Read MAASAI REVISED PROTESTANT Yoab 1 Bible Online

Yoab 1 - MAASAI REVISED PROTESTANT bible

Yoab 1

¹Eetae apa oltung'ani omanya enkop e Us, oji enkarna enye Yob. Naa ore apa ilo tung'ani nemeeta entioto naa oltung'ani oitashe too sipat, neure ninye Enkai oleng, neorunye aing'uaa intorrok.

²Eeta apa ninye ilayiok oopishana o ntoyie uni.

³Neeta apa ninye intare nkalifuni naapishana o ntamesin inkalifuni uni o lmong'i iip miet ooyietaa enchata emurt o sirkon lipong'a iip miet o sinkan kumok oleng, naa ore apa ele tung'ani meetae olkarsis olang too ltung'ana pooki lo loosaen.

⁴Ore apa ilayiok lenyena naa kepuo aaitayu isiruai too lmareita lenye, meeta ake olemeeta enkolong enye. Neipotu inkanashera enye pokira uni meetu aadaa te nebo neokisho te nebo.

⁵Ore ake pee elusoo inkolong'i o sirua, neinyototo Yob alo aitisiny ninche te dukuya Enkai. Naa keyooki tadekenya alo aitayu olasar opejori terishata oo layiok lenyena pooki; amu kejo apa Yob, “Ebaiki netaasa ilayiok laainei ing'ok, nedek Enkai too ltauja lenye.” Neas Yob ina anaake.

⁶Ore te nkolong nabo nepuonu ilmalaika le Nkai dukuya olaitoriani, nelotu sii ninye Sheitani te nebo ninche.

⁷Nejoki Olaitoriani “Kaji ing'uaa iyie?” Newaliki Sheitani Olaitoriani ajoki, “Aing'uaa ene o idie ti oriong e nkop, naing'uaa sii elototo ai e shumata o abori te shumata ninye.”

⁸Nejoki Olaitoriani Sheitani, “Itoduaa osinka lai Yob, olaa meetae likae laaijo ninye te enkop, oltung'ani lemeeta entioto neitashe too sipat, neure Enkai neorunye aing'uaa intorrok?”

⁹Ina pee ewaliki Sheitani Olaitoriani ajoki, “Keure Yob Enkai te mpesho?

¹⁰A'a keitu doi intaman ninye enkikarrata tenebo enkaji enye o pooki toki naata too nkaloli pooki? Itamayiana esiaai oo nkaik enyena, netoponari imasaa enyena aaiput ena kop.

¹¹Kake intorioi sii iyie enkaina ino tenakata iseyie nena pooki naata, naa aikidek ninye aitoriokino enkomom ino.”

¹²Nejoki Olaitoriani Sheitani, “Ore pooki naata ninye etii atua engolon ino; ninye ake enkorrok enye mintorioki enkaina ino.” Neaku eshomo Sheitani aing'uaa ine netii Olaitoriani.

¹³Eetae apa enkolong natotona ilayiok le Yob o ntoyie enyena aadaa neok enaisho oo sabibu te nkaji olalashe lenye botor;

¹⁴nelotu olkilikuai enetii Yob nejoki, “Ore duoo eturito ilmong'i enkurma nedaa isirkon te mbata enye;

¹⁵nedoiki iltung'ana le Sabea, nereu ninche pooki, near isinkan ootii te nepi olalem; neaku nanu ake oisikua peyie aalotu aliki.”

¹⁶Ore eton eirorita, nelotu likae nejo, “Etadowuo enkima e Nkai te shumata nepejoo intare te nebo isinkan, neidakie ninche; neaku nanu ake oisikua peyie aalotu aliki.”

¹⁷Ore eton eirorita ilo, nejing'u likae nejo, “Eitautuo Ilkaldayo iltimito okuni, nepuonu aarare iyiook aaikonyaa intamesin nereu, near isinkan te nepi olalem; neaku nanu ake oisikua peyie aalotu aliki.”

¹⁸Ore eton eirorita ilo, nelotu likae nejoki, “Ore ilayiok linono o ntoyie edaa duoo neok enaisho oo sabibu tenebo te nkaji olalashe lenye botor;

¹⁹nelotu osiwuo sapuk odung'u olpurkel, neosh ilpijat pokira oong'uan leina aji, nesulakino ilayiok linono o ntoyie inono, near metuata pooki, neaku nanu ake openy oisikua peyie aalotu aliki.”

²⁰Ina pee edumunye Yob, nepolos olkila lenye, nebarn elukunya enye, nebatatakino enkop aserem.

²¹Nejo ninye, atupukuo apa te nguset e yieyio maishopo naa karrinyo alo maishopo. Olaitoriani oishorua naa ninye onyaaka aya. Meisisi enkarna o Laitoriani.

²²Ore te kuna pooki neitu eas Yob eng'oki aashu eipotoki Enkai entorroni.