Read MAASAI REVISED PROTESTANT Yoab 30 Bible Online

Yoab 30 - MAASAI REVISED PROTESTANT bible

Yoab 30

¹Kake kaakueniyie taata ninche nanu, iltung'ana ooti te nanu, laa ore apa loo menye, naa iltung'ana le pesho, ilaa maaidim ninye aitaboitaki ildiein laainei oorrip intare.

²Kainyoo nanu aidim anoto te ngolon oo nkaik enye, iltung'ana ooisha engolon enye?

³Ore to sina o te sumash nagol, naa kenyaal intona naatoito.

⁴Kedung'u ninche mbenek e ntim, o ntona o lpurkel aaitaa endaa.

⁵Etaarayioki ninche aaitung'uaa iltung'ana, nebuaku iltung'ana emirita ninche anaa iloosujaa olapurroni.

⁶Ilbaat loo ndapidapo epuo ninche aamany, ingumot enkop o olkutot loo ndapidapo.

⁷Keru ninche anaa ng'uesi tiatua ntimi, neiturrurro tenebo too loipi.

⁸Ilmoda ninche, le ishoi oo larruok, etaarayioki ninche aaipang'ie te nkop.

⁹Nataa taata nanu osinkolio lenye meekure aata tipat te ninche.

¹⁰Aaibaitie nanu naatalama nanu; meingash ninche aanotaki tenaadol.

¹¹Ore te nkaraki natalaa Enkai enkeene ai naaitobor nanu, aaibelekenyakinote ninche nanu te ngoro enye pooki.

¹²Ore te nkaina ai e tatene neinyoito ilmang'ati, naareu ninche nanu aarrumoo, naapikaki nanu aaraki inkoitoi enye e nkidaaroto.

¹³Keinyal ninche enkoitoi ai, neitubulaa ninche engolikinoto ai, metii hoo obo omitiki ninche.

¹⁴Kepuonu ninche anaa iloim elusie nalala naapuonu aasulakino nanu aapurd.

¹⁵Aaibelekenyakaki nanu olkirutoto ore enkisisa ai nemirareki anaa enamirita enkijape ore karsisisho ai neisha anaa enkatampoi.

¹⁶Ore taata neiting'ieki enkishui ai te nanu; aaineputua nanu inkolong'i osina aaibung.

¹⁷Ore enkewarie pooki neme iloik laainei, ore emion naaitame nanu nemeyagaa.

¹⁸Ore to larrabal neibung ninye olkila lai, naaen nanu anunuk anaa enkila.

¹⁹Aatanang'aka nanu Enkai atua esarng'ab, natotiwuo anaa enterit o nkuruon.

²⁰Aaishiraka nanu iyie neitu kiwaliki nanu, aitasho nanu nimikining iyie nanu.

²¹Kimbelekenyakine nanu agorokino; te nkidimata enkaina ino kitaarare iyie nanu.

²²Kidumu iyie nanu aya shumata enkijape, nikincho iyie matakedo ninye nikimposhiposh iyie nanu te nkikurrukur olkutati.

²³Ee, kayiolo nanu ajo aikipik iyie atua keeya, o atua ina aji nategelakaki lelo pooki oishu.

²⁴Naa amaa obo to lturrur le nkidaata aimeitorioo enkaina enye, ore te mutata enye neishiru eretoto.

²⁵Keitu nanu aishiraki ilo laa ore enkolong enye netagolikio, keitu eishir oltau lai to sina te nkaraki lelo aisinak?

²⁶Kake tenaing'oru nanu esidano, nepuonu ntorrok; naa tenaanyu ewang'an, nelotu enaimin.

²⁷Ketii oltau lai osomit, nemeitirring'a aekata, naatabaikitia inkolong'i o loisilisili nanu.

²⁸Kaloolo aaitorokaki, neme te nkolong, aitashe tiatua olturrur naishiru eretoto.

²⁹Kataa nanu olalashe loo mbariak nataa ole choliek oo Sidan[4].

³⁰Eibelekenye olchoni lai aroku naaitoki aing'uaa, ore iloik laainei neyupuyup te nkirowuaj.

³¹Eibelekenyaki olwulul lai loo usin, metaa enkishirata o sina ore oltoilo le ndule ai neibelekenyaki metotiwuo anaa oltoilo le lelo ooishir.