Read MAASAI REVISED PROTESTANT Enaidurra 7 Bible Online

Enaidurra 7 - MAASAI REVISED PROTESTANT bible

Enaidurra 7

¹Nejoki Olaitoriani Musa, “Toduaaki maaitotiu anaa Enkai te Farao neaku Aron olalashe lino oloiboni lino.

²Ilo iyie airo nena pooki naaitanapa; ore Aron olalashe lino nejoki Farao meishoo iltung'ana loo Siraeli meshomo aaing'uaa enkop enye.

³Kake kaitagol oltau le Farao, naa ore hoo tenaponaa nkitoduaat aainei o mbaa e nking'asia te nkop e Misiri,

⁴mikining iyie Farao; naitoki nanu aiteleiki enkaina ai shumata Misiri naitayu olorora lai, iltung'ana laainei lelo ayiok loo Siraeli, metupuku aaing'uaa Misiri too nkiasin sapuki e nkiguana.

⁵Neyiolou Ilmisiri aajo kara nanu Olaitoriani te naitorioo enkaina ai te shumata Misiri naitayu iltung'ana loo Siraeli metupuku tiatua ninche.”

⁶Neas Musa o Aron ina, neas anaa enaitanapa ninche Olaitoriani.

⁷Ore Musa naa oloo larin ntomoni isiet, ore Aron naa oloo larin ntomoni isiet o okuni ina kata pee eirorie ninche Farao.

⁸Nejoki Olaitoriani Musa o Aron,

⁹“Enchoo ake pee ejoki ntae Farao, ‘Entisipa ate te asata o lbulabuli,’ nijoki Aaron, ‘Tudumu ina ng'udi ino tanang'aki enkop te dukuya Farao, pee etum aibelekenyayu aata olasurai.’ ”

¹⁰Nelo Musa o Aron enetii Farao neas anaa enaitanapa Olaitoriani; nenang'aki Aron ina ng'udi enye enkop te dukuya Farao o sinkan lenyena, neaku ina ng'udi olasurai.

¹¹Neipot Farao ilang'eni lenyena o lasakutok; ore sii ninche, lelo ang'eni loo ltung'ana le Misiri, neas ina te sakutore enye.

¹²Amu etanang'aka pooki tung'ani eng'udi enye enkop, neaku ilasuriaa. Kake etoijoyie eng'udi e Aron ing'usidin enye.

¹³Neton ake eitagoloki oltau le Farao, nemening ninye ninche anaa enatejo Olaitoriani.

¹⁴Neitoki Olaitoriani ajoki Musa, “Aitagolo oltau le Farao, pee meisho ninye iltung'ana meshomo.

¹⁵Shomo enetii Farao tadekenya, ina kata elo enkare; taanyu ninye te ngilata olkeju niya iyie te nkaina ino ina ng'udi apa naibelekenye aaku olasurai.

¹⁶Nijoki iyie ninye, ‘Airriwua nanu Olaitoriani enitii, Enkai o Lbrania ejo: Nchoo iltung'ana laainei epuo, pee aatum aaisiaayia ti ong'ata; naa ng'ura, eton ake eitu iruk.’ ”

¹⁷Nji ejo Olaitoriani, “Tena iyie iyiolou ajo kara nanu Olaitoriani: ng'ura, ekaosh nanu enkare natii atua olkeju le Nail tena ng'udi naata te nkaina ai, naa keibelekenya aaku osarge.

¹⁸Neye isinkir ootii atua olkeju le Nail neng'uoyu ilo keju le Nail.”

¹⁹Nejoki Olaitoriani Musa, “Tiaaki Aron, ‘Tudumu eng'udi ino nintorioo enkaina ino ti oriong nkariak e Misiri, ti oriong ilkejek lenye, o erat lenye, o mugurri enye o lchorroi lenye, pooki loo nkariak, pee etum aataa osarge, neaku osarge te nkop pooki e Misiri too oketa oo nkeek o too oketa oo soito.’ ”

²⁰Neas Musa o Aron anaa enaitanapishe Olaitoriani; ore te dukuya Farao o te dukuya ilaisiaayiak lenyena, neilepie ninye eng'udi neosh ina are apa natii atua olkeju le Nail; ore ina are pooki apa natii atua olkeju le Nail neibelekenya aaku osarge.

²¹Neye isinkir pooki ootii atua olkeju le Nail; neng'uoyu olkeju le Nail o metaa meidim Ilmisiri aatook enkare naing'uaa olkeju le Nail; neaku osarge te nkop pooki e Misiri.

²²Kake etaasa sii ninche ilasakutok le Misiri ina te sakutore enye; neton ake egol oltau le Farao, nemening ninye ninche anaa enatejo Olaitoriani.

²³Neibelekenya Farao nelo atua enkaji enye, neitu duoo ninye epik ena oltau ashilaa.

²⁴Netur Ilmisiri pooki mbat o lkeju le Nail aaing'oru enkare naok, amu meidim aatook enkare e ilo keju le Nail.

²⁵Nelusoo nkolong'i naapishana anaa pee eosh Olaitoriani olkeju le Nail.