Read MAASAI REVISED PROTESTANT Yoab 3 Bible Online

Yoab 3 - MAASAI REVISED PROTESTANT bible

Yoab 3

¹Ore te siadi ena, nebol Yob enkutuk enye adek enapa olong natoinyieki.

³“Inchoo ina olong apa naatoinyieki eidak, te nebo ina kewarie apa natejoki, ‘Kenutae enkayioni!’

⁴Inchoo ina olong eaku enaimin! Inchoo Enkai e shumata epal eitu enyamaliki ninye, nemeetae ewang'an naitawang'aki ninye.

⁵Inchoo eaku enkolong torrono o enaimin nagut te shumata enye. Meimulumula ninye nkatampo neiwuang'ie enaimin ewang'an.

⁶Ore ina kewarie, inchoo enaimin narok ong'u eibung ninye! Mincho ninye eshipa tiatua nena olong'i o lari. Mincho ninye elotu ajing esiana oo lapaitin.

⁷Ee inchoo ina kewarie eaku olupi; emincho oltoilo le nchipai ening'i tiatua.

⁸Inchoo lelo oodekisho metediaa ina olong, lelo arriyiak oodumu Lefiatan[1].

⁹Inchoo ilakir lenyena le nkakenya emisimisu nchoo ninye eisiligu ewang'an nemetum nemedol osirua le nkakenya tenewang'u,

¹⁰Amu eitu een ina olong enguset e yieyio, neitu eisudoo enyamali too nkonyek aainei.

¹¹“Kainyoo apa pee eitu aye te nkata e inoto, anaa pee apuku ake te nguset naye.

¹²Aainyoo pee aaibung'a yieyio too nkejek enyena? Anaa pee aaitanaa ilki lenyena?

¹³Amu anaata apa airraga nagira; anaata airure naa anaata ayeng'iyeng'e,

¹⁴tenebo ilaiguanak o laitoriak le nkop lelo apa ooteshetakita ate inkidaarot.

¹⁵Aashu ilkituaak ooata saabu, lelo ooiput inkajijik enye enkosholai.

¹⁶Kainyoo apa pee eitu aaisudori anaa olkibiroto anaa nkiyioitin neitu ae kata edol ewang'an?

¹⁷Teine eishu ilarruok enyamali, naa teine eyeng'iyeng'ieki iloonaurate.

¹⁸Teine eyeng'iyeng'a ilooena tenebo; mening ninche ilo toilo lo loitasheiki esiaai.

¹⁹Etii ine ilooti netii sii ilkituaak, nelakuno osinka to loitore ninye.

²⁰“Kainyoo pee eishori ewang'an ilo otii engolikinoto, neishori enkishui ilo oata emion to ltau.

²¹Ilo otayiewua to ltau keeya, nemelotu ninye, neturu ninye oleng alang entoki nagol enkinyang'a naiteng'ela.

²²Lelo ooshipa te nchipai sapuk oleng, neshipa tenetum ninche enkurare?

²³Kainyoo peyie eishori ewang'an oltung'ani laa ore enkoitoi enye neisudoro? Ilo oitamana Enkai ninye olpaashe.

²⁴Ore osomit lai, naa ninye endaa ai, ore inkishirat aainei nebukunye anaa enkare.

²⁵Ore ina toki naure nanu nelotu shumata nanu, naadoiki nanu ina naitureisho.

²⁶Maata esidano te nkewan ai, nemaata sii engira, maata enkiyeng'iyeng; kake enyamali nalotu.”