Read MAASAI REVISED PROTESTANT Yoab 24 Bible Online

Yoab 24 - MAASAI REVISED PROTESTANT bible

Yoab 24

¹“Kainyoo pee meiteng'el Olmagilani nkolong'i e nkiguana, naa kainyoo paa ore lelo ooyiolo ninye nemedol aekata inkolong'i enyena?

²Keiwuang'ie iltung'ana ilpolosien; neibung iluaat oo ntare aapurroo nepuo aaramat.

³Neya ninche osikiria le ilo okishi; neya olkiteng le nkoliai alakie esile enye.

⁴Kerrumoo ninche ilo aisinani aaiwuang'ie te nkoitoi ore ilaisinak pooki le nkop neisudoo ate.

⁵Ng'ura etiu ninche anaa isirkon le ntim to lpurkel epuo te nkisiayiare enye nagol eing'oru eng'ues naibung tiong'ota, pee enya inkera enye.

⁶Keitururr ninche endaa enye tiong'ota, nesot isabibu too nkurman oo larruok.

⁷Keirrag ninche enkewarie pooki meeta nkilani, nemeeta entoki naitoipore te nkijape.

⁸Keshal ninche te nchan oo ldoinyio, nepetikino endapidapoi eyieu eneshurie.

⁹Ketii lelo oowuapaa enkerai okishi aaoru ilki, neya pee elakie esile enye enkerai o laisinani.

¹⁰Emanimanaa ninche meishopo, meeta nkilani neisumash enap irridat le nkano.

¹¹Tiatua intukusi oo loirienito easisho ninche; eironyu enaisho too sabibu, neton ake eeta enkure.

¹²Tiauluo enkanasa eigor ilo oye neishiru oltau le ilo otipikaki olbae eretoto. Ore ake eyia, meshilaa Enkai ina omono.

¹³“Ketii lelo oogolong'u eiba ewang'an, lelo leitu emoku inkoitoi enyena, nemetoni too nkoitoi enyena.

¹⁴Kedumunye ilarruok te naimin, pee etum aataarr metua ilo aisinani o ilo oata osina; ore kewarie netiu anaa olapurroni.

¹⁵Keanyu sii enkong'u e ilo ololoito metomisimiso, ejo ninye, ‘meeta enkong'u naadol nanu’; neimulumul enkomom enye.

¹⁶Ore te naimin netur inkajijik; ore dama neikenoo ate, nemeyiolo ninche ewang'an.

¹⁷Amu enaimin nagut entadekenya enye pooki; amu ilchoreta ninche lo lkirutoto le naimin nagut.

¹⁸“Itejo, ‘Eitasiooyioki ninche aaya shumata nkariak; etediaaki erubata enye te nkop; meetae ololo nkurman enye oo sabibu.

¹⁹Eshol olameyu o enkirouaj neishu aitoi enkare nataa osoit le nkirobi neijia sii eiko enemeneng'a lelo ooas ing'ok.

²⁰Medamuni ninche too lkurrot ootumoreki le nkanasa, meekure edamuni nkarn enye, neaku etigilaki entorroni anaa olchani.’

²¹“Kedaa ninche too nkajijik oo nkituaak olupin, nemeitaas inkolia mbaa supati.

²²Ore ake eyia, keitoodor Enkai nkolong'i e ilo Magilani te ngolon enye. Kedumunye ninche etapalari te nkishui.

²³Keisho ninche erripoto neretuni sii; ore nkonyek enyena neing'or nkoitoi enye.

²⁴Eilepieki ninche te nkiti kata, neitoki aaish; etoyu ninche neish anaa endiati pooki kedung'ori ninche anaa ilukuny e ntapa.

²⁵Naa te neme neijia etiu, aing'ae ooidim aitisipa nchere kara olalejani, neitodolu ajo meetae esipata te pooki natejo nanu?”