Read MAASAI REVISED PROTESTANT Enaidurra 6 Bible Online

Enaidurra 6 - MAASAI REVISED PROTESTANT bible

Enaidurra 6

¹Kake etiaaka Olaitoriani Musa, “Idol taata iyie ina naitaas Farao; amu te nkaina nagol eisho ninche meshomo, ee te nkaina nagol earaa ninche meshomo aaing'uaa enkop enye.”

²Neitoki Enkai ajoki Musa, “Kara Olaitoriani.

³Aipang'aka apa Abraham o Isaak o Yakobo anaa Enkai Magilani, kake ore te nkarna ai naji Olaitoriani eitu aitayiolo ninche.

⁴Aitobirua sii osotua lai o ninche, pee aisho ninche enkop e Kanaan, enkop apa natobikie aa lomon.

⁵Ore ake eyia natoning'o osina loo ltung'ana loo Siraeli ooitaa Lmisiri isinkan natadamua naa ilo ning'o lai.

⁶Tiaaki naa iltung'ana loo Siraeli, ‘Kara nanu Olaitoriani, naa kayau nanu ntae aitung'uaa esinkaisho enye, naa kalaku nanu ntae te nkaina naitoriori o too nkiasin sapuki e nkiguana.

⁷Naya nanu ntae aitaa iltung'ana laainei, naaku nanu Enkai inyi, naa iyiolouu ntae aajo kara nanu Olaitoriani Enkai inyi, naa ninye nayaua ntae aitung'uaa abori ilolan le sinkaisho oo Lmisiri.

⁸Naa kayau nanu ntae atua enkop apa nainosa olmumai ajo kaisho Abraham o Isaak o Yakobo; kaisho nanu ntae metaa eninyi enkorrok. Kara nanu Olaitoriani.’ ”

⁹Neliki Musa iltung'ana loo Siraeli nena, kake eitu ninche ening Musa te nkaraki iltauja lenye oiting'o osiligi te sinkaisho enye eng'ogong'i.

¹⁰Nejoki Olaitoriani Musa,

¹¹“Shomo tijing'aki Farao olaiguanani le Misiri, tiaaki meishoo iltung'ana loo Siraeli meipang'a aapuo te nkop enye.”

¹²Nejoki Musa Olaitoriani, “Ng'ura, eitu ninche aaning nanu iltung'ana loo Siraeli; kaji naa eiko te naaning nanu Farao, nara oltung'ani leme arriyia te nkiroroto?”

¹³Kake eirorie Olaitoriani Musa o Aron, neisho ninche enkitanapata nayaki iltung'ana loo Siraeli o Farao olaiguanani le Misiri, pee eriku iltung'ana loo Siraeli aitung'uaa enkop e Misiri.

¹⁴Kuna ninche lukuny oo nkajijik oo loo menye: ilayiok le Ruben, olkikau le Israel; Hanok, Palu, Hesron o Karmi, kulo ninche ilmareita le Ruben.

¹⁵Ilayiok le Simion: Yemuel, Yamin, Ohad, Yakin, Sohar o Shaul, olayioni le nkitok oo Lkanaani; kulo ninche ilmareita le Simion.

¹⁶Kuna ninche nkarn oo layiok le Lawi te risioroto oo ishoritin enye: Gershon, Kohas o Merari, ore larin le nkishui e Lawi naa ilarin iip o tomoni uni o oopishana.

¹⁷Ilayiok le Geshom: Libni o Shimei, too lmareita lenye.

¹⁸Ilayiok le Kohas: Amram, Ishar, Hebron o Usiel, era ilarin le nkishui e Kohas iip o tomoni uni o okuni.

¹⁹Ilayiok le Merari: Mahali o Mushi. Kulo ninche ilmareita loo le Lawi te risioroto oo ishoritin enye.

²⁰Ewa Amram Yokobet ayam enkanashe e menye neiki ninye Aron o Musa, era ilarin le nkishui e Amram iip o tomoni uni o oopishana.

²¹Ilayiok le Ishar: Kora, Nefeg o Sichri.

²²O layiok le Usiel: Mishael, Elsafan o Sisri.

²³Neya Aron ayam Elisheba, entito e Aminadab naa enkanashe e Nashon; neiki ninye Nadab o Abihu o Eliesa te nebo Isamar.

²⁴Ore ilayiok le Kora naa Alir o Elkana te nebo Abiasaf; kulo ninche ilmareita loo Lkorati.

²⁵Neya Eliesa, olayioni le Aron, ayam entito nabo oo ntoyie e Putiel; neiki ninye Finihas. Kuna ninche lukuny oo nkajijik oo loo menye oo Lawi too lmareita lenye.

²⁶Kulo lelo, Aron o Musa, laa ninche etiaaka Olaitoriani, “Entayu iltung'ana loo Siraeli metupuku aaing'uaa enkop e Misiri too lororani lenye.”

²⁷Ninche apa ooirorie Farao olaiguanani le Misiri eimaki enkitayunoto oo ltung'ana loo Siraeli metung'uai Misiri, kulo lelo: Musa o Aron.

²⁸Ore teina olong neirorie Olaitoriani Musa te nkop e Misiri,

²⁹nejoki Olaitoriani Musa, “Kara nanu Olaitoriani; tiaaki Farao olaiguanani le Misiri nena pooki naatiaka.”

³⁰Nejoki Musa Olaitoriani, “mara nanu arriyia te nkiroroto, kaji naa eiko Farao te naaning?”