Read MAASAI REVISED PROTESTANT Enaidurra 36 Bible Online

Enaidurra 36 - MAASAI REVISED PROTESTANT bible

Enaidurra 36

¹“Ore Besalel o Oholiab o pooki tung'ani oata enkidimata o enkalamasisho oishoo Olaitoriani metayiolo eneiko te neas pooki siaai e nchetare e ine wueji sinyati, neas te risioroto e nena pooki naaitanapishe Olaitoriani.”

²Neipot Musa Besalel o Oholiab o pooki tung'ani oata enkidimata otipika Olaitoriani enkarriyiano o pooki ng'ae odumu oltau lenye meeu aas esiaai;

³neng'amu ninche te Musa nena kishorunot pooki o lpela naayautua iltung'ana loo Siraeli pee easieki esiaai e ine wueji sinyati. Neitoki ake ninche aayaki ninye nkishoorot o lpela pooki akenya,

⁴o metaba anaa nepuonu lelo tung'ana pooki oata enkidimata apa oasita esiaai e mpukunoto pooki teine wueji sinyati, oltung'ani ake teina siaai apa naasita,

⁵aajoki Musa, “Ekeyau iltung'ana intokitin kumok oleng naalusoo te asata e ina siaai apa naitanapa iyiook Olaitoriani mataas.”

⁶Neishoru Musa enkitanapata, neitubulari olomoni tiatua ina ang oo lng'oborri, aajo “Mincho olee aashu enkitok eitoki aas ae toki tialo nkishoorot e ine wueji sinyati.” Neiboori iltung'ana pee meitoki aayau.

⁷Amu ore intokitin naata ninche naa keidip neasieki esiaai pooki, neleku.

⁸Ore lelo tung'ana pooki oata enkidimata tiatua lelo oasisho neitobir enkaji e Nkai too lkarash tomon; neitayu te kitani napuyiapui napiyaya o too usin pusi o morijo o mpilei o lkerubi oitayioki te nkarriyiano.

⁹Ore enkadoro o lkarasha obo naa intemat tikitam o isiet, ore endapasho naa intemat ong'uan; nerisio ilkarash pooki te nkadoro.

¹⁰Neitutum ninye ilkarash imiet te nebo, ore ilkulikae karash imiet neitutum te nebo.

¹¹Neitayu ilidat oo lgoso pusi te manaroto e nkalo e oriong o lkarasha teina tukus e dukuya; neitoki aiko neijia, neitayu ninche, te manaroto e oriong oo lkarash teina tukus e dukuya; neitoki aiko neijia, neitayu ninche, te manaroto e oriong o lkarasha teina tukus e are.

¹²Neitayu ninye ilidat oolgoso onom to lkarasha obo, neitoki aitayu ilidat oo lgoso onom te manaroto o lkarasha le ina tukus e are; ore nena lidat oo lgoso naa keipirakino maate.

¹³Neitoki ninye aitayu ilala oololo onom le saabu, neitutumie lelo karash te nebo te lelo gameta; metaa ore ina aji e Nkai naa nabo.

¹⁴Neitoki ninye aitayu ilkarash loo lpapit loo nkineji te nkaraki olng'obor meitushura enkaji e Nkai; neitayu ninye ilkarash tomon o obo.

¹⁵Ore ake enkadoro e pooki karasha naa intemat tomoni uni, naa ore ake endapasho e pooki karasha naa intemat ong'uan; ore lelo karash tomon o obo nerisio.

¹⁶Neitutum ninye ilkarash imiet maate, o lkarash ile maate.

¹⁷Neitayu ilidat oo lgoso onom te manaroto e nkalo e oriong olkarasha le ntukus nabo, o lgoso onom te manaroto olikae eitutum ilkarash.

¹⁸Neitoki ninye aitayu ilala oololo onom lo suyai pee eitutumie olng'obor te nebo pee etum ataa entoki nabo tukul.

¹⁹Neitaiki ninye ilo ng'obor eneitushurieki too ndapan naanota oo lmeregeshi, o ndapan oo nkineji.

²⁰Neitoki ninye, aitobir irubat oo sunta naaitashe eilo ng'obor le Nkai too nkeek o lerai.

²¹Intemat tomon apa enkadoro e rubata nabo naa entemata nabo o lpisiai endapasho e rubata.

²²Neeta pooki rubata ng'amat are, oorubieki te nebo; neas ninye ena too rubat oosunta pooki e ilo ng'obor le Nkai.

²³Neitayu ninye irubat e ilo ng'obor le Nkai aikunu inji; irubat tikitam te nkalo e kopikop,

²⁴neitobir ninye ntoneta artam e nkosholai ti abori nena rubat tikitam, ntoneta are ti abori erubata nabo too ng'amat enyena aare, o ntoneta are ti abori olikae liatua too rubat enyena pokira are.

²⁵Ore te nchoto e are e ilo ng'obor le Nkai, te nkalo e moikuape, neitayu ninye irubat tikitam

²⁶o ntoneta enye artam e nkosholai are ti abori erubata nabo o ntoneta are ti abori enkae rubata.

²⁷Ore tioriong e ilo ng'obor le Nkai te nkalo o loontoluo neitobir irubat ile.

²⁸Neitobir ninye irubat are too lpijat lo ng'obor le Nkai tioriong.

²⁹Naa kerisha apa ti abori kake eibung'a te shumata, to lgisoi le dukuya; neitayu ninye pokira are aikunu inji, too lpijat pokira aare.

³⁰Era apa irubat isiet te nebo ntoneta enye e nkosholai ntoneta, tomon o ile, ore tiabori erubata nabo, naa ntoneta are.

³¹Neitayu ninye iloom lo lerai, iloom imiet too rubat te nkalo nabo e ilo ng'obor le Nkai,

³²o loom imiet te nkae shoto e ilo ng'obor le Nkai, o loom imiet too rubat e ilo ng'obor le Nkai tioriong te nkalo o loontoluo.

³³Neitayu ninye oloomi le polos pee eimieki ebaiki enkalo nabo o metabaiki enkae aitorit alo irubat.

³⁴Nemur ninye nena rubat te saabu, neitayu ilgiso lenye le saabu too laibung'ak le lelo loom, nemur lelo loom te saabu.

³⁵Neitayu ninye oliatua lo lkarasha loo usin pusi, o morijo, o mpilei, o kitani napuyiapui napiyaya; o lkerubi ooitobiruaki te nkarriyiano.

³⁶Ore te nkaraki ninye neitayu ing'apeta ong'uan o lerai nemuraa ninche te saabu; ore ilala oololo lenye naa ile saabu neiteleiki ninche ntoneta ong'uan e nkosholai.

³⁷Neitayu sii olkarasha le kutuk aji te nkaraki kutuk aji e ilo ng'obor, too nkarash naaripuno too usin pusi o morijo o mpilei o enkatani napuyiapui napiyaya, naikodo te siaai o ltidu;

³⁸o ng'apeta enyena pokira imiet te nebo ilala lenyena oololo, nemuraa enchumata enye o nkeek enye te saabu, kake ore ntoneta enye pokira imiet naa ino suyai.