Read MAASAI REVISED PROTESTANT Yoab 18 Bible Online

Yoab 18 - MAASAI REVISED PROTESTANT bible

Yoab 18

¹Neitoki Bildad le Shua awal, ejo:

²Ke nkata nabaa iyie ing'oru irorei? Tujurru, ina peyie kiro.

³Kainyoo peyie eikenari iyiook anaa nkishu? Kainyoo peyie kira iyiook lmoda te dukuya iyie?

⁴Iyie ilo opolos kewan te ngoro ino, keing'uari enkop te nkaraki iyie, aashu eiwuang'ieki endapidapoi aaitung'uaa ewueji enye?

⁵Ee, ore ewang'an oo ltorrok netaaraki. Ore enkiyupyup e nkima enye nemeitoki awang.

⁶Ore ewang'an naa kemisimisu to lng'obor lenye, ore oltaa otii shumata enye neari.

⁷Ore iroruat enyena naagol neitodorropi, ore inkoitoi enyena nenang'aa ninye.

⁸Amu etanang'akaki atua orreshet too nkejek enyena, nelo te nkoitoi nebatatakino.

⁹Keibung orreshet entutunyo enye, neirrag orreshet oibung ninye.

¹⁰Keisudoro olgosoi lenye tiatua enkop, orreshet otii enkoitoi enye.

¹¹Emanita ninye inaaitureisho te pooki alole, nemir ninye too nkejek enyena.

¹²Ore engolon enye apa, netaa taata olameyu te ninye, netinyikaka ninye engolikinoto pee error.

¹³Ore te nkaraki emuoyian netumute osesen lenye ore olkikau le keeya netumuta irubat o sesen lenye.

¹⁴Etopolosaki ninye teilo ng'obor apa oisilig neyauni ninye aayaki ilo aiguanani oitureisho.

¹⁵Netii olng'obor lenye ina neme enenye; nebore enkima aidapashakino emanyisho enye pooki.

¹⁶Etoito intona enyena tiabori netoyu imbenek enyena too lukuny.

¹⁷Neish endamunoto enye te nkop, nemeeta enkarna too nkoitoi naalala.

¹⁸Eturrumoyioki ninye te wang'an aanang'aki enaimin, nerewi aaitung'uaa enkop.

¹⁹Meeta ninye eishoi aashu iishoritin tiatua olorere, nemeetae oloishu teine apa nemanya.

²⁰Ore lelo oomanya oloontoluo, neing'asiate teina olong enye, neibung ninche olkirutoto lo loosaen.

²¹Kesipa imanyishoritin kuna e lelo lemeure Enkai, ewueji ene eilo lemeyiolo Enkai.