Read MAASAI REVISED PROTESTANT Yoab 33 Bible Online

Yoab 33 - MAASAI REVISED PROTESTANT bible

Yoab 33

¹“Kake ore naa taata toning'o enkiroroto ai iyie Yob, nining'u irorei laainei pooki.

²Atabolo enkutuk ai; eirorita olng'ejep le nkutuk ai.

³Eibalunye irorei laainei esupatisho o ltau lai, ore nena naayiolo enkutuk ai neiro te sipata.

⁴Aaitobirua nanu enkiyang'et e Nkai naaisho nanu enkiyang'et e ilo Magilani enkishui.

⁵Tawalikiaki nanu tinindim; intobiru irorei linono te dukuya nanu; inyo mbalie enkitashoto ino.

⁶Tayiolo ajo ara sii nanu ole Nkai anaa iyie; aaitobiruaki sii apa nanu te nterit.

⁷Mincho enkuretisho ai kinture iyie. Mesapuku enkitirrishakinoto ai te iyie.

⁸“Kesipa, iroro iyie aning'ito, natoning'o nanu oltoilo loo rorei linono.

⁹Itejo, iyie ‘Kara nanu sinyati, maata enaitapong'o, maata eleyiata nemetii entorroni atua nanu.

¹⁰Ng'ura ajo etum ninye inkitolonyat naaisikong'ie nanu, naaikenaa nanu aitaa olmang'atinta lenye.

¹¹Etipika nkejek aainei ilpisia aen neing'or inkoitoi aainei pooki.’

¹²“Ng'ura ajo ore tena nimira asipani. Ekaawaliki nanu iyie, aikitok Enkai alang oltung'ani.

¹³Kainyoo iyie pee ikeshare ninye; ijo, ‘Mewalu ninye hoo obo loo rorei laainei?’

¹⁴Amu keiro Enkai te nkoitoi nabo, o tiare hoo nememusu oltung'ani ninye.

¹⁵Te nkidetidet o nduaat e kewarie, ina kata najing injo naairoishi iltung'ana ina kata eyietaa njo too ndapashi enye,

¹⁶nebol ninye inkiyiaa oo ltung'ana, neiture ninche too nkikoot.

¹⁷Peyie etum ninye atoboina oltung'ani aitung'uai nkoitoi enyena, neiwuang'ie olwuasa to ltung'ani;

¹⁸negolie oltau lenye aibooyo mejing engumoto o enkishui enye pee meidak to lalem.

¹⁹“Keutari sii oltung'ani te nkitamioto e muoyian te ndapash enye, neponaa emion too loik lenyena.

²⁰Metaa meitoki enkishui enye ang'uar endaa ore enkoshoke enye nemeitoki ayieu endaa.

²¹Neibibiari osesen lenye ometaa meekure elioo; ore iloik apa lemelioo nepuku aaibalayu.

²²Nenyikaki oltau lenye enemeneng'a, nenyikaki enkishui enye lelo ooyau keeya.

²³Tenetii olmalaika tenebo ninye, Olaitutumoni obo te nkalifu, pee eibalakinye oltung'ani enasipa te ninye;

²⁴neeta olng'ur te ninye ejoki, ‘Intajeu ninye mincho edoyio alo enemeneng'a, anoto elakunoto;

²⁵inchoo osesen lenye esika nejing kitisho inchoo ninye errinyokino inapa olong'i e ngolon e kitisho;’

²⁶eomon oltung'ani Enkai, neng'amu Enkai ninye, elotu ninye enetii Enkai te nchipai. Neliki iltung'ana enjeunoto enye,

²⁷neranyisho te dukuya iltung'ana ejo: ‘Ataasa eng'oki, natakordilo ina apa nasipa, neitu apa aaitalaki nanu.

²⁸Etalakua ninye oltau lai, pee medoyio alo atua enemeneng'a, naa kedol enkishui ai ewang'an.’

²⁹“Ng'ura ajo Enkai naas kuna pooki, kat are, kat uni tenebo oltung'ani.

³⁰Pee eyau arrinyu oltau lenye aitung'uaa enemeneng'a, pee etum ninye atoduaa ewang'an e nkishui.

³¹Irrugu enkiok, iyie Yob, toning'oki; tigirayu peyie atum airoro.

³²Tiniata embae niyieu nijo, tawalikiaki; iroro amu kayieu oleng naaisho iyie esipata.

³³Naa te neme neijia, toning'oki nanu; tigirayu, amu kaaiteng'en iyie eng'eno nagut.”