Read MAASAI REVISED PROTESTANT Yoab 14 Bible Online

Yoab 14 - MAASAI REVISED PROTESTANT bible

Yoab 14

¹Ore oltung'ani otoiwuo enkitok naa oloo nkolong'i kuti, nebore enyamali.

²Kepuku abulu anaa entapukai, netoyu, nelo anaa oloip, nemebikoo.

³Naa ibol inkonyek inono aboloki olaaijo ilo, niyau ninye atua enkiguana ino.

⁴Aing'ae oidim aitayu entoki nemeiduruk tiatua enaiduruk?

⁵Ore amu etuutuaki aaibalie inkolong'i enyena, ore esiana oo lapaitin lenyena niata iyie, nituutua ineebaiki metaa meidim aida.

⁶Mintoki aing'or ninye, tapala ninye inchoo ninye eshipakino enkishui enye nagol, tenaa keidim.

⁷Keeta olchani otudung'oki osiligi, tenedung'i, naa keitoki abulu, nemetoyu intapuka enyena.

⁸Ore hoo tenemusanu intona enyena tiatua enkop, netoyu aye olchani lenye tiatua enkop.

⁹Kake ore ake peyie etum enkiti are nepok; nepuku ilng'osil anaa enkiti aitubului.

¹⁰Kake keye oltung'ani, neirragieki aaitadoyio tiabori; neyang oltung'ani enabayie, naa koree ninye?

¹¹Ore anaa enaish inkariak te naiposha, neish oreyiet netoyu,

¹²neijia etiu oltung'ani eirrag nemeitoki adumunye; o metaa meetae keper, meitoki adumunye, aashu edumuni aaitung'uaa injo enyena.

¹³Oi naaji tenaa aikisudoo nanu te nemeneng'a, nikisudoo nanu ometogiroi engoro ino, metaa aikigelaki nanu erishata niyiolo, nikidamu nanu!

¹⁴Amaa teneye oltung'ani keitoki apiu aigil? Ore inkolong'i aainei pooki e siaai ai naa kaanyu. Ometabau elakunoto ai.

¹⁵Impotisho iyie naa kaairuk nanu iyie, iyieu oleng esiaai oo nkaik inono.

¹⁶Amu ina kata inken iroruat aainei, nimintoki aing'or ing'ok aainei;

¹⁷ore intorrok aainei neripari aaikenoo to lbene, naa intemoo aimulumulaa ing'ok aainei.

¹⁸“Kake kesulunye ildoinyo nerrarra aaishunye, neitayuni indapidapo too wuejitin enye.

¹⁹Neoroo inkariak isoito, neoroo oloirrag le nkare enterit, metaa iishie iyie osiligi le tung'ani.

²⁰Itimira oltung'ani nitii shumata ninye ntarasi. Itumuguta enkomom enye nireu ninye aitalamaa.

²¹Kepuonu ilayiok lenyena aayanyit, nemeyiolo ninye; eyawuaki ninche abori, neitu emusu aayiolou.

²²Emion ake osesen lenye ening'ito, naa kewan ake eishiraki.”