Read MAASAI REVISED PROTESTANT Yoab 36 Bible Online

Yoab 36 - MAASAI REVISED PROTESTANT bible

Yoab 36

¹Neitoki Elihu alo dukuya nejo:

²“Nyaaki ting'iria penyo peyie aatum aitoduaa, amu eton ake aata enajo te rishata e Nkai.

³Ekayau nanu eng'eno ai tenelakua, naisho esipata Olaitobirani lai.

⁴Amu kesipa tukul ore irorei laainei neme elejare; ore ilo oiputakine eng'eno netii tenebo iyie.

⁵“Aimagilani Enkai, nemeeta ninye olomenaa, aimagilani ninye te ngolon eyiolounoto.

⁶Meisho ninye lelo torrok ebikoo, kake keisho lelo ooitanyamali esipata enye.

⁷Meiwuang'ie ninye inkonyek te lelo supati, kake ore too laiguanak te nkitoo enye, neitasheyie ninche intarasi, neyanyituni ninche.

⁸Naa teneeni ninche too lpisia neibung'i too lgoso le nkisilisiloto e mion,

⁹neibalakinye ninye ninche esiaai enye, tenebo enkarruoisho enye, inchere keasita ninche mbaa o lwuasa.

¹⁰Kebol ninche inkiyiaa enye aaning enkiteng'enare, neitanapisho ajo metung'uai ninche intorrok enye.

¹¹Tenening ninche ninye neisiaai ninye, neishu ninche inkolong'i enye te dupoto, ore ilarin lenye nebore enchipai.

¹²Kake tenemening ninche, naa keidaikieki to lalem neye meeta eng'eno.

¹³Ore ilo lemeeta Enkai to ltau, nenyor engoro; meishiru ninche eretoto teneen ninye ninche.

¹⁴Keye ninche eton aa ooti, neiting enkishui enye te nkurruna.

¹⁵Keitajeu ninye lelo ooitamei aitung'uaa nyamalaritin enye, nebol inkiyiaa enye too ngolikinot.

¹⁶Aikilaku sii ninye iyie too sinaitin, nikipik ewueji nelala nemetii batisho, ore ina natipikaki emisa ino nebore olkar.

¹⁷Kake kibore iyie enkiguana e ilo torrono, kimbung'a akurraki enkiguana o esipata.

¹⁸Toduaa ake mikien engoro aeniki esurdaanyare; nimincho ina sapuko elakunoto kimbelekeny.

¹⁹Amaa enkishirata ino aikindim aitayu tiatua osina, aashu engolon enkidimata ino pooki?

²⁰Mianyu iyie enkewarie, ina kata nadung'ori iltung'ana aaiwuang'ie te wueji enye.

²¹Toduaa kewan mimbelekenyakino intorrok amu ena ninye itegelua eitu igelu olosilisili.

²²Ng'ura ajo, Eisisaki Enkai te ngolon enye; aing'ae olaiteng'enani onyaanyukie ninye.

²³Aing'ae otuutaka ninye enkoitoi enye, aashu aing'ae oidim atejo, ‘itaasa entorrono?’

²⁴“Tadamu ilepie esiaai enye, ina nataranyakita iltung'ana.

²⁵Eing'ura iltung'ana pooki ninye; neing'or oltung'ani ninye te nelakua.

²⁶Ng'ura ajo, aikitok Enkai, nimikiyiolo iyiook ninye; mejurrunoyu esiana oo larin lenyena.

²⁷Amu keitadou ninye ilkitong'at le nchan, neirriu ninye enkinuku te nkata e nchan.

²⁸Ina nabukunye enchan te shumata, neshaiki iltung'ana te nkumoi.

²⁹Keidim likae atayiolo enkisalaashata oo nkatampo, o endarata e keper enye?

³⁰Ng'ura ajo keidapash ninye enkiwuangata enye aitaman kewan, nenuk inkonyek oo naaiposha.

³¹Amu te kuna eiguanare ninye iloreren; neishooyo endaa te leng'on.

³²Keimulumul ninye inkaik enyena te nkiwuang'ata, neitanap ninye metoosho ine neyieu.

³³Kelim endarata elotunoto e Nkai, neyiolou sii ing'uesi elotunoto enye. Ilo oata olom o engoro eiba entorroni.