Read MAASAI REVISED PROTESTANT Yoab 11 Bible Online

Yoab 11 - MAASAI REVISED PROTESTANT bible

Yoab 11

¹Neitoki Sofar le Naamat awal, ajo:

²“Keishori irorei kumok meshomo eitu ewali, neishori oltung'ani oiro oleng esipata?

³Ijo doi keitigir enkiroroto ino e pesho iltung'ana, naa tininya kutuk ajo miata entioto, aimeeta obo likintukurru iyie?

⁴Amu ijoito, ‘Ore enkiteng'enare ai naa kesila, nara sinyati te dukuya nkonyek e Nkai.’

⁵Kake ore duoo tenaa keiro Enkai, nikiboloki ninye enkutuk enye,

⁶naa aikiliki ninye iyie inkisudorot e ng'eno nagut! Amu aikitok ening'unoto enye. Tayiolo nchere aikiririki Enkai nkuti nemeba anaa nkitarruorot inono.

⁷“Indim atayiolo intokitin naagut naaipirta Enkai? Indim atayiolo ineebaiki Olmagilani?

⁸Ekeilep oleng aalang keper, kainyoo indim ataasa? Negut alang enemeneng'a, kainyoo indim atayiolo?

⁹Ore entemet enye neado alang enkop, nelala alang enaiposha.

¹⁰Amaa teneimaa ninye enkop, neenaa olorere, neipotu adung'oki enkiguana aing'ae oidim aibooi ninye?

¹¹Amu keyiolo Enkai lelo tung'ana lemeeta tipat; amaa tenedol ninye entorroni, aimeshilaa ninye?

¹²Kake ore oltung'ani omoda naa ketum ening'unoto teneini olkurrarru le ntim aa oltung'ani.

¹³Tenintorioki oltau lino esipata, nilak inkaik inono aitorioki ninye.

¹⁴Tenetii entorroni enkaina ino, iwuang'ie intalamai, nimincho intorrok emany atua ilng'oborri linono.

¹⁵Nesipayu katukul ina kata nchere idumu enkomom ino metii entioto; iyaku oloserian, nimiureishoyu.

¹⁶Naa aikirikino osina lino; idamu ninye anaa inkariak naatulusoitie.

¹⁷Ore enkishon ino newang'u alang enaiwulie enkolong; ore enaimin enye netiu anaa entadekenya.

¹⁸Naa aitum empijan amu ketii osiligi; naa aikirripi nilo ayeng'iyeng'a te seriani.

¹⁹Irrag iyie airura, nemeetae likae likinture; naa keomonu ilkumok omom ino.

²⁰Kake ore inkonyek o ltorrono nemeitoki aadolisho. Ore enkoitoi pooki naisikie naa keimin te ninche, ore osiligi lenye neiting.”