Read MAASAI REVISED PROTESTANT Yoab 20 Bible Online

Yoab 20 - MAASAI REVISED PROTESTANT bible

Yoab 20

¹Neitoki Sofar le Naamat awal ajo,

²“Metaa aatawalikitia indamunot aainei nanu, te nkaraki nakuetiki imbaa te nkewan ai.

³Atonig'o enkisikong'ata ino aainyal nanu, ore te ning'unoto ai naawaliki nanu enkiyang'et.

⁴Keitu apa iyiolou ena te musano, anaa apa peyie epiki tung'ani oriong e nkop,

⁵nchere ore enkisulata eilo torrono naa dorrop, ore enchipai e ilo lemeeta Enkai naa enkiti kata?

⁶Ore hoo duoo neilep anaa ildoinyo aabaiki keper enkadori enye, nebaiki elukunya enye inkatampo;

⁷keish ninye intarasi anaa inkik enyena; ore lelo ootoduaa ninye naa kejo, ‘Koree doi ninye?’

⁸Ekelo ninye alusoo anaa enkidetidet, nemetumoyu; kearari ninye aitalamaa anaa enduaata e nkewarie.

⁹Ore nena onyek apa naatoduaa ninye, nemeitoki aekata aaigil aadol, nemeigil aekata ewueji enye adol ninye.

¹⁰Ore nkera enyena neing'oru omom teilo aisinani, ore inkaik enyena nerriny aaishooyo enkarsisisho enye.

¹¹Ore iloik lenyena nebore engolon e kitisho, kake keirrag ninche tenebo ninye tiatua enterit.

¹²Ore hoo duooo nemelok intorrok te nkutuk enye, ore hoo duoo neisudoo ninye tiabori olng'ejep lenye,

¹³ore hoo nemeyieu ninye nepal, nemuk ninye te nkutuk enye,

¹⁴kake keibelekenyi ake aaitaduar endaa enye te nkoshoke, keduaru naleng anaa enduaran e pooki sayiet.

¹⁵Keijoo ninye enkarsisisho neitoki alopu; kenang'aa ninche Enkai te nkoshoke enye.

¹⁶Keibibi ninye esayiet, olng'ejep le nturbubua olo aar ninye.

¹⁷Melo ninye aing'or lelo kejek, nena shorroi naaruko inaishi o kule.

¹⁸Kerriny ninye aishooyo ilng'anayio le siaai enye, nemeitoki aekata ninye aijoo, ore dupoto e biashara enye nemeshipakino ninye,

¹⁹amu etupurda ninye neing'uaa lelo aisinak, eibung'a ninye aikonyaa enkaji neitu eshet.

²⁰Ore amu meeta olorok lenye enkiyagata, meleku ninye ae toki hoo nabo nashipakino.

²¹Meetae entoki natelekua eidipa ninye atadaayu neaku mebikoo karsisisho enye.

²²Ore enkiputakinoto e raposhoi enye, naa osina, kelotu engolon pooki o sina shumata ninye.

²³Neiput enkoshoke enye aitaraposh, keirriu Enkai engoro enye napi shumata ninye neitashaiki shumata ninye anaa endaa.

²⁴Keisik ninye aing'uaa emasaai o larrabal e sekenkei neng'or ninye embae o suyai neipang.

²⁵Etushutuaki ina bae nepuku to sesen lenye, ore ine wueji neimerlel neipang'u to lodua lenye, neiput ninye enkuretisho.

²⁶Ore ilchumat lenyena pooki nepuo aajing enaimin nagut, enkima neitu einoki nalo amut ninye, ore ina natelekua to lng'obor lenye nemuti.

²⁷Neibalunye keper ing'ok enyena pooki, nedumakino enkop aarare ninye.

²⁸Ore imasaa e nkaji enye nenapi aaya neing'irtitori aaya teina olong e ngoro napi e Nkai.

²⁹Ena erubata o ltung'ani torrono naing'uaa Enkai, enjung'ore naibalakinye ninye Enkai.”