Read MAASAI REVISED PROTESTANT Enaidurra 9 Bible Online

Enaidurra 9 - MAASAI REVISED PROTESTANT bible

Enaidurra 9

¹Neitoki Olaitoriani ajoki Musa, “Shomo tijing'aki Farao, nijoki ninye, ‘Nji ejo Olaitoriani, Enkai oo Lbrania: Nchoo iltung'ana laainei epuo, peyie aatum aaisiaayia.

²Amu ti niany iyie incho ninche epuo niton aibok ninche,

³nedoiki intae enkaina o Laitoriani tolmeitai torrono o nkishu inyi naatii ong'ata o mbartan o sirkon o ntamesin o luaat oo nkishu o luaat oo ntare.

⁴Nerish Olaitoriani nkishu oo Siraeli o nkishu e Misiri, metaa meye hoo toki te nena pooki naara inoo ltung'ana loo Siraeli.’

⁵Nedung'u Olaitoriani enkata, ejo ‘Taisere eas Olaitoriani ena bae tiatua ena kop.’ ”

⁶Ore ake peyie ekenyu neas Olaitoriani ena bae; neye nkishu pooki oo Lmisiri, kake ore nkishu oo ltung'ana loo Siraeli eitu ninye eye nabo.

⁷Neirriwaa Farao olkilikuai, naa ng'ura, eitu ninye eye hoo nabo oo nkishu oo Siraeli. Kake eitagoloki oltau le Farao, neitu ninye eisho iltung'ana meshomo.

⁸Nejoki Olaitoriani Musa o Aron, “Entayutu mboreitin oo nkaik oo nkurruon to lkokuet, ninchosho Musa meisuai shumata te dukuya Farao.

⁹Naa keaku enterit napuyiapui te nkop pooki e Misiri, neaku Ildututa ooiwotiota aaku ilbaa to ltung'ani o te ng'ues te nkop pooki e Misiri.”

¹⁰Neitayu ninche nkurruon to lkokuet, neitashe te dukuya Farao, neisua Musa aipirie shumata, neaku Ildututa ooiwotiota ilbaa torrok te tung'ani o te ng'ues.

¹¹Neitu eidimu lelo ang'eni loo ltung'ana oitasheito te dukuya Musa te nkaraki Ildututa, amu etijing'a Ildututa lelo ang'eni loo ltung'ana o Lmisiri pooki.

¹²Kake eitagolo Olaitoriani oltau le Farao, neitu ninye ening ninche anaa enairorie Olaitoriani Musa.

¹³Neitoki Olaitoriani ajoki Musa, “Tayooki inyo tadekenya shomo ntasho te dukuya Farao nijoki ninye: ‘Nji ejo Olaitoriani, Enkai oo Lbrania: Nchoo iltung'ana laainei epuo, peyie aatum aaisiaayia nanu.

¹⁴Amu ore ena kata naa kairriwaki ilmeita laainei pooki meetu oltau lino, o laisiaayiak linono peyie itum atayiolo ajo metii likae laanyaanyukie te nkop pooki.

¹⁵Amu ore taata anaata atudumua enkaina ai naaosh iyie o ltung'ana linono to lmeitai naa anaata kiwuang'ieki aaitung'uaa enkop.

¹⁶Kake te nkaraki ena pee atapala inchu, peyie aaitodol iyie engolon ai neibalunyeki enkarna ai te nkop pooki.

¹⁷Eton ake igira ailepie kewan too ltung'ana laainei, nimincho ninche meshomo.

¹⁸Ng'ura ore taaisere tena saa naitasha enchan oo soito neitu aekata etumi te Misiri ebaiki apa peyie eiteruni o metabaiki taata.

¹⁹Ore naa taata irriwai ilkiliku meitushuri nkishu o pooki toki niatata too lng'oborri; amu kelotu enchan oo soito ashaiki pooki tung'ani o eng'ues pooki natii ong'ata nemeitokini aayau ang, naa keye.’ ”

²⁰Ore ilo oure ororei lo Laitoriani tiatua ilaisiaayiak le Farao neisikie isinkan lenyena o nkishu aaya atua nkajijik;

²¹kake ore ilo leitu eshilaa ororei lo Laitoriani neing'uaa isinkan lenyena o nkishu enyena ti ong'ata.

²²Nejoki Olaitoriani Musa, “Ntorioi enkaina ino ing'orie shumata, peyie ejing enchan oo soito enkop pooki e Misiri.”

²³Neitorioo Musa eng'udi enye aing'orie shumata; neirriu Olaitoriani enkikurrukur o enchan oo soito, nedou enkima alotu enkop. Neitasha Olaitoriani enchan oo soito te nkop e Misiri.

²⁴Nesha enchan oo soito o enkima naimerlel tiatua enchan oo soito, nesha enchan oo soito sapuk oleng, neitu ae kata ejing enkop e Misiri ebaiki apa pee eaku olosho.

²⁵Near enchan oo soito pooki toki natii ong'ata te nkop pooki e Misiri, aa iltung'ana o eng'uesi; near enchan oo soito pooki aitubului e ong'ata, negil pooki shani li ong'ata.

²⁶Tiatua enkop e Goshen ake, ine apa netii iltung'ana loo Siraeli metii enchan oo soito.

²⁷Neirriwaa Farao iltung'ana, meipoto Musa o Aron, nejoki ninche, “Ataasa nanu ing'ok tena rishata; Olaitoriani ninye olasipani ore nanu o ltung'ana laainei nikira ile nkarruoisho.

²⁸Entoomon Olaitoriani, amu eidipa iyiook ena kikurrukur o ena shan oo soito; ekaisho ntae enchom, nimintokiki aabik.”

²⁹Nejoki Musa ninye, “Ore ake peyie alo auluo ena ang, naitorioki Olaitoriani nkaik aainei, negira enkikurrukur nemeitoki atii enchan oo soito peyie itum atayiolo ajo eno Laitoriani enkop.

³⁰Kake ore iyie o laisiaayiak linono kayiolo nanu ajo eton ake miurere Olaitoriani Enkai.”

³¹(Eitarruoyioki enkaitubului naji enkatani o shairi, amu eo apa shairi neitapuka enkatani.

³²Kake eitu eitarruorri enkano amu eimutie te mbulunoto.)

³³Neing'uaa Musa Farao alo auluo ina ang, neitorioki Olaitoriani nkaik enyena, neishunye enkikurrukur o enchan oo soito neitu eitoki ashaiki oriong enkop.

³⁴Ore ake peyie edol Farao ajo eishunye enchan o enchan oo soito o enkikurrukur neigil aas eng'oki, neitagol oltau lenye, ninye o laisiaayiak lenyena.

³⁵Neaku eitagoloki oltau le Farao neitu eisho iltung'ana loo Siraeli meshomo; anaa enairoro Olaitoriani aimunye Musa.