Read MAASAI REVISED PROTESTANT Enaidurra 38 Bible Online

Enaidurra 38 - MAASAI REVISED PROTESTANT bible

Enaidurra 38

¹Neitayu ninye olperere lo lasar opejori too nkeek o lerai; naa intemat imiet apa enkadoro enye naa intemat imiet endapasho, naa kerisioro apa, naa intemat uni enkilepata.

²Neitaiki ninye imowuarak too lpijat lenyena pokira oong'uan; ore nena mowuarak enyena naa entoki nabo o ninye, nemur ninye to suyai.

³Neitayu ninye intokitin pooki o lperere lo lasar, imotioo o Ikijikoni[4] o mbakulini o nkurteta o nena tokitin nakutieki enkima; ore nena tokitin enyena pooki neitobiru ninye to suyai.

⁴Neitaiki ninye ilo perere lo lasar eng'esherrie, naitobiruno to suyai ti abori elutoroto enye, aitoritie olperere lo lasar ti abori.

⁵Nepik ninye ilgiso oong'uan ilpijat pokira oong'uan o lpijat le ina ng'esherrie o suyai pee eibung nena ong'uan oo lpijat le ina ng'esherrie o suyai pee eibung nena bokishi;

⁶neitobir ninye too imbokishi oo nkeek o lerai, nemur ninche to suyai.

⁷Neimie ninye nena bokishi atua lelo giso too murten e ilo perere lo lasar, pee enapieki ninche; neitobir too mbaoi aitugum.

⁸Neitayu ninye embakuli o suyai naitukuoreki o ina tonet enye o suyai, naitayioki too nking'ureta e nena kituaak apa naaisiaaisho te kutuk aji e ilo ng'obor le ntumo.

⁹Neitayu ninye endung'oroto, te nchoto e kopikop, ore nena kisiong'at e ndung'oroto naa kitani napuyiapui napiyaya;

¹⁰neeta ing'apeta enye tikitam naa tikitam nena toneta o suyai, kake ore ilala oololo le nena ng'apeta o nena keek enye naa ine enkosholai.

¹¹Ore te nkalo e moikuape naa intemat iip naa tikitam ing'apeta enye; ore ntoneta enye naa tikitam o suyai, kake ore ilala oololo loo ng'apeta, ore irubat enyena naa ine nkosholai.

¹²Ore te nkalo o loontoluo netii ilkarash ooisiong'a loo ntemat onom, o ng'apeta enye o neeitotonieki tomon; o neegum tomon, ore iyasheta loo ng'apeta o rubat enye naa ene nkosholai.

¹³Ore te dukuya te nkalo e nkilepunoto e nkolong, naa intemat onom.

¹⁴Ore ilkarash ooisiong'a te ntaloishi nabo e kishomi naa intemat tomon o imiet o ng'apeta uni o ntoneta uni.

¹⁵Ore enkae matua; tena aina o tenda aina te mbata e kishomi e ndung'oroto netii ilkarash ooisiong'a loo ntemat tomon o imiet te nebo ing'apeta uni o ntoneta uni.

¹⁶Ore lelo karash pooki ooisiong'a oomanita le ndung'oroto naa ile kitani napuyiapui napiyaya.

¹⁷Ore ntoneta oo ng'apeta naa ino suyai, kake ore ilala oololo loo ng'apeta o rubat enye naa ine nkosholai; ore enkimulumulata oo lukuny enye naa ine nkosholai ake sii; ore ing'apeta pooki eilo paashe neiruburubaki te nkosholai.

¹⁸Ore olkarasha le kishomi le ndung'oroto neikoduno te siaai o ltidu te usi pus o emorijoi o empile o kitani napuyiapui napiyaya intemat tikitam enkadoro naa intemat imiet endapasho eilep, enyaanyukie ilkarash ooisiong'a le ina dung'oroto.

¹⁹Ore ing'apeta enye naa ong'uan; ore ntoneta enye pokira ong'uan naa osuyai o lala oololo lenye le nkosholai o emurata oo lukuny enye o rubat enye e nkosholai.

²⁰Ore ncheito pooki e ilo ng'obor le Nkai o ne ina dung'oroto naamanaa naa ino suyai.

²¹Ena esiana oo masaa e ilo ng'obor le Nkai, ilo ng'obor le shakenisho, anaa enaikenaki teina kitanapata e Musa, te nkisiayiare oo Lawi ti abori erubaroto e Isamar olayioni le Aron ilo apolosani.

²²Besalel olayioni le Uri olayioni le Huri lo losho le Yuda, oitobira nena pooki naaitanapa Olaitoriani Musa.

²³Ore te nebo ninye netii Oholiab olayioni le Ahisamak lo losho le Dan, olaitobirunoni o laipirunoni naa olaikodoni too usin pusi o morijo o mpilei o kitani napuyiapui napiyaya.

²⁴Ore ina saabu apa nataasishoreki te siaai, te nchetare pooki e wueji sinyati teina saabu naishorutua iltung'ana, naa talanta tikitam ooudo o shekeli iip naapishana o tomoni uni te risioroto eshekeli e wueji sinyati.

²⁵Ore enkosholai naing'uaa olorere pooki apa ooikenaki, naa talanta iip nabo o imiet, te risioroto e shekeli e wueji sinyati.

²⁶Beka nabo te lukunya, aa taa (olpisiai le shekeli te risioroto e wueji sinyati) te pooki ng'ae apa oikenaki, ebaiki ilarin tikitam neilep, too ltung'ana iip ile o nkalifuni uni o iip imiet o onom.

²⁷Ore intalantani iip e nkosholai naa inaaitobirieki apa ntoneta e wueji sinyati o ntoneta e ilo karasha le ndung'oroto nera iip too ntalantani iip e ntalanta ake te ntonet.

²⁸Ore too shekeli enkalifu o iip naapishana o ntomoni naapishana o imiet neitobir ilala oololo te nkaraki ing'apeta nemur ilukuny enye neitobiraki ninche irubat.

²⁹Ore ilo suyai apa oishoruaki naa ntalantani ntomoni naapishana o shekeli inkalifuni are o iip ong'uan;

³⁰naa ninche eitobirie ninye ntoneta te nkaraki kutuk aji e ilo ng'obor le ntumo, olperere lo lasar lo suyai o eng'esherrie o suyai te nkaraki ninye o ntokitin pooki e ilo perere lo lasar;

³¹o ntoneta naamanita ina dung'oroto o ntoneta e kishomi e ina dung'oroto, o ncheito pooki o lng'obor le Nkai, o ncheito pooki naamanaa te dung'oroto.