Read MAASAI REVISED PROTESTANT Yoab 39 Bible Online

Yoab 39 - MAASAI REVISED PROTESTANT bible

Yoab 39

¹“Iyiolo iyie enkata naisho nkineji oo ldoinyio? Itodua iyie enkolii eisho?

²Indim iyie aikena ilapaitin ooitabaya ninche, niyiolou enkata napuo aaisho?

³Iyiolo iyie enkata nairrugo neiu nkera enye?

⁴Ore nkera enye neiteru aagolu nebulu too nkisiashat; nepuaya nemeitoki aarrinyokino ninche.

⁵“Aing'ae oishoo iloitikoishi meidapashari aapuaya? Aing'ae otalaa ieneta e nkurrarru naten.

⁶Aishoo ninche olpurkel metaa emanyisho enye, ore enkop emunyan neaku emanyisho enye.

⁷Kelam ninche inkanas naabore enkilepilep, nemeetae oltung'ani oidim aitoborro ninche, neisiaaishore ninche.

⁸Nchumat oo ldoinyo ninche ndaat enyena, nelimana aaing'oru pooki toki nanyori.

⁹“Keyieu olkiteng le ntim nikisiaai iyie? Keirrag ninye ilo ale lino?

¹⁰Indim iyie aibung'a ninye te nkeene mikituturoki enkurma, aashu incho ninye mikitaaraki ilboro te nkurma ino?

¹¹Indim iyie aisiliga ninye te nkaraki naa sapuk engolon enye, naa aing'ueiki iyie ninye esiaai ino?

¹²Isilig iyie ninye ajo keshukunye, neyau entapa ino olkurroto oidong'ishoreki?

¹³“Eyuko inaipuko e sidai to lwuasa; kake amaa, keeta ninche olng'ur?

¹⁴Amu keing'uaa ninye ilmosor lenyena te nkop, neisho ninche eirowuajieki te nkop,

¹⁵nerikino ajo keidim enkeju atadanya ninche, ore ng'uesi entim neitunyoo ninche.

¹⁶Meing'urrie ninye nkera enyena, meitaas ninche anaa nkera enyena; ore hoo tenaa enepesho esiaai enye, meureisho ninye;

¹⁷amu eishoo Enkai ninye metorikinoyu eng'eno nagut, neitu eoriki ninye erubata e ning'unoto.

¹⁸Ore tenedumunye ninye aisik, nekueniyie embarta olokedito ninye.

¹⁹Incho embarta engolon enye? Ieniki emurt enye engolon?

²⁰Incho ninye eipid alo anaa olmaati? Ore enkitoo enye o ltoilo oitayu neitureisho.

²¹Ketur ninye atua nong'ot, neng'idare engolon enye, neipang ninye alo ong'ata anang'are te ngolon olarrabal.

²²Kekueniyie ninye enkuretisho, nemeirut ninye; nemeibelekenya ninye apaashare olalem.

²³Eikirikirie emootian to loililai lenye neeta empere naimerlel.

²⁴Ore te mpijan o te ngoro sapuk neijoo ninye enkop; meidim ninye aitasho aitirring'ayu te nkorui e ntarumpeta.

²⁵Ore teneru esekekua, nejo ninye ‘Aha!’ Keing'uaya ninye olarrabal tenelakua endarata e lelo kituaak le njore, o nena buakunot.

²⁶“Ai te ng'eno ino nagut eyiolou le nkalem[6] ailepa shumata oleng, nelak inaipuko enyena aipirie kopikop?

²⁷Ai te nkitanapata ino edumunye olkurragos alo ashet enkaji enye te shumata?

²⁸Te ndapidapoi eton aitobiraki kewan enkang, neitaa ineepi oo soito osempewuet lenye.

²⁹Keing'oru ninye entoki nanya, nedol inkonyek enyena ninye tenelakua.

³⁰Ore nkiyioitin enyena neibibiu osarge; ore ewueji pooki neteyieng'ishoreki, ine etii ninye.”