Read MAASAI REVISED PROTESTANT Yoab 17 Bible Online

Yoab 17 - MAASAI REVISED PROTESTANT bible

Yoab 17

¹“Etigile oltau lai, eishunye inkolong'i aainei, etataana enkurare te nanu.

²Kesipa etii tenebo nanu ilasukenyak, ore inkonyek aainei netii esukeny enye.

³Irragie elakunoto ai te kewan ino; kalo likae oidim aishoru elakunoto te nkaraki nanu.

⁴Ore amu inkeno indamunot enye peyie mening'u, mincho naa ninche meisula.

⁵Ore ilo okaldaa ilchoreta lenyena too mpisai, pee etum erubata oo masaa enye, naa kemodoku nkera enyena.

⁶Aaitaa ninye nanu entoki naimakini too loreren; nara obo le lelo oonotaki iltung'ana.

⁷Eiliilaitie inkonyek aainei te nkaraki olkiyioi lo sina, ore irubat o sesen lai netiu anaa oloip.

⁸Ore lelo ooitashe too sipat neing'asia tena, ore ilo lemeeta entioto neitagor kewan te lelo lemeure Enkai.

⁹Kake ore isupati nekurraki enkoitoi enye, ore ilo oata inkaik nemeiduruk nebulaa agolu.

¹⁰Kake ore intae enyaaki wootu intae pooki, nematum nanu oltung'ani ng'en te ntae pooki.

¹¹Etulusoitie inkolong'i aainei, ore nkitobirat aainei netudung'oyioki aaituraa, o nena yieunot o ltau lai.

¹²Eitaa ninche enaimin endama; ‘Ore ewang'an, anaa enajo ninche, netaaniki enaimin.’

¹³Tenaing'oru enemeneng'a aitaa enkaji ai, tenaisalaash olorika lai te naimin,

¹⁴Tenajoki enkurare, ‘Ira iyie papa lai’ najoki ilo kurto, ‘Ira yieyio lai,’ aashu ‘Enkanashe ai,’

¹⁵koree naa teine osiligi lai? Aing'ae odol osiligi lai?

¹⁶Kelo ninye atua ine netii kutukaji e nemeneng'a? Amaa aikidoyio pokira aapuo atua enterit?”