Read MAASAI REVISED PROTESTANT Enaidurra 35 Bible Online

Enaidurra 35 - MAASAI REVISED PROTESTANT bible

Enaidurra 35

¹Neiturrurru Musa olorere pooki loo ltung'ana loo Siraeli nejoki ninche, “Kuna ninche intokitin naaitanapa intae Olaitoriani entaas.

²Too nkolong'i ile easi esiaai inyi, kake ore te nkolong e naapishana nitumutumu Sabato sinyati e nkiyeng'iyeng to Laitoriani; ore pooki ng'ae oas esiaai teina olong neari metua.

³Minokinoko enkima too nkajijik inyi te nkolong e Sabato.”

⁴Nejoki Musa olturrur pooki loo ltung'ana loo Siraeli, “Ena toki ninye eitanapishe Olaitoriani.

⁵Eyautu tiatua intae enkishooroto eyaki Olaitoriani; ore pooki ng'ae oata oltau le leng'on nchoo ninye eyaki Olaitoriani enkishooroto; saabu o enkosholai o suyai;

⁶o iusin pusi o morijo o mpilei o kitani napuyiapui napiyaya; o lpapit loo nkineji

⁷o ndapan naanota oo lmeregeshi o noo nkineji o nkeek o lerai

⁸o eilata oo ltaai, isonkoyoni teina ilata naputishoreki, o te nkorropil naisonkoyo,

⁹oltoto barrikon, o ltoto pee epiki enkila dorrop o embene o lgoo.

¹⁰“Ninchosho pooki tung'ani oata enkidimata tiatua intae meeu aitobir nena pooki naaitanapishe Olaitoriani: olng'obor le Nkai,

¹¹olng'obor lenye o entoki naitushurieki o enkitushurata enye o lala oololo lenyena, o rubat enyena, o loom lenyena, ing'apeta enyena o ntoneta enyena;

¹²ilo sanduku o nkeek enyena, ilo orika lo lng'ur o ilo liatua lenye,

¹³o ina misa o mbokishi enyena o masaa enyena pooki o ina mukate sinyati;

¹⁴nena kitasheta oo ltaai sii te nkaraki ewang'an te nebo imasaa enyena o ltaai lenyena, o eilata o ltaa;

¹⁵olperere le nkorropil te nebo mbokishi enyena, o ina ilata naputishoreki o ina orropil naisonkoyo o ilo odung'oro le kutuk aji te kutuk aji o lng'obor le Nkai;

¹⁶ilo perere lo lasar opejori te nebo ina ng'esherrie enye o suyai, imbokishi enyena o ntokitin enyena pooki o ina moti naitukuoreki o entonet enye;

¹⁷o nena kisiong'at endung'oroto o ng'apeta enyena o ntoneta enyena o ilo odung'oro le kishomi e ndung'oroto;

¹⁸nena sheito e nkaji e Nkai o nena sheito o olodung'oro, o nkeenta enye;

¹⁹nena kilani naaripuno aaitobiruno te nkaraki enkisiaayiare te wueji sinyati, lelo kilani oosinya le Aron ilo apolosani, o lelo kilani loo layiok lenyena, te nkisiayiare enye anaa ilapolosak.”

²⁰Nepuo olorere pooki loo ltung'ana loo Siraeli teine enetii Musa.

²¹Nepuonu ninche, ore pooki ng'ae otudumua oltau lenye, o pooki otuputuo oltau lenye, neyau enkishooroto o Laitoriani pee easishoreki te ilo ng'obor le ntumo o te nkisiayiare enye pooki, o te lelo kilani oosinya.

²²Nepuonu ninche, ilewa o nkituaak; ore pooki oora ilo ltau le yieunoto neyau ilgameta o lmiintoni o lgiso o mankek (isaen loo murto) o lkataarri o ntokitin oo mpukunot pooki e saabu eiteng'elaki ake pooki tung'ani Olaitoriani enkishooroto e saabu Olaitoriani.

²³Ore pooki tung'ani oinepuaki eeta iusin pusi aashu morijo, aashu mpilei aashu kitani napuyiapui napiyaya, aashu ilpapit loo nkineji aashu ndapan naanota oo lmeregeshi aashu inoo nkineji neyau ninche.

²⁴Ore pooki ng'ae oidim aitayu enkishooroto e nkosholai aashu osuyai neyau anaa enkishooroto o Laitoriani; ore pooki tung'ani oinepuni eeta enchata o lerai naata tipat te siaai, neyau ninye.

²⁵Ore nkituaak pooki naata enkidimata napiyayisho too nkaik enye, neyau nena naapiyaya, too usin pusi o morijo o mpilei o te kitani sidai napuyiapui.

²⁶Ore nena kituaak pooki naatudumutua iltauja lenye te nkarriyiano nepiyai ilpapit loo nkineji.

²⁷Neyau ilarikok iltoto barrikon ooji oniks o soito pee epiki, te nkaraki enkila dorrop o ina bene o lgoo,

²⁸o sonkoyoni o eilata te nkaraki ewang'an o ina ilata naputishoreki o enkorropil naisonkoyo.

²⁹Ore ilewa pooki o nkituaak, lelo tung'ana loo Siraeli, ootupututuo iltauja lenye neyau pooki toki te nkaraki ina siaai naitanapishe Olaitoriani te Musa metaasi neyau inkishoorot enye olpela aaisho Olaitoriani.

³⁰Nejoki Musa iltung'ana loo Siraeli, “Eng'ura, eipoto Olaitoriani te nkarna Besalel olayioni le Uri, olayioni le Huri lo losho le Yuda;

³¹neiputa Enkai ninye te Nkiyang'et enye, te nkidimata, o te nkalamasisho, o te ng'eno, o te nkarriyiano.

³²Pee eipiru nkitobirat e nkarriyiano, neasisho te saabu o te nkosholai o to suyai,

³³te ndung'oto oo soito oopiki o te ng'uetata oo nkeek, te siaai e nkarriyiano pooki.

³⁴Nchoo ninye enkidimata enye naiteng'enishore, ninye te nebo o Oholiab olayioni le Ahisamak lo losho le Dan.

³⁵Eiputa ninye ninche te nkidimata metaasa empukunoto e siaai pooki naas laguetak loo soito, o ilasirak, o laripak loo usin pusi o morijo o mpilei o kitani naapuyiapui napiyaya aashu ilashetak, te pooki pukunoto o laisiaayiani aashu olaipirunoni arriyia.