Read MAASAI REVISED PROTESTANT Yoab 9 Bible Online

Yoab 9 - MAASAI REVISED PROTESTANT bible

Yoab 9

¹Neitoki Yob awal ajo:

²“Kesipa kayiolo ajo neijia etiu. Kake kaji eiko oltung'ani teneaku supat te dukuya Enkai?

³Amaa teneyieu obo nekeshare ninye, meeta obo oidim atawaliki ninye kata nabo too nkatitin enkalifu nabo.

⁴Aing'en Enkai to ltau, naa magilani te ngolon, aing'ae oidima aitagolo kewan ataarare nemir ninye?

⁵Ilo odotu ildoinyo, nemeyiolo ninche ina, tenenang'aa ninye ninche te ngoro enye,

⁶ilo oigusugusie enkop aitung'uaa ewueji enye, neikirikirie ing'apeta enyena

⁷ilo oitanap enkolong, meitoki ailepu; ilo oitoip ilakir.

⁸Ilo laa ninye ake openy oisalaash keper, neroruaa apurd ilopir le naiposha;

⁹ilo oitobirua intukusi oo lakir naaji: Olng'arurumi, Orion, o Pledes, o entukus oo lakir le kopikop.

¹⁰Ilo oas isiaaitin sapuki nena naagiroo ening'unoto, o ntokitin enking'asia nemeeta esiana.

¹¹Keim embata ai, nemadol ninye; eloolo dukuya, nemaning'u ninye.

¹²Ng'ura, ewuapaa ninye aiwuang'ie, aing'ae oidim aibooi ninye, Aing'ae ojoki ninye, ‘Kainyoo iasita iyie?’

¹³“Meshuk Enkai siadi engoro enye; ore tiabori ninye neirrugo ilaretok le Rahab.

¹⁴Kaji naa aiko tenawaliki ninye, agelu irorei laainei te nebo ninye?

¹⁵Ore hoo nemaata entorroni, mawaliki ninye; ekaomonu olng'ur to Laitang'oroni lai.

¹⁶Tenairorie ninye naawaliki nanu, mairuk ajo keinining'ito ninye oltoilo lai.

¹⁷Amu kaar nanu to lkutati ogol neponaa ilbaa laainei meeta emporeet.

¹⁸Maaisho ninye nanu mayagie, kake kaaiput ninye nanu emion.

¹⁹Ore tenaa ke nkesha engolon, ng'ura ninye! Naa tenaa ke mbae naipirta esipata aing'ae oidim aterewa ninye meshomo?

²⁰Ore hoo nemaata entioto, naa keiguanareki enkutuk ai; ore hoo nemaata entioto, naa kaaitaa nanu olopaashari.

²¹Maata nanu entioto; mang'or nanu kewan; meekure aatayie enkishui ai tipat.

²²Etaa pooki nabo; metaa atejo, emut ninye ilo lemeeta entioto o lelo torrok.

²³Tenelo neyau olbuket keeya aitasieku, nekueniyie engolikinoto e ilo lemeeta entioto.

²⁴Eishooki enkop enkaina e ilo torrono; eimulumul inkomomi oo laiguanak lenyena. Amaa teneme ninye, aing'ae naa ninye?

²⁵“Eten inkolong'i aainei aalang oltung'ani oipirri; eisik aailanyisho, medol ninche esidano.

²⁶Eish enkishui ai anaa emeli nakuet oleng, anaa olkurragos odoiki aibung entoki nenya.

²⁷Tenajo, ‘Madamu nanu enking'unyung'uny ai, ekaiwuang'ie esototo enkomom ai, naaku oloota enchipai’;

²⁸naureishoyu oleng te nkaraki inyamalaritin aainei, amu kayiolo ajo, mikintaa iyie nanu olemeeta entioto.

²⁹Ekaaku oloiguanareki; kainyoo naa peyie aasisho te mpesho?

³⁰Tenaituku kewan te ntoki naibor anaa enturoto, naituku inkaik aainei to sabuni oruko.

³¹Naa aikinang'aki ake iyie nanu engumoto, ore ninye inkilani aainei naaibayu nanu.

³²Amu ime oltung'ani ninye anaa nanu, metaa kaidim atawaliki ninye, metaa aikipuonu metetemi iyiook te nebo.

³³Metii olarishani erishata ang, oidim aiteleiki enkaina enye shumata iyiook.

³⁴Inchoo ninye eiwuang'ie eng'udi enye te shumata nanu, nimincho engoro enye aaiture nanu.

³⁵Ina peyie aaitieu airoro imbaa enyena maata enkuretisho amu ime neijia atiu tiatua enkewan ai.