Read MAASAI REVISED PROTESTANT Yoab 42 Bible Online

Yoab 42 - MAASAI REVISED PROTESTANT bible

Yoab 42

¹Neitoki Yob awaliki Olaitoriani ejo,

²“Kayiolo nanu ajo indim ataasa pooki toki, nayiolo ajo meeta eyieunoto ino nemeitabari.

³‘Kaing'ae ele oisudoo enkikoo meeta eng'eno?’ Ore te nkaraki ina atejo imbaa neitu aning'u, intokitin e nking'asia te nanu, neitu apa aidip atayiolo.

⁴‘Toning'o amu kairo nanu; kaaikilikuanishore nanu iyie, nikimbalakinye iyie nanu?’

⁵Aatoning'oyie nanu iyie te ning'oto e nkiok, kake ore tena kata naadolita too nkonyek aainei.

⁶Ore te nkaraki ina atemenayie nanu kewan tukul, nairridu te nterit o too nkuruon.”

⁷Ore pee eidip Olaitoriani airorie Yob te kulo rorei, nejoki Olaitoriani Elifas le Teman: “Eyupuyupieki engoro ai te nkaraki iyie tenebo lelo shoreta linono pokira aare; amu eitu iroro intae tialo nanu imbaa naasipa anaa enairoro osinka lai Yob.

⁸Ore naa taata iwa iloing'ok oopishana o lmeregeshi oopishana, nilo enetii osinka lai Yob, nilo aitayu teine te nkaraki kewan ino olasar opejori; pee kiomonoki osinka lai Yob, amu kang'amaa enkomono enye nemaaitaas nanu iyie terisioroto emodai ino amu eitu iro te nanu ina nasipa anaa enairoro osinka lai Yob.”

⁹Metaa eshomo Elifas le Tema tenebo Bildad le Shua tenebo Sofar le Naaman aas ina natiaaka Olaitoriani ninche, neng'amaa Olaitoriani enkomono e Yob.

¹⁰Neitoki Olaitoriani arrinyoki Yob imasaa enyena, ina kata eomonoki ilchoreta lenyena. Neisho Olaitoriani Yob katitin are oo ntokitin apa pooki naata te dukuya.

¹¹Neitoki aapuonu enetii ninye ilalashera lenyena pooki o nkanashera o lelo pooki apa ooyiolo ninye te dukuya, nenya ninche endaa tenebo ninye te nkaji enye; neing'urrie ninche ninye neitagol too ntorrok pooki apa naayaka Olaitoriani ninye; ore pooki lenye neisho ninye mpisai tenebo olpisiai le saabu.

¹²Nemayian Olaitoriani nkolong'i e siadi e Yob oleng alang ine dukuya; neeta apa ninye intare nkalifuni tomon oong'uan o ntamesin nkalifuni ile o lmong'i ooturishore enkalifu nabo osirkon enkalifu nabo.

¹³Eeta sii ninye apa ilayiok oopishana o ntoyie uni.

¹⁴Nedung'oki enkarna enkikau enye ajo Yemima; ore eniare neipot ajo enkarna enye Kesia, ore eneuni nedung'oki enkarna ajo Karen Happuk.

¹⁵Naa ore teinakop pooki, meetae apa ntoyie naainepu intoyie e Yob te sidano; neitujung menye pooki tenebo lalashera lenye.

¹⁶Ore pee eidipayu ena, enyaaka Yob abik ilarin iip o artam, nedol ilayiok lenyena o layiok loo layiok lenyena, iishoritin ong'uan.

¹⁷Neirura Yob, etaa olpayian kitok otobikoyie nkolong'i kumok oleng.