Read MAASAI REVISED PROTESTANT Yoab 15 Bible Online

Yoab 15 - MAASAI REVISED PROTESTANT bible

Yoab 15

¹Neitoki Elifas le Tema awal ajo:

²“Amaa oltung'ani ng'en, keishiaakino newal te ng'eno e nkijape, neiput kewan te nkijape o loosaen?

³Keishankarra ninye te nkiroroto nemeeta tipat, aashu too rorei lemeidim aitaasa ae sidai?

⁴Kake igira aitalamaa ina uriata e Nkai, nimbooyo enkibirribirrata te dukuya Enkai.

⁵Amu ing'ok inono naaiteng'en enkutuk ino, nigelu olng'ejep le lejare.

⁶Enkutuk ino makewan nikidung'oki iyie enkiguana, mme nanu, nikinchakenoki iyie enkutuk ino makewan.

⁷“Aiyie doi apa oltung'ani le dukuya otoiwuoki? Aashu aikiyawuaki apa eton meetae ildoinyo?

⁸Inining'ishe iyie tiatua enkiguana e Nkai? Naa amaa eng'eno nagut intodorrop aiririki enkorrok ino ake?

⁹Kainyoo doi iyiolo iyie nimikiyiolo iyiook? Kainyoo doi ining'u iyie nimikining'u te iyiook?

¹⁰Eboitare iyiook lelo ooibor lukuny, tenebo lelo kituaak te iyiook. Ilaa aikituaak ninche te papaai lino:

¹¹Amaa enkilejilej e Nkai aikiti te iyie? Oo ilo rorei likirorie iyie te mborron?

¹²Kainyoo peyie incho oltau lino mikitanapa aitalamaa, naa kainyoo peyie incho inkonyek inono eirriap?

¹³Nimbelekeny oltau lino aarare Enkai, nincho irorei ootiu neijia epuku te nkutuk ino?

¹⁴Kainyoo doi oltung'ani metaa keidim ataa olemeiduruk? Aashu ilo otoiwuo enkitok, metaa keidim ataa supat?

¹⁵Toning'o, mepik Enkai osiligi isinyat lenyena, nemesinya keper too nkonyek enyena;

¹⁶kebaa eng'oroto e ilo lo lminong, naa arruoni, oltung'ani ook intorrok anaa enkare!

¹⁷“Ekaaitodol nanu iyie, inining'oki nanu; ore ina natoduaa naa kaibalunye.

¹⁸(Ina natolimutuo iltung'ana le ng'eno nagut, neitu eisudoo iloomenye,

¹⁹ilo laa ninye ake eishooki ina kop, nemeetae olomoni oimayie ninche.)

²⁰Ketoyu oltung'ani torrono te mion enye too nkolong'i enyena pooki, tiatua lelo arin pooki ooirragieki, te nkaraki ilo lemeeta olng'ur.

²¹Etii inkiyiaa enyena iltoiloishi ooitureisho; ore etudupe, nelotu oloidaikie shumata ninye.

²²Meiruk ninye ajo keitoki arrinyo aing'uaa enaimin. Naa olalem elo ninye aitingoki.

²³Elimana ninye te nkop pooki eing'oru endaa ejo, ‘Kaji etii?’ Keyiolo ajo etabawua enkolong e naimin, etabaikia ninye;

²⁴ore osina o emion neiture ninye; nebaiki ninye anaa olaiguanani otanape pee elo olarrabal.

²⁵Amu eitorioyie ninye enkaina enye aarare Enkai, neyaki esarkionisho ilo Magilani.

²⁶Ekuetiki ninye te ngolong'akinoto aarare ninye, neibung elong'o enye nairrusha o lwuasa.

²⁷Amu eteijia enkomom enye te mpiron neirrag enkurriny too lairakuj lenyena.

²⁸Netamanya inkanas mijoonto, atua nkajijik nememanya, apa naatudung'okoki enkiguana metaa osototi loo suut;

²⁹meaku ninye karsis, nemebikoo karsisisho enye nemetum intona tiatua enkop.

³⁰Meilany ninye enaimin, ore olang'at le nkima neitoi imbenek enyena ore enkipilipil enye naa kekutaa osiwuo.

³¹Mincho ninye epik osiligi lenye entoki nemeetae, alej kewan; amu ore entoki nemeetae naa keaku elaakinoto enye.

³²Ekelaki te lulung'ata eng'or enkata enye, ore olng'osila lenye nemenyoriju.

³³Keipiripiroo ninye lelo sabibu lenyena leitu eku, anaa ilo shani lenye, neiturraa adung'oo esidano enye anaa oloirien.

³⁴Amu ore encholiek e lelo lemeeta Enkai naa koolupi. Naa keidaikie enkima ilo ng'obor lo loropisho.

³⁵Enutayu ninche too ntorrok, neiu ing'ok ore oltau lenye neitobiru elejare.”