Read MAASAI REVISED PROTESTANT Yoab 21 Bible Online

Yoab 21 - MAASAI REVISED PROTESTANT bible

Yoab 21

¹Neitoki Yob awal ajo:

²Inining'o tisipu irorei laainei, nincho ina eaku enkitagoloto ino.

³Ting'iria nchooki nanu mairoro, ore peyie aidip airoro, nikisukeny.

⁴Amaa nanu, ke ltung'ana aing'unyung'unyaki? Kainyoo peyie maidim ating'iria?

⁵Ing'uraki nanu, nimimputukuny, nipik enkaina ino enkutuk ino.

⁶Ore tenelo nadamu naing'asia oleng, neiput olokirikiri osesen lai.

⁷Kainyoo peyie eishu lelo ooas intorrok, nebaiki moruao, nebul aaku magil te ngolon?

⁸Etubula inkera enye te dukuya ninche, netodua ninche iishoritin enye too nkonyek enye.

⁹Ore inkajijik enye neserian nemetii enkuretisho, nemeetae eng'udi Enkai natii shumata ninche.

¹⁰Kedumu iloing'ok lenye nkishu nemedung; eisho nkishu enye, nemeye ilasho.

¹¹Eiguran nkera enye anaa lkuoo le kerra, neiguran nkera enye aaipid.

¹²Eranyisho ninche neosh entampuri, olwulul loo usin, neshipa tenening oltoilo le ndule.

¹³Kebikoo te nkishui oo nkolong'i enye eeta enkarsisisho nalulung'a, nedoyio aapuo enemeneng'a te seriani.

¹⁴Kejoki ninche Enkai, “Shomo tung'uai iyiook! Miking'uar ina ng'eno oo nkoitoi inono.

¹⁵Aing'ae doi ilo Magilani, onarikino nikisiaai ninye?” Naa kainyoo kitum tinikiomon ninye?

¹⁶Toduaa!, Aimetii inkaik enye ina dupoto? Ore enkiguana oo larruok naalakuaniki nanu.

¹⁷“Keari aekata oltaa le ilo torrono? Pee edoiki entaboi enye ninche? Neitame Enkai ninche te ngoro enye.

¹⁸Ketiu ninche anaa olkujita otoyio to lkutati, netiu anaa isuut naakutaa osiwuo?

¹⁹Ijo iyie, ‘Etushuma Enkai ing'ok enye aitaany ilayiok lenyena.’ Inchoo ninye elaaki ninche peyie etum aatayiolo.

²⁰Inchoo inkonyek enye metoduaa enkidaata enye, naa nchoo ninche metooko ina goro e ilo Magilani.

²¹Amu kainyoo eshilaa ninche too nkajijik enye etulusoitie ninche eidipaki aaitodorropa esiana oo lapaitin lenye.

²²Ketii obo oidim aiteng'ena Enkai eng'eno, idol ajo eiguanare ninye lelo ootii shumata?

²³Keye obo eeta enkarsisisho nalulung'a, eidipakine neserian.

²⁴Nebore osesen lenye empiron neruko entolit oo loik lenyena.

²⁵Neye likae te mion oltau, eitu aikata eishamisham esidano.

²⁶Neirrag ninche enyaanyuk tiatua enterit, neiruj ninche ilkuru.

²⁷“Kayiolo nanu indamunot inono, nkitobirat nikinyalie nanu.

²⁸Amu ijo iyie, ‘Koree enkaji olkitok? Koree ilo ng'obor otonie ilo torrono?’

²⁹Keitu iyie inkilikuan lelo oopuo too nkoitoi naalala, naa keitu iyie ing'amaa shakenisho enye,

³⁰inchere etelekuaki ilo tung'ani torrono teina olong e nyamali, inchere eitajeuoki ninye teina olong engoro napi?

³¹Aing'ae oidim aibalakinye ninye enkoitoi enye? Naa aing'ae oitalaku te ninye teina nataasa.

³²Ore tenenapi ninye aaya enkurare, neing'ori aarrip enkurare enye.

³³Esujaa ilkumok osesen lenye epuoi aanukaa, ore enterit e nkop neirrag aitirring'a aitemoo osesen lenye.

³⁴Kaji naa inko iyie tinikintagol nanu te mpesho narok? Meetae toki natelekua too walat inono neme elejare ake.”