloikenaki oltung'ani loo ng'ok esipata tukul, nasujaki inkera ing'ok oo loo menye o nkera oo nkera enye o metabaiki eishoi e uni o eniong'uan.”

⁸Neirrug Musa endukuya enye asioki metabaiki enkop, neserem.

⁹Nejo ninye, “Tenaa taata kanoto omom too nkonyek inono, Olaitoriani, inchoo Olaitoriani, aatomono iyie, shomo tenebo o yiook, hoo nikira iltung'ana oogolong'u, nipalaki iyiook entorroni ang o ng'ok ang, ninta iyiook mataa iltung'ana linono.”

¹⁰Nejoki Olaitoriani Musa, “Kaitayu nanu osotua. Ore te dukuya iltung'ana linono pooki naas nanu ine nking'asia, neitu aekata easi tiatua enkop pooki aashu ti ae kop; ore lelo tung'ana litii iyie atua ninche nedol esiaai o Laitoriani; amu entoki naitureisho aitaas intae.

¹¹“Imbung'a ina naaitanap iyie ena olong. Kaaraa nanu aipang'ie te dukuya intae Ilamori, Ilkanaani, Ilhiti, Ilperesi o Ilhifi o Lyebusi.

¹²Toduaa ake kewan mintayu ake osotua o lelo oomanya enkop pooki nilo, meaku ake orreshet tiatua intae.

¹³Tusulaki enkop ilpereren loo lasarri lenye, nigil ing'apeta enye, nidung auroki enkop nena kitanyaanyukot naaji Asherim.

¹⁴(Amu miserem iyie ae Ai, amu kara Olaitoriani laa ore enkarna enye naa Olom, naa Enkai olom).

¹⁵Mintayunye ake olning'o lelo oomanya enkop, amu te neas enkiborra oo nkonyek erubare inkaitin enye, nepolosaki ilasarri inkaitin enye, nikintoomon iyie obo lenye, nidaa iyie te ilo asar lenye,

¹⁶niya iyie intoyie enye ayamaki ilayiok linono, neas intoyie enkiborra oo nkonyek esujaa inkaitin enye neitasuroki ilayiok linono enkiborra oo nkonyek esujaa inkaitin enye.

¹⁷“Mintobiraki kewan inkaitin oo ntokitin naatosholaki neidong'i.

¹⁸“Imbung'a osirua loo mukateni neitu eisuishieki. Too nkolong'i naapishana inosa mukateni neitu eisuishieki, anaa enaaitanapa, teina kata nategeluaki to lapa le Abibu; amu teilo apa iewuo aipang'u aing'uaa Misiri.

¹⁹Ore pooki kikau naa olalai, ilewa linono pooki, olbung'aiko loo nkishu o lkikaunot pooki loo nkishu o loo nkerra.

²⁰Ore olkikau lo sikiria niwalu to lkuoo le ker, aashu ti nimiwalu nigil emurt enye. Ore ilkikaunot pooki loo layiok linono niwalu akordu nemetii hoo obo olotu dukuya nanu meeta toki.

²¹“Too nkolong'i ile taasisho, kake ore te nkolong e naapishana niyeng'iyeng'a; ore te nkata e nkiremore o te nkikesare niyeng'iyeng'a.

²²Ning'or aibung osirua loo wikii too olng'anayio le dukuya le nkikesare e nkano o sirua le nkiturrurrorre te siadi ari.

²³Katitin uni to lari eliooyu ilewa linono pooki te dukuya Olaitoriani Enkai, Enkai oo Siraeli.

²⁴Amu kanang'aa nanu aiturraa iloreren te dukuya ntae; naitalala nanu ilpolosien linyi; nemetii oltung'ani ong'uar enkop inyi, ti nilepu alo alioyu te dukuya Olaitoriani Enkai ino katitin uni tolari.

²⁵“Mintayu ake osarge lo lasar lai te nebo entoki naisuisho, nimincho sii olasar lo sirua le Ng'iroroto eirrag o mekenyu.

²⁶Ore lelo ng'anayio le dukuya ooituruku too lng'anayio le dukuya le nkop ino niyau atua enkaji o Laitoriani Enkai ino. Nimiyierie olkuoo kule e ng'otonye.”

²⁷Nejoki Olaitoriani Musa, “Ing'ero kulo rorei amu te risioroto e kulo rorei aitayio osotua te nebo iyie o te nebo Isiraeli.”

²⁸Netii apa Musa ine te nebo Olaitoriani inkolong'i artam o nkewarietin artam, neitu enya emukate aashu eok enkare. Neiger ninye te lelo soito dapashi irorei lo sotua, nena kitanapat tomon.

²⁹Ore pee edou Musa to ldoinyo le Sinai, eeta isoito oaare dapashi lo nkitanapat te nkaina enye elotu adou aing'uaa oldoinyo, neitu eyiolou Musa ajo etawang'a enkomom enye te nkaraki natigira airo te nebo Enkai.

³⁰Ore ake pee edol Aron o ltung'ana pooki loo Siraeli Musa aajo kewang enkomom enye, neureyu ninche epuonu aanyikaki ninye.

³¹Kake eipotuo Musa ninche; neshukokino ninye Aron o larikok pooki lo lorere, neiro Musa te nebo ninche.

³²Ore te siadi nepuonu aanyiku iltung'ana pooki loo Siraeli, neisho Musa ninche te nkitanapata nena pooki naairoro Olaitoriani te nebo ninye to ldoinyo le Sinai.

³³Ore ake pee eidip Musa airorie ninche neitoip enkomom enye to lkarasha.

³⁴Kake ore ake tenelo Musa dukuya Olaitoriani airo te nebo ninye, neiwuang'ie ilo karasha oitoipie enkomom enye, o metaba anaa nelotu boo; naa ore te nelotu boo neliki iltung'ana loo Siraeli ina naitanapaki ninye,

³⁵nedol iltung'ana loo Siraeli enkomom e Musa, neitoki Musa aitoip enkomom enye ometaba anaa nelo atua airo tenebo o Enkai.