Read MAASAI REVISED PROTESTANT Yoab 32 Bible Online

Yoab 32 - MAASAI REVISED PROTESTANT bible

Yoab 32

¹Metaa eitu eitoki kulo tung'ana pokira okuni aawaliki Yob amu aisupat ninye too nkonyek enyena makewan.

²Neitoki Elihu olayioni le Berakel le Busi lo lmarei le Ram agoro. Etagorokine ninye Yob amu eitaa kewan olemeeta entioto, neaku Enkai eiteleiki entorroni.

³Etagorokine sii lelo shoreta le Yob pokira okuni amu eitu eitoki aatum ewalata nawaliki Yob, hoo neibalie aajo etapong'ori Yob.

⁴Etaanyua apa Elihu peyie eirorie Yob amu aibotoro apa ninche te ninye.

⁵Ore peyie edol Elihu ajo meekure eetae ewalata te lelo lewa pokira okuni, negoro.

⁶Newal Elihu olayioni le Barakel le Busi ajo, “Kara nanu oti too larin, nitamorua iyie metaa kaata duoo nanu enkuretisho aibalunye enduaata ai te yie

⁷Atejo nanu, ‘Nchoo eiro nkolong'i, ore ilarin kumok neiteng'enisho eng'eno nagut.’

⁸Kake ina kiyang'et natii tung'ani, enkiyang'et e ilo Magilani, ninye naidimie ninye metoning'u.

⁹Aimme lelo moruak ooata eng'eno nagut, neme ilkituaak ooning'u esipata.

¹⁰Metaa ajo nanu, ‘Toning'oki; nchooki sii nanu maibalie enduaata ai.’

¹¹“Ataanyua nanu irorei linono, atoning'o nanu nkirorot inono eng'eno nagut, ina kata ing'oru enijo.

¹²Aaishoo iyie enkiok ai, nemetii hoo nabo neitu ewalu Yob, aashu olotawalua irorei lenyena te ntae.

¹³Eng'ura ake ate pee mijojo ‘Kinoto eng'eno nagut; Enkai ake naidim atawalaki Yob amu italaikinote.’

¹⁴Eitu ninye aaitorioki irorei lenyena agilunore nanu, nemawaliki nanu ninye too nkirorot inono.

¹⁵“Etunumate ninche, meekure eeta enawalu; meekure ninche eeta ororei ojo.

¹⁶Naa katon nanu aanyisho, eji amu meiro ninche, amu eitashe ninche teine nemeekure ewalu?

¹⁷Ekaishoru sii nanu ewalata ai; naa kaibalie sii nanu enduaata ai.

¹⁸Amu kaabore nanu irorei naarrumito oltau lai mairoro.

¹⁹Etiu oltau lai anaa enaisho oo sabibu napising'a, etiu anaa olbene le naisho oo sabibu ng'ejuk, netaa kedanya.

²⁰Ekairo nanu peyie atum ayagie, ekabol enkutuk ai awalu.

²¹Maitodolu nanu olkep te likae, aashu asukeny likae tung'ani,

²²amu mayiolo nanu atusukenyisho, pee maapik ake Olaitobirani lai enkiting'oto.