Read MAASAI REVISED PROTESTANT Yoab 6 Bible Online

Yoab 6 - MAASAI REVISED PROTESTANT bible

Yoab 6

¹Neitoki Yob awal ajo,

²“Oi duoo tenaa kepiki entemet naineneng'ishoreki isinaitin laainei te nebo enyamali ai pooki aaineneng!

³Amu ina kata eiroishiu alang osinyai le naiposha; metaa akuetie irorei laainei,

⁴amu etii imbaa e ilo magilani atua nanu; neok oltau lai esayiet enye; ore nena naaitureisho e Nkai neitoluaaki te dukuya nanu maataarare.

⁵Keru osikiria le ntim eeta olkujita? Anaa olkiteng einosita olkujita?

⁶Amaa ina nemeeta entoki naishamu, keinosayu metii emunyan?

⁷Maata esumash e ndaa naaijo ina, naa ore pooki toki nanya naaitamuoi.

⁸“Oi duoo tenaa katum entoki natoomonuo, naaisho Enkai eyieunoto ai,

⁹peyie eshipakino Enkai pee aapurd nanu, pee eitorioo enkaina enye, naadung'oo nanu aiwuang'ie.

¹⁰Ena naaku enkitagoloto ai; ekaipid doi ninye te nchipai hoo naata emion, amu eitu amiki lelo rorei Leilo Sinyati.

¹¹Kainyoo engolon ai metaa katon aanyu? Naa kainyoo enkiting'oto ai metaa katon ang'iri?

¹²Amaa engolon ai keng'olon oo soito, amaa osesen lai kolo suyai?

¹³Ore te sipata maata nanu eretoto te kewan, naa ore pooki wueji natumie eretoto neterewaki aaitung'uaa enatii.

¹⁴“Ore ilo oibooyo esupatisho aitung'uaa olchore, naa keing'uaa euriata e ilo magilani.

¹⁵Ore lalashera laainei, neeta entorroni anaa nena ariak naatoyu neishunye.

¹⁶Nena naamisimis too soito le nchan, o ine neisudoriyie isoito le nchan ate.

¹⁷Ore te nkata e nkirowuaj neimin. Ore teneirowuaju, neishunye te wueji enye.

¹⁸Ore lelo apuayak neing'uaa inkoitoi enye, nepuo ninche olpurkel, neidaaya.

¹⁹Ore lapuayak le Tema neing'oru, ore lelo apuayak le Sheba neisiligu.

²⁰Neidang ninche amu keeta apa osiligi sapuk. Epuonu ninche ine neidang.

²¹Neijia iyie itotiuo tena kata te nanu; idolita osina lai, niureishoyu.

²²Katejo doi, ‘Entaikiaki nanu enkishooroto?’ Anaa, ‘Entaikiaki nanu te karsisisho inyi entoki nikiropiepie?’

²³Aashu, ‘Entokorduaki nanu te nkaina e ilo mang'atinta lai?’ Aashu, ‘Entalakuaki nanu te nkaina e ilo laaironyita?’

²⁴“Nteng'enaki nanu naa kagira nanu; intayioloki nanu matoning'u enaikuna peyie apong'ori.

²⁵Kebaa emion oo rorei oosipa? Kake amaa doi Kainyoo eutu enchankar ino?

²⁶Idamu naaji ajo indim aiturrai irorei, aa ore ina kiroroto o ltung'ani oiting'o osiligi naa enkijape?

²⁷Indim doi ninye atoosho enkukuo te lelo okishin nining'ore ilamirak amir olchore lino.

²⁸“Kake ore taata, tishipakinoyioki niking'or nanu; amu malej enkomom ino.

²⁹Imbelekenyunye, aatasayia, mincho entorroni easayu, imbelekenyunye tena kata amu eiting'o osiligi lai.

³⁰Ketii olng'ejep lai emonkoi ake ninye pooki? Amaa enkutuk ai aimemusu enyamali?