Read MAASAI REVISED PROTESTANT Yoab 13 Bible Online

Yoab 13 - MAASAI REVISED PROTESTANT bible

Yoab 13

¹Toning'o, etoduaa enkong'u ai kuna pooki, etoning'o enkiok ai netoning'uo.

²Ore ina niyiolo nayiolo sii nanu, mara oti te yie.

³Kake ekairorie Olmagilani, nayieu naishankarrarre Enkai te mbae ai.

⁴Ore iyie, nikitumuraki te nturoto e lejare irara intae pooki ilabaak le pesho.

⁵Oi duoo tenaa intirring'a agira, naa keaku ina eng'eno ino nagut!

⁶Inining'u tena kata embae najo, nining'u olkiyioi oing'uaa enkutuk ai.

⁷Indim airoro emonkoi aipirie Enkai niro to losek te nkaraki ninye?

⁸Indim aitodolu olkep te ninye? Indim atoomonu ororei te ninye?

⁹Kesipa aisidai te iyie te nikituru ninye iyie aing'oru? Aashu aindim ateleja ninye, anaa enalej oltung'ani olikae?

¹⁰Aikisikong ninye iyie katukul tenaa intodolu olkep too nkisudorot.

¹¹Amaa enkitoo enye aimikinture iyie, o engoro enye tinikibatatakino iyie?

¹²Ore indung'eta inono e rashe kumok netiu anaa inkuruon, ore enchankar ino netiu anaa enterit.

¹³“Tigirayu pee kincho airo, naa inchoo aatum pooki naaba anaa inaatum.

¹⁴Ekapik enkishui ai batisho, nchoo aiwuang'ie enkishui ai.

¹⁵Ng'ura ajo kaar ninye matua, aaiting'o osiligi kake kamitu inkoitoi aainei te dukuya enkomom enye.

¹⁶Ena naaku enjeunoto ai, nchere melotu oltung'ani lemeeta Enkai dukuya ninye.

¹⁷Inining'u tukurraki irorei laainei, nincho embae nalimu aibalie ejing inkiyiaa inono.

¹⁸Toning'o, aitobira enkiguana ai; kayiolo ajo kaata esipata.

¹⁹Aing'ae ilo laalotu akeshare nanu? Amu ina kata agira nanu naye.

²⁰Intokitin are ake inchooki nanu, nemaitoki aisudoo kewan te nkomom ino:

²¹iwuang'ie enkaina ino intalamai te nanu, nimincho olkirutoto lino aaiture nanu.

²²Nimpotisho iyie, naawaliki nanu, oi inchooki nanu mairoro, nikiwaliki iyie nanu.

²³Kaja esiana oo ntorrok aainei o ng'ok aainei? Intayioloki nanu intorrok aainei o eng'oki ai.

²⁴Kainyoo peyie isudoo enkomom ino, nikinkenaa nanu anaa olmang'atinta lino?

²⁵Isujaa iyie embeneyio nayaita osiwuo, nimir errarrati natoyio?

²⁶Amu ing'ero iyie mbaa e mion te nkaraki nanu, nikintijing nanu entorroni e kitisho ai.

²⁷Itipika nkejek aainei ilpisia, ning'or inkoitoi aainei pooki, itipika ienat ndapi oo nkejek aainei.

²⁸Keidaaya tung'ani anaa entoki natong'ua anaa enkila nainosa olasai.”