Read MAASAI REVISED PROTESTANT Yoab 22 Bible Online

Yoab 22 - MAASAI REVISED PROTESTANT bible

Yoab 22

¹Neitoki Elifas le Teman awal ajo:

²“Keidim oltung'ani ataa oloata tipat te Nkai? Kesipa ore ilo ng'en neeta tipat te kewan enye.

³Ke sikar to Lmagilani tenira asipani anaa ke dupoto te ninye tenira olemeeta eleyiata too nkoitoi inono?

⁴Te nkaraki euriata niure iyie ninye peyie kisikong'a ninye, niking'uanare ninye iyie?

⁵Aime sapuk enkarruoisho ino? Meeta intorrok inono enkiting'oto.

⁶Intagolikio ilalashera linono te sile nitoning'okinote nioru ninye nkilani meshomo meishopo.

⁷Keitu iyie incho enkare ilo onaure, nitomitikio endaa ilo oata esumash.

⁸Ore ilo tung'ani ogol naa ninye oya enkop, ore ilo tung'ani onyorri nemany.

⁹Inchoo nkolia epuo too nkaik naarook, ore inkaik e lelo okishin nigil.

¹⁰Ore te nkaraki ina kintamanaki irresheta, nikijing aluam olkirutoto.

¹¹Eitomisimisoki ewang'an ino pee midolisho, nikimulumula iyie oloirrag le nkare.

¹²Aimetii Enkai shumata keper? Neing'or ilakir tiabori hoo naa shumata etii.

¹³Metaa itejo iyie kainyoo eyiolo Enkai? Keidim ninye aiguanare enaimin narok ong'u?

¹⁴Eimulumulayie ninye enkatampoi nairrusha, metaa meidim atoduaa ninye nelo ninye te rishata e keper o enkop.

¹⁵Iton aibung ilo rrekie musana, naa ninye apa eima ilarruok?

¹⁶Etawuapayioki ninche aaiwuang'ie eng'or enkata enye; etooroyioki aaiwuang'ie olkitamanyunoto lenye.

¹⁷Etiaakita ninche Enkai, ‘Shomo tung'uai iyiook’ naa ‘Kaa eidim ilo Magilani aitaasa iyiook?’

¹⁸Ore ake etiu neijia eiput ninye nkajijik enye ntokitin sidain, kake ore eutaroto e lelo torrok naalakuaniki nanu.

¹⁹Kedol lelo supati neshipa; nekueni ilemeeta entioto tenedol ilarruok eitamei;

²⁰kejo, kesipa etudung'oyioki aaiwuang'ie ilmang'ati lang, ore ilekunot netumuta enkima.

²¹“Toning'ore Enkai, pee itum eseriani, pee epuonu isupati enitii.

²²Tang'amai enkiteng'enare te nkutuk enye, nishum ororei lenye tiatua oltau lino.

²³Tinishukokino ilo Magilani nintobor kewan, tiniwuang'ie intorrok pooki aitalam olng'obor lino,

²⁴tinirragie saabu te nterit, aashu inang'aa saabu naisul too lturot ootoito

²⁵naa teneaku ilo Magilani ninye saabu ino, naa ninye enkosholai ino naata tipat;

²⁶nitum taa atishipakinoyu ilo Magilani, nidumu enkomom ino ashumaki Enkai.

²⁷Niomon iyie ninye naa aikining ninye iyie; nilak iyie ilmuma linono.

²⁸Keaku idung iyie embae alimu, netiu neijia, naa kewang'u ewang'an too nkoitoi inono.

²⁹Amu keitadou Enkai lelo oowuasa, neitajeu lelo oobor.

³⁰Keitajeu Enkai ilo tung'ani lemeeta entioto; aikintajeuni iyie te nkaraki inkaik inono nemeiduruk.”