Read MAASAI REVISED PROTESTANT Enaidurra 40 Bible Online

Enaidurra 40 - MAASAI REVISED PROTESTANT bible

Enaidurra 40

¹Nejoki Olaitoriani Musa,

²“Ore te nkolong e dukuya o lapa le dukuya tesheta iyie olng'obor le Nkai o ilo ng'obor le ntumo.

³Nipik atua ilo sanduku le shakenisho, nidung'oo ilo sanduku to lkarasha lo liatua.

⁴Nintijing'u emisa, nipik intokitin enyena aitobiraki; niyau nkitasheta oo ltaai nipik iltaai lenyena.

⁵Nipik olperere lo lasar le saabu o enkorropil dukuya ilo sanduku le shakenisho, nintoki apik enkarasha e kutuk aji o lng'obor le Nkai.

⁶Nipik olperere lo lasar opejori dukuya kutuk aji e ilo ng'obor le Nkai ilo ng'obor le ntumo,

⁷nipik ilo moti oitukuoreki erishata e ilo ng'obor le ntumo o lperere lo lasar, nipik enkare.

⁸Nintoki apik endung'oroto aitaman, niik olkarasha le kishomi e ndung'oroto.

⁹Nintoki aitayu eilata naputishoreki, nibukoki ilo ng'obor le Nkai o pooki toki natii atua, ninteng'el ninye o masaa enyena pooki; naa keaku ninye sinyati.

¹⁰Nintoki sii abukoki eilata olperere lo lasar opejori o ntokitin enyena pooki, ninteng'el ilo perere naa kesinyayu ilo perere oleng.

¹¹Nintoki sii abukoki eilata ilo moti oitukuoreki o eneitotonieki, aiteng'el ninye.

¹²Nintoki ariku Aron o layiok lenyena kutuk aji e ilo ng'obor le ntumo, nintuku ninche te nkare.

¹³Ninchopoki Aron ilkilani oosinya, nibukoki ninye eilata aput, nikinteng'elaki ninye, peyie aatum aisiaya anaa olapolosani.

¹⁴Niriku sii ilayiok lenyena ninchopoki ninche ilkilani,

¹⁵nibukoki ninche eilata aput, anaa enituputo menye lenye pee aatum aaisiaayia anaa ilapolosak; ore ina putoto embukokinoto enye e ilata neng'amari ninche metaa ilapolosak nkatitin pooki tiatua ishoritin enye pooki.”

¹⁶Neiko neijia Musa; te risioroto e nena pooki naaitanapa Olaitoriani ninye, neaku etaasa ninye.

¹⁷Ore to lapa le dukuya to lari li aare, te nkolong e dukuya o lapa, neitasheyieki olng'obor le Nkai.

¹⁸Neshet Musa olng'obor le manyisho e Nkai; neirragie ntoneta enyena, nepik irubat oo sunta enyena, nepik imbokishi enyena, neun ing'apeta enyena;

¹⁹neisalaash olkarasha te shumata o lng'obor le Nkai neitushur to lkarasha shumata olng'obor, anaa enaitanapa Olaitoriani Musa.

²⁰Neya ninye ina shakenisho nepik atua osanduku, nepik nkeek ilo sanduku nepik ilo orika lo lng'ur enchumata e ilo sanduku;

²¹neitoki ayau ninye osanduku atua ilo ng'obor le Nkai, nepik ilkarash le ndung'oroto nedung'oo ilo sanduku le shakenisho; anaa apa enaitanapa Olaitoriani Musa.

²²Nepik ninye emisa atua ilo ng'obor le ntumo, te nkalo e moikuape e ilo ng'obor le Nkai, ti oriong ilo karasha lo liatua,

²³nepik emukate sinyati aitobiraki e nchumata enye te dukuya Olaitoriani; anaa enaitanapa Olaitoriani Musa.

²⁴Nepik ninye nkitasheta oo ltaai atua ilo ng'obor le ntumo, enkipirakinoto eina misa te nkalo e kopikop e ilo ng'obor le Nkai.

²⁵Nepik iltaai dukuya Olaitoriani; anaa enaitanapa Olaitoriani Musa.

²⁶Nepik ninye olperere lo lasar le saabu atua ilo ng'obor le ntumo te dukuya ilo karasha lo liatua,

²⁷nepej teine enkorropil naisonkoyo te nchumta enye anaa enaitanapa Olaitoriani Musa.

²⁸Nepik ilkarash oodung'oo kutuk aji e ilo ng'obor le manyisho e Nkai.

²⁹Nepik ninye olperere lo lasar opejori kutuk aji eilo ng'obor le Nkai oilo ng'obor le ntumo, neitayu te nchumata enye olasar opejori o lasar le nkurma naidong'o; anaa apa enaitanapa Olaitoriani Musa.

³⁰Nepik ninye ilo moti oitukuoreki erishata e ilo ng'obor le ntumo o lperere lo lasar, nepik enkare naitukuoreki;

³¹naa ninye eisujie[6] Musa o Aron o layiok lenyena inkaik enye o nkejek enye;

³²te nepuo ninche atua olng'obor le ntumo naa te neetaniki ninche olperere lo lasar, neitukuo; anaa enaitanapa Olaitoriani Musa.

³³Neitasheyie Musa endung'oroto aitaman ilo ng'obor le Nkai o lperere lo lasar nepik ninye olkarasha kishomi e ina dung'oroto. Neaku eidipa Musa esiaai.

³⁴Neitoki enkatampoi aitoip ilo ng'obor le ntumo, neiput enkitoo o Laitoriani ina aji e Nkai.

³⁵Neitu eidim Musa atijing'a atua ilo ng'obor le ntumo, amu etobikie enkatampoi shumata ninye, neiput enkitoo o Laitoriani ilo ng'obor.

³⁶Ore tiatua ilotot enye pooki, enkata ake nayae ina atampoi aaiwuang'ie teilo ng'obor, nepuo iltung'ana loo Siraeli dukuya;

³⁷kake teneitu eiwang'ieki ina atampoi aailepie, neitu ninche epuo, ometabau ina olong naiwangieki aailepie.

³⁸Amu ore tiatua ilolot enye pooki netii enkatampoi o Laitoriani shumata ilo ng'obor dama, netii enkima atua ninye kewarie, te dukuya ina aji pooki e Israel.