Read MAASAI REVISED PROTESTANT Yoab 19 Bible Online

Yoab 19 - MAASAI REVISED PROTESTANT bible

Yoab 19

¹Neitoki Yob awal ajo:

²“Ke nkata nabaa kisilisil iyie nanu, nikigiligil aitaa ndung'ot too rorei?

³Kindipa atipika nanu enkurruna kuna katitin tomon, aimidol iyie enkurruna tenikinyal nanu?

⁴Naa tenaa kesipa doi inchere aitarruoyie, etii enkinyala ai atua enkorrok ai.

⁵Tenesipa tukul ajo irup kewan kiarare nanu, nintaa emborron ai, enchankar nikiarare nanu;

⁶tayiolo naa ajo aatipika Enkai nanu atua entorroni, naaitamana nanu orreshet lenye.

⁷Toduaa, aishira abuaku ajo ‘Olarrabal!’ Kake eitu aawalikini; aipotishe to ltoilo sapuk, kake metii esipata.

⁸Etipika Enkai esuntai enkoitoi ai, metaa maidim aima, netipika enaimin inkoitoi aainei.

⁹Aatooruo ninye nanu enkitoo ai, neya te nanu enkopiyia e nkitoo te ndukuya ai.

¹⁰Aagiligil nanu too nkaloli pooki, netaa aisha, neitayio ninye osiligi lenye anaa olchani.

¹¹Einuaa ninye engoro enye napi peyie aarare, naaikenaa nanu aitaa olmang'atinta lenye.

¹²Eirriwua ninye iltimito lenyena maataarare netur ninche iloong'elu, naarresh ninche eman olng'obor lai.

¹³Eitalamayie ninye iltung'ana maatung'uai ataa olomoni te lelo pooki laayiolo nanu.

¹⁴Aatung'uaitie iltung'ana laainei le sotua tenebo ilchoreta laainei.

¹⁵Ore ilomon ootii enkaji ai nemaadamu ninche nanu; ore inkaisiaayiak aainei naaikenaa anaa olomoni; ataa nanu olomoni too nkonyek enye.

¹⁶Aipoto nanu osinka lai, kake eitu ninye aawaliki; meeta nchere pee masai nanu ninye te nkutuk ai.

¹⁷Ataa kereek te nkitok ai, naatonyimo ilayiok lang'arie kina.

¹⁸Ore ninye nkera kutiti naatemenaitie nanu, ore tenainyototo neimaki imbaa olmena te nanu.

¹⁹Ore ilchoreta laainei likinyorra oleng naaing'or ninche to lmena, ore lelo apa lanyor naaibelekenyakinote aarare.

²⁰Ore osesen lai netimite aaku iloik ake o lchoni, naa te mpesho nanu ailanya keeya aimisho.

²¹Eng'urrieki nanu, eng'urrieki nanu, intae lo shoreta laainei, amu aatoshoroyie nanu enkaina e Nkai!

²²Kainyoo iyie pee kisujaa nanu anaa Enkai? Kainyoo iyie pee mikindip enkisilisiloto o sesen lai?

²³Oi naaji tenaa keigeroki te mbuku! Nedamuni pooki aiger te mbuku.

²⁴Naa tenaa keigeroki te nkalamu e sekenkei naata esipil! Pee eguetakini endapidapoi ntarasi!

²⁵Amu kayiolo ajo eishu olalakunoni lai, naa ore te siadi neitashe ti oriong enkop;

²⁶neaku ore eidipaki aatumut osesen lai, naitoki ake adol Enkai to sesen lai,

²⁷ilo ladol etii enkalo ai, naa kadol too nkonyek aainei; neme too ne likae. Eiterre oltau lai tiatua nanu!

²⁸Naa tinijo, ‘Kaji kinko tinikisuj ninye!’ Naa ‘Ore esipata embae netumi tiatua ninye,’

²⁹turia ilo alem, amu keyau engoro napi enkitamioto to lalem, peyie itum atayiolo inchere keetae endung'okinoto enkiguana.”