Read MAASAI REVISED PROTESTANT Yoab 23 Bible Online

Yoab 23 - MAASAI REVISED PROTESTANT bible

Yoab 23

¹Neitoki Yob awal ajo,

²“Ore sii taata ena olong naa keme enking'unyung'uny ai, ekeiroshi enkaina enye hoo naigorito nanu.

³Ore naaji tenaa kayiolo ewueji natumie ninye, pee elotu doi ninye olorika lenye!

⁴Nairragie enkiguana ai te dukuya ninye, naiput enkutuk ai inchankarri.

⁵Nayiolou ina naawaliki ninye nanu, naning'u ina naajoki ninye nanu.

⁶Kaagilunore ninye nanu te nkitoo e ngolon enye? A'a, ekaaning ninye nanu.

⁷Ore oltung'ani oitashe too sipat neirorie ninye, naalaku olarishani lai intarasi.

⁸Ng'ura ajo aloito dukuya, kake metii ninye ine; nashuko siadi, kake mamusu nanu ninye.

⁹Ore te nkaina e kedianye naing'oru ninye kake madol ninye; naibelekenyakino enkalo e tatene, kake madol nanu ninye.

¹⁰Kake keyiolo ninye enkoitoi nalo aim; ore peyie aaidip atetema nanu, nalotu apuku atisile anaa saabu.

¹¹Etuunokinote nkejek aainei iroruat enyena; aibung'a enkoitoi enye neitu apaash.

¹²Eitu aing'uaa inkitanapat e nkutuk enye; atushuma tiatua oltau lai irorei le nkutuk enye.

¹³Kake meibelekenya ninye, naa kaing'ae oidim aibelekenya ninye? Ore ina nayieu ninye naa ina eas.

¹⁴Amu keitabaya ninye ina naategelaka nanu; ore intokitin kumok naaijo nena netii endamunoto. Netii atua endamunoto enye mbaa naaijo nena.

¹⁵Metaa airuto nanu te dukuya ninye, ore peyie adamu, naa kaure ninye.

¹⁶Eiterreyie Enkai oltau lai; aaituria Olmagilani nanu;

¹⁷amu aatiripakine enaimin, neitemoyie enaimin nairrusha enkomom ai.