Read MAASAI REVISED PROTESTANT Enaidurra 39 Bible Online

Enaidurra 39 - MAASAI REVISED PROTESTANT bible

Enaidurra 39

¹Ore too usin pusi o morijo o mpilei neitobir ninche te nkarriyiano ilkilani sidain, pee eisiaaishoreki te wueji sinyati; neitobir ninche lelo kilani oosinya te nkaraki Aron; anaa enaitanapa Olaitoriani Musa.

²Neitobiru ninye enkila dorrop e saabu, too usin pusi o morijo o mpilei o kitani napuyiapui napiyaya.

³Neidong ninche saabu aaitadapash neboru nkorin ronkeni pee easishoreki aaitobirie ina arasha sidai o nena tokitin pusi o morijo o mpilei o kitani napuyiapui napiyaya te nkarriyiano.

⁴Neitobir te nkaraki ina kila dorrop irubat oo ronyi, neitutumieki ninye ilcholo lenyena pokira are.

⁵Ore ina keene e mpolos naripuno te nkarriyiano neenieki ninye, pee eibung ninye, naa te nena tokitin eripuno o teina arriyiano, te saabu o usin pusi o morijo o mpilei o kitani napuyiapui napiyaya nashetuno anaa enaitanapa Olaitoriani Musa.

⁶Neirragie isoito barrikon ooji oniks neikodi te saabu, nepiki te nkarriyiano te nebo nkarn oo layiok le Israel.

⁷Nepik ninye ninche imatuan pokira are oo ronyi le ina kila dorrop, pee eaku isoito oodamishoreki te nkaraki ilayiok le Israel; anaa enaitanapa Olaitoriani Musa.

⁸Neitobir ninye enkila o lgoo te siaai e nkarriyiano, anaa ina kila dorrop te saabu o usin pusi o morijo o mpilei o kitani napuyiapui napiyaya.

⁹Nerisioro apa nkaloli pooki; ore apa ina kila o lgoo naa katitin are, entemata e ndap enkadoro naa entemata e ndap endapasho katitin are.

¹⁰Nepik atua ilkererin oong'uan loo soito. Olkereri loo ltoto barrikon o ltoto sikitok o ltoto onyori o lkereri le dukuya.

¹¹Ore olkereri liaare naa iltoto oonyori, iltoto pusi ooitiil o ltoto sidain ooji almasi;

¹²ore olkereri liokuni naa iltoto pilei, osoit oji agate iltoto oowang o ltoto sinteti;

¹³ore olkereri li ong'uan naa iltoto oonyori o iltoto barrikon, ooji oniks o ltoto pusi; neripakino apa kuna te saabu.

¹⁴Kulo apa iltoto tomon aare o nkarn enye anaa inkarn oo layiok lo Siraeli; netiu apa anaa ilmishiren, meeta ake olemeguetakino enkarna enye, too loshon pokira tomon aare.

¹⁵Neitobir ninche teina kila o lgoo ilpisia ooipila oikununo anaa nkeenta e saabu nasila.

¹⁶Nepik ilkererin aare le saabu o lgiso aare le saabu, nepik ilgiso ilpijat pokira aare le ina kila olgoo;

¹⁷nepik ninche nena keenta are e saabu atua lelo giso pokira aare ootii ilpijat pokira aare le ina kila o lgoo.

¹⁸Ore nkiting'ot pokira are e nena keenta neibung'ieki lelo kererin pokira aare; neiko neijia aaibung'ie te nkalo e dukuya ooronyi le ina kila dorrop.

¹⁹Neitoki ninche aaitobir ilgiso aare le saabu, nepik ninche ilcholo pokira aare le ina kila o lgoo te nkalo enye e atua te mbata e ina kila dorrop.

²⁰Neitayu ninche ilgiso aare le saabu, neibung'ie te nkalo e dukuya ti abori ironyi pokira aare le ina kila dorrop.

²¹Neitutum ina kila o lgoo too lgiso lenyena o lelo giso le nkila dorrop te nkeene pus, metaa kepetita ina keene e mpolos narripuno te nkarriyiano ina kila dorrop, pee melolong'u ake teina kila dorrop; anaa apa enaitanapa Olaitoriani Musa.

²²Neitoki sii aitobir olkila oodo li atua ina kila dorrop laa pus emua;

²³ore ine neimieki endukuya te ilo kila oodo neikununo anaa enenkila, neeta erripata namanaa pee mepolosa.

²⁴Ore erripata e abori e ilo kila oodo neripakini ilonyek oopurupurana too usin pusi, o morijo ompilei o kitani napuyiapui napiyaya.

²⁵Neitoki sii aitobir ntualan e saabu nasila, nepik nena tualan errishata oo lonyek oopurupurana teina manaroto e abori erripata o lkila;

²⁶entuala o long'u o entuala o long'u emanaa te ripata e abori olkila te nkaraki enkisiaayiare; anaa apa enaitanapa Olaitoriani Musa.

²⁷Neitoki sii aaitobir Ilkilani li oriong te nkarasha napiyaya te nkaraki Aron o layiok lenyena,

²⁸o ina arasha naenieki endukuya naitobiruno te kitani napuyiapui te nkarasha naripuno sidai o maupen e kitani napuyiapui o nena kilani e atua e kitani napuyiapui;

²⁹o enkeene e mpolos e kitani napuyiapui napiyaya naripa too usin pusi o morijo o mpilei naikodo te siaai o ltidu; anaa apa enaitanapa Olaitoriani Musa.

³⁰Neitoki ninche aaitobir enchili e saabu nasila e ilo marisian sinyati nesiraki ninye enkarna anaa enkarna nataguetakaki to lmishire, “Sinyati to Laitoriani.”

³¹Neeniki ninche ninye te nkeene pus, aakurraki shumata ina arasha naeniki endukuya; anaa enaitanapa Olaitoriani Musa.

³²Neidipayu esiaai pooki e ilo ng'obor le Nkai; o ilo ng'obor le ntumo, netaasa iltung'ana loo Siraeli anaa nena pooki naaitanapa Olaitoriani Musa; neaku etaasa ninche.

³³Neyau ninche ilo ng'obor enetii Musa, ilo ng'obor o ntokitin enyena pooki o lala lenyena oololo o rubat oo sunta enyena o loom lenyena o ng'apeta enyena o ntoneta enyena;

³⁴nena dapan naanota[5] oo lmeregeshi o noo nkineji naaitushurieki o lkarasha lo liatua oodung'ieki;

³⁵o sanduku le shakenisho o nkeek enyena o lorika lo lng'ur;

³⁶o emisa te nebo imasaa enyena pooki o emukate sinyati enkitoduaroto;

³⁷o enkibung'et oo ltaai le saabu nasila o ltaai lenyena te nebo ntukusi oo ltaai o ntokitin enye pooki o eilata oo ltaai;

³⁸o lperere lo lasar le saabu o eilata naputishoreki o enkorropil naisonkoyo o lkarasha oisiong'a le kutuk aji o lng'obor,

³⁹ilo perere lo lasar lo suyai o eng'esherrie enye o suyai o mbokishi o ntokitin enyena pooki; o ilo moti oitukuoreki o entonet enye;

⁴⁰lelo karash ooisiong'a le ndung'oroto o ng'apeta enyena o ntoneta enyena o lkarash le kishomi e ndung'oroto o nkeenta enyena o ncheito enyena; o masaa pooki te nkisiayiare e ilo ng'obor le Nkai; o ilo ng'obor le ntumo;

⁴¹lelo kilani ooitobiruno te nkisiayiare e wueji sinyati; lelo kilani oosinya le Aron olapolosani o Ilkilani loo layiok lenyena pee easisho anaa ilapolosak.

⁴²Anaa nena pooki apa naaitanapa Olaitoriani Musa esiaai pooki, naa ng'ura, etaasa Isiraeli anaa enaitanapishe Olaitoriani.

⁴³Neing'or Musa esiaai pooki, neaku etaasa ninche esiaai anaa enaitanapishe Olaitoriani. Nemayian Musa ninche.