Read MAASAI REVISED PROTESTANT Yoab 31 Bible Online

Yoab 31 - MAASAI REVISED PROTESTANT bible

Yoab 31

¹“Aitobira olning'o too nkonyek aainei; kaji naa aiko tenaitoki ang'uar eselenkei nemeyiolo olee?

²Kainyoo erubata ai naing'uaa Enkai natii shumata, naa kainyoo enjung'ore ai te ilo Magilani le shumata?

³Aimedoiki ingolikinot lelo torrok, netum emutata lelo aasak loo ntorrok?

⁴Aimedol ninye inkoitoi aainei, neiken iroruat aainei pooki?

⁵Amaa tenaa kashomo nanu tenebo iloolejisho, neisarisara enkeju ai alo alejisho.

⁶(Inchoo maineneng'i te ntemet naineneng'ishoreki nemeeta emonkoi naa inchoo Enkai eyiolou enkitashoto ai!)

⁷Tenaa keibelekenye eroruata apaash enkoitoi neshomo oltau lai arubare nkonyek aainei, naa teneibung'a oltipoto ake ninye pooki inkaik aainei;

⁸nchoo naa aaku oloun, nenya likae; naa inchoo ina nabulu aa enaai eturuni aaitayu.

⁹“Tenetang'uarra oltau lai enkitok ole latia ai, nairraga aanyisho te kutukaji ole latia ai,

¹⁰inchoo enkitok ai eyieraki likae lee, naa inchoo ilkulikae eirrugokino ninye.

¹¹Amu keaku ina embae torrono oleng, neaku entorroni naiguanare neitame ilarishak.

¹²Amu keaku ina enkima namut pooki toki, nepejoo too ntona pooki toki ai natum.

¹³Tenatanya nanu aning enyamali o laisiaayiani lai aashu enkaisiaayiani ai, enkata nayautua olong'unyung'unyi te nkaraki nanu.

¹⁴Kainyoo naa alo aas teneinyototo Enkai? Amaa teneikilikuanisho, kaa nanu awaliki ninye?

¹⁵Amaa ilo laaitobirua nanu te nguset aime ninye oitobirua ninye? Naa aime ilo obo oitobirua iyiook te nguset.

¹⁶“Tenatomito nanu ae toki nayieu olaisinani, aashu tenaishirie nanu enkoliai,

¹⁷aashu tenainosa nanu endaa ai openy eitu ang'arie likae, neitu ang'arie ilo okishi

¹⁸(amu ore eiteru te nkitisho enye naitubulua nanu ninye anaa menye ore epuku aing'uaa enguset e ng'otonye natuutayie nanu ninye);

¹⁹te natoduaa nanu obo lenye eidaaya, te nkaraki meeta inkilani o sesen, aashu oltung'ani aisinani lemeitoipo,

²⁰teneitu ninye aamayian nanu, naa teneitu eirowuajieki too lpapit loo ntare aainei,

²¹tenatudumua enkaina ai aarare lelo okishin amu atoduaa eretoto te kishomi;

²²neaku inchoo inkaik aainei epuku aaing'uaa oloililai lai, naa inchoo enkaina ai eorunye te rubata enye.

²³Amu kara apa oloure enyamali naing'uaa Enkai nemaitieu aibelekenyakinoyu aing'ura enkitoo enye.

²⁴“Tenaitaa nanu saabu osiligi lai, aashu tenetaa saabu nasila aigarakino;

²⁵tenatishipe nanu te nkaraki naa sapuk enkarsisisho ai, aashu te nkaraki nanoto enkaina ai imasaa kumok;

²⁶tenaing'ura nanu enkolong ewang oleng, aashu olapa elo te sidano enye,

²⁷neeni oltau lai too nkisudorot mayiolo, netung'ututa enkutuk ai enkaina ai;

²⁸ore sii ninye ena naa eng'oki naitame ilarishak amu ataa olalejani te Nkai e shumata.

²⁹“Tenatishipakine nanu enkidaata e ilo laaiba, aashu ashipa ina kata peyie eidimu ninye entorroni.

³⁰(Eitu nanu aisho enkutuk ai eas eng'oki, pee aomonu enkishui enye to ldeket);

³¹teneitu ejo iltung'ana lo lng'obor lai, ‘Kalo otii ine leitu etum aiputakinoyu te ndaa enye?’

³²(Ore ilo omoni eitu eirrag enkoitoi nalala e nkanasa; ataboloko nchomito aainei lelo apuayak);

³³tenaisudoyie aitemoo enkarruoisho ai too ltung'ana anuk intorrok aainei to lgoo lai,

³⁴amu aitasho nanu te nkuretisho sapuk aure olturrur, naaiture nanu enkiba oo lmareita, metaa atigire neitu aipang aim inchomito.

³⁵Oi naaji duoo tenaa kaata obo laaning nanu! (Nena entukunyata olkimojino lai! Inchoo Olmagilani aawaliki nanu!) Oi naaji tenaa kataa enesirare imbaa aainei naaigero ilo mang'atinta lai!

³⁶Kesipa anaata nanu anap to loililai lai; anaata aeniki kewan anaa enkopiyia e nkitoo.

³⁷Ekaisho nanu ninye imbaa aainei pooki oo roruat aainei; ekalo nanu enetii ninye te nkanyit naishori oltung'ani kitok.

³⁸“Teneishira enkop ai, te nkaraki nanu, naa teneishira ineeturo enkurma tenebo;

³⁹te nainosa ilng'anayio lenyena eitu alak, aashu ayaka keeya iloopeny,

⁴⁰inchoo ilkiku ebulu te rishata enkano, o endiati te rishata e shairi.” Neishunye irorei le Yob.