Read MAASAI REVISED PROTESTANT Yoab 29 Bible Online

Yoab 29 - MAASAI REVISED PROTESTANT bible

Yoab 29

¹Neitoki ake Yob airo nejo:

²“Oi naaji tenaa katiu anaa enatiu ilapaitin liapa, anaa too nkolong'i apa naatorripo Enkai nanu;

³ina kata apa eitawang'aki oltaa lenye endukuya ai, ore te wang'an enye nalo aim enaimin.

⁴Anaa apa enatiu too nkolong'i e nkiputakinoto ai, ina kata etii shoruetisho e Nkai shumata olng'obor lai.

⁵Ina kata eton etii Olmagilani tenebo nanu ina kata aamanita inkera aainei nanu.

⁶Ina kata eisuji iroruat aainei te kule, naabukoki ina dapidapoi inchorroi e ilata!

⁷Tenaipang nanu alo auluo enkishomi e nkanasa, ina kata naitobir nanu olorika lai to lkurroto otumoreki.

⁸Naadol lelo barnot neilanyisho, neinyototo ilpayiani kituaak neitashe;

⁹negira lelo kituaak eitu eitoki aairo, nepik inkaik enye inkutukie enye aaibung,

¹⁰negira oltoilo le lelo yiolot nerep ilng'ejepa lenye inoreti enye.

¹¹Ore te nening enkiok naaipot nanu ajo olomayiana, ore peyie edol enkong'u naaishakenoki ninye;

¹²amu aitajewuo nanu ilo aisinani oishira o ilo okishi lemeeta hoo obo oretu ninye.

¹³Ore emayianata e ilo letaa keidaaya nelotu shumata nanu, naretu nkolia menoto eseriani.

¹⁴Aishopoko kewan esupatisho, naaitoip ninye nanu. Ore esipata ai netiu anaa olkila o enkarasha e lukunya.

¹⁵Kara apa nanu nkonyek tialo olmodooni, nara nkejek to lmaima.

¹⁶Kara apa nanu menye ilo aisinani, naturu aing'oru aretu ilo lemaayiolo.

¹⁷Atigila ilala le ilo oas ing'ok, naitiakie ninye ina nainosita too lala lenyena.

¹⁸Ina peyie adamu ajo, kaye nanu tiatua enkaji ai, naa kaponaa inkolong'i aainei aitaba anaa osinyai.

¹⁹Kepuo intona aainei aaidapashakino inkariak, netii enkoilielio enkewarie pooki ilng'osil laainei.

²⁰Ore enkisisa ai naa ng'ejuk te nanu, ore enkawuo ai naa ng'ejuk anaake te nkaina ai.

²¹“Aainining'o nanu iltung'ana naanyu, negira einining enkikoo ai.

²²Ore peyie aidip airoro, eitu eitoki ninche aairo, nebaiki ororei lai ninche.

²³Aataanyutua ninche nanu anaa enaanyu enchan, nebol inkutukie enye anaa enchan oloirujuruj.

²⁴Aatakweniyie ninche nanu ina kata meeta enkitieunoto; ore ina wang'an enkomom ai neitagol ninche.

²⁵Ategelua nanu enkoitoi enye, naton anaa olautaroni, naton anaa olaiguanani tiatua oltim lenye, natiu anaa ilo oitagol lelo ooishir.”