Read MAASAI REVISED PROTESTANT Yoab 7 Bible Online

Yoab 7 - MAASAI REVISED PROTESTANT bible

Yoab 7

¹“Keitu etum oltung'ani esiaai nagol tioriong enkop, naa amaa inkolong'i enyena, aimetiu anaa inkolong'i oltung'ani oigero?

²Anaa orrindik oyieu oleng oloip, anaa etiu anaa oltung'ani oigero oing'oru olekoisiayio lenye?

³Metaa ore too lapaitin pooki maata toki; naaishooki nanu inkewarieitin o sina.

⁴Ore tenairrag najo, ‘Kanu doi ade adumunye?’ Kake ekeado enkewarie, naibelibelekenya omekenyu.

⁵Ore osesen lai naairuja ilkuru o loirerio, negolu olchoni lo sesen lai, neitoki adanya.

⁶Elang inkolong'i aainei erisioroto oo naipuko o lkurragos, nepuonu aaiting meeta osiligi.

⁷“Tadamu ajo ore enkishui ai naa enkiyang'et, medol aekata enkong'u ai esidano.

⁸Ore ina ong'u e ilo laadol maitoki adol aekata; ore etii inkonyek inono shumata nanu, naa kaish,

⁹anaa enaidapasha enkatampoi neish, neijia etiu ilo olo enemeneng'a meitoki ailepu;

¹⁰meigil aekata ninye ashukokino enkaji enye nemeitoki ewueji enye ayiolo ninye aekata.

¹¹“Metaa maitigir nanu enkutuk ai; ekairo te nkaraki emion o ltau lai. Ekailepilep te nduaran o ltau lai.

¹²Kara nanu enaiposha aashu entiamasi e naiposha, metaa intobira iyie olarriponi te shumata nanu?

¹³Ore tenajo, ‘Ekaaitagol endapash ai, ekeitololong olorika lai enking'unyung'uny ai’;

¹⁴ina pee kinture nanu too nkidetidetat, nikinture nanu too nduaat.

¹⁵Metaa kagelu engoroto o keeya aitalang iloik laainei.

¹⁶Meekure eeta enkishui ai tipat, meekure abikoo intarasi. Entung'uayioki nanu amu ore inkolong'i aainei naa enkiyang'et.

¹⁷Kainyoo doi oltung'ani metaa ing'orunye ninye toki, nipik endamunoto ino aitorioki ninye;

¹⁸niparan ninye anaake tadekenya, nitem ninye pooki kata?

¹⁹Ke rishata naba aa miwuang'ie enkomom ino te nanu, anaa kipal nanu matoijoi nkamulak.

²⁰Amaa tenaas eng'oki, kaa aaitaas iyie, iyie olaing'urani loo ltung'ana? Kainyoo peyie kitisirua nanu? Kainyoo peyie ataa olola te iyie?

²¹Kainyoo peyie mikipalaki inkitarruorrot aainei niya aitalamaa intorrok aainei? Amu ore tena kata naa kairrag tiatua enkop tenaye; aiking'oru iyie nanu nematii.”