Read MAASAI REVISED PROTESTANT Yoab 16 Bible Online

Yoab 16 - MAASAI REVISED PROTESTANT bible

Yoab 16

¹Ina peyie ewal Yob ajo:

²“Atoning'o nanu intokitin kumok naatiu neijia; irara pooki ilaitagolok te nkata o sina.

³Amaa irorei lemeata tipat keeta enkiting'oto? Aashu kainyoo doi nikintagoro peyie iwalu?

⁴Ekaidim sii nanu airoro anaa yie, tenaa naaji itii erishata ai anaata aitulus irorei tenebo pee aagilunore naigusugusie elukunya ai te iyie.

⁵Ekaaitagol iyie te nkutuk ai, ore enkitagoloto e nkiroroto ai neiwuang'ie emion ino.

⁶“Tenairo nemeish emion ai, naa amaa tenang'iri, kebaa emion naaing'uaa nanu?

⁷Kesipa taata aatalepuo Enkai tukul; eitomijoono ninye encholiek ai pooki.

⁸Kimbung'a iyie nanu akurraki; ira iyie olmang'atinta lai. Kara nanu endapana o loik neibung'a iltung'ana ina pee eishakenoki entorroni ai.

⁹Aatopolosa ninye te ng'oro enye, naaibayu nanu; etoonyo ninye ilala te nkaraki nanu. Ore olmang'atinta lai naakurraki inkonyek enyena.

¹⁰Aatusukenya iltung'ana nanu too nkutukie enye, aatoosho ninche nanu eseder, eiturrurrote pooki peyie aarare nanu.

¹¹Aaishooyie nanu Enkai aitarasaki lelo lemeure Enkai, naanang'aki nanu nkaik e lelo arruok.

¹²Atonita apa te seriani, kake aaibung'a ninye nanu olgos, naadung'udung aitaa ndung'ot. Aaitasheyie ninye nanu aitaa enkipirta enye.

¹³Aamanita nanu imbaa enyena naatang'oruo te pooki shoto, etang'oro apolol ilairakuj laainei, nemepal, nebukoki olodua lai enkop.

¹⁴Aarasaki ninye naapik ilbaa katitin kumok naakuetiki ninye nanu anaa olmurrani.

¹⁵Atiripaka ilkuniyiani osesen lai, neirragie engolon ai tiatua enterit.

¹⁶Etodoro enkomom ai te nkishirata, netiu inkonito aainei oo nkonyek anaa enaimin nagut;

¹⁷ore hoo nemetii olarrabal inkaik aainei, naa kesila enkomono ai.

¹⁸Na kop, minukaa osarge lai, nimincho enkishirata ai etum eneyeng'iyeng'are.

¹⁹Ore doi ninye tena kata etii olchakeni lai keper, peyie eitashe terishata ai.

²⁰Kaasurdaany ilchoreta laainei; ore inkonyek aainei nebukoki Enkai ilkiyio.

²¹Metaa ekeitasheyie esipata e tung'ani o e Nkai, anaa ina oltung'ani tenebo ole latia enye.

²²Amu ore eetuo ilkuti arin, ekalo aim enkoitoi nemaitoki ashukunye.