Read MAASAI REVISED PROTESTANT Yoab 40 Bible Online

Yoab 40 - MAASAI REVISED PROTESTANT bible

Yoab 40

¹Neitoki Olaitoriani ajoki Yob:

²“Keidim oloing'oru entorroni atekeshare ilo Magilani? Ore ilo oishankarrare Enkai, inchoo ninye ewal ina.”

³Neitoki Yob awaliki Olaitoriani, ejo:

⁴“Ng'ura ajo mara toki naikenaroyu; kainyoo nanu aawaliki iyie? Atipika nanu enkaina ai anuk enkutuk ai aiken.

⁵Airoro apa te nkata nabo, nemaitoki awal; kat are, nemaitoki alo dukuya.”

⁶Newaliki Olaitoriani Yob to lkutati ejo:

⁷“Terretena empolos ino anaa olee; kaaikilikuanishore nanu iyie, nikimbalakinye nanu.

⁸Aikipik sii nanu enkitapong'oto? Aikidung'oki iyie nanu enkiguana peyie itum aitaa kewan olasipani?

⁹Iyata iyie enkaina natiu anaa ene Nkai? Naa indim iyie atadara to ltoilo laaijo olenye?

¹⁰Tukusoyu te nkitoo o te nkanyit. Inchopoki kewan enkitoo o esikar.

¹¹Tubuku intayu ina goro ino nadooyo, ning'or pooki ng'ae owuasa, nintadoyio ninye.

¹²Ing'ura pooki ng'ae owuasa, nintadou ninye, nintunyoki enkop lelo torrok te pooki neitasheyie.

¹³Isudoi ninche pooki tenebo tiatua enterit, nkenoi inkomomi enye te nkop e abori.

¹⁴Naalotu sii nanu anyorraa, nchere enkaina ino e tatene makewan nayau enkisulata.

¹⁵“Ing'ura sii iyie ina kukuu naji Behemot ina naitobirua nanu anaa pee aaitobirua iyie; kenya ninye olkujita anaa olkiteng.

¹⁶Naa ng'ura, empolos enye etii engolon enye, netii engolon enye nkirnyany e nkoshoke enye.

¹⁷Neitagol ninye olkidong'oe lenye anaa oltarakuai; ore isinigi loo nkejek enyena neibung'a tenebo.

¹⁸Ore iloik lenyena netiu anaa indulen o suyai; netiu inkejek enyena anaa ing'apeta e sekenkei.

¹⁹Ninye ene nkiterata too siaaitin pooki Enkai; inchoo ilo oitobirua ninye eitinyiku olalem lenye!

²⁰Amu too ldoinyio epuku endaa enye, teine neiguranie ng'uesi pooki entim.

²¹Eirrag ninye tiabori entim oo lkiku, tiatua ine netii iseyia to lbalbal.

²²Amu tiabori lelo oipi loo lkiku elo ninye ashur; neman ninye nchorroi oo nkariak.

²³Ing'ura, tenenang'unye oreyiet nemeiture ninye; meeta enkuretisho hoo tenenang'unye olkeju le Yordan.

²⁴Keetae oloidim aawa ninye too ntokitin naibung'ieki isinkir? Aashu een enkume enye to rreshet?”