Read MAASAI REVISED PROTESTANT Yoab 41 Bible Online

Yoab 41 - MAASAI REVISED PROTESTANT bible

Yoab 41

¹Indim iyie aibung'a aitupuku Lefiatan to rreshet loo sinkir? Aashu ikurraki olng'ejep lenye enkeene?

²Indim iyie atipika olgosoi enkume enye: aashu iremoki olboony lenye orreshet oololo?

³Aikiyaki ninye esayiata sapuk aikirorie ninye iyie te mborron?

⁴Aikining'ore ninye iyie? Pee iya ninye metaa olaisiaayiani lino ntarasi?

⁵Inguranie iyie ninye anaa eninguranie emotonyi aashu intaa entoki naiguranie inkaisiaayiak inono?

⁶Keimaki ilainyang'ak enkinyang'a enye? Keorrioor ninche ninye aaoriki ilainyang'ak?

⁷Indim aiputa olchoni lenye iltidii loo sinkir; aashu ipik elukunya enye entoki naibung'ieki isinkir?

⁸Imbung'a sii iyie ninye; tadamu sii olarrabal, mintoki aigil aas!

⁹Ore osiligi lo ltung'ani naa pesho; eitadouoki ninye teina duaata enye.

¹⁰Meetae hoo olopi oleng oidim atuputu ninye aing'ae naa doi ilo oidim aitasho te dukuya nanu?

¹¹Aing'ae laishoo nanu, metaa kalaaki nanu ninye? Ore pooki toki natii abori e keper naa enaai.

¹²Magirakino nanu eitu alimu irubat oo nkejek enyena, aashu engolon enye, aashu ilo ning'o lenye.

¹³Aing'ae oidim aitayu olkila lenye lioriong? Aing'ae oidim ataremo ina kila enye nagol.

¹⁴Aing'ae oidim atabolo iltagiligil lenyena? Emanita ninye ilala lenyena ooitureisho.

¹⁵Ore enkoriong enye neitobiruaki too long'oi naaripakino, neripakino oleng anaa inaamishirakino.

¹⁶Etiripaki ninche aaitinyik oleng, ometaa meim enkijape erishata enye.

¹⁷Eibung'ieki aitutum tenebo; eibungieki metaa meekure erishayu.

¹⁸Ore pee esing ninye neidapashaa ewang'an, ore nkonyek enyena netiu anaa entadekenya nawang'u.

¹⁹Kepuku te nkutuk enye ilkilang'ilang'eta le wang'an neng'orunye iltiil le nkima teine.

²⁰Nepuku too nkumeishin enyena empuruo, naikununo anaa empuruo oo suut naayupuyup tiabori emoti.

²¹Ore enkiyang'et enye neinok inkuk enkima, nepuku olng'ejep le nkima te nkutuk enye.

²²Etii emurt enye engolon, neiture ninye pooki odol ninye.

²³Ore ngilat o lchoni lo sesen lenye neibung'a tenebo, ekurrakino pooki ninye metaa meigusugus.

²⁴Kegol oltau lenye anaa osoit, agol anaa osoit oturuno to lodo le nkop.

²⁵Ore tenedumu kewan ailepie neirut lelo magil; ore te nkaraki enkuretisho enye, nemilo.

²⁶Ore hoo nebaiki ninye olalem nemedung ninye; aashu eremet o embae o empere naado, naji mataarie naaijo eremet.

²⁷Kedol ninye esekenkei etiu anaa olkujita, ore osuyai netiu anaa oltiapurusi[7].

²⁸Meiture ninye embae meilanyisho; amu ore isoito oonang'ieki ninye netiu anaa nguetat.

²⁹Ore irinkan te ninye netiu anaa olkujita, ekueniyie ninye eng'ororoto e mpere.

³⁰Ore ilpala lenyena le nkoshoke netiu anaa mbelibelat e moti oo nkulupuok, ekur ninye enkop neitaa esarng'ab.

³¹Eitokitokie ninye enguton anaa emoti; neitotiu enaiposha anaa emoti e ilata.

³²Ore etulusoyie ninye neing'uaa ewang'an te nkoitoi, neibelekeny enaiposha aiborrie anaa olaburra.

³³Ore tioriong enkop meeta ninye enanyaanyukie, ore ninye naa entoki nemeeta enkuretisho.

³⁴Keing'or ninye pooki toki natii shumata; naa ninye olaiguanani oitore nkera pooki o lwuasa.