Read MAASAI REVISED PROTESTANT Olkerempe le Nkai 10 Bible Online

Olkerempe le Nkai 10 - MAASAI REVISED PROTESTANT bible

Olkerempe le Nkai 10

¹Kainyoo pee intashe alamari, iyie Olaitoriani? Kainyoo iyie pee isudoo kewan too nkatitin oo ngolikinot?

²To lwuasa emir lelo torrok ilaisinak; nchoo meibung'a ninche lelo rresheta ooitobira.

³Amu keitokoos ilo torrono too yieunot o ltau lenye, ore ilo tung'ani oata olorok loo masaa nemenaa Olaitoriani.

⁴Ore to lwuasa le nkomom enye nemeing'oru ninye Enkai; ore too ndamunot enyena pooki naa, “Meetae Enkai.”

⁵Nebul too nkoitoi enyena inkatitin pooki; ore nkiguanat inono netii shumata, mebaiki ninye; ore ilmang'ati lenyena pooki neikordod ninche.

⁶Nedamu ninye to ltau lenye ajo, “Maaigusugusieki nanu; ore tiatua iishoritin pooki matum nanu batisho.”

⁷Kebore enkutuk enye ildeketa o elejare o enkitorogonyare; ore abori olng'ejep lenye netii ntabo o entorroni.

⁸Neton ninye to lnukata too nkang'itie, ore tiatua iwuejitin neeisudoriyie nesesekuan lelo supati. Neikitalan lelo ooshal,

⁹neirrag ninye to lnukata lenye anaa olng'atuny, pee etum aibunga ilo aisinani, neibung ninye ilo aisinani te nemiraki ninye atua orreshet lenye.

¹⁰Nerrarri ilo oshal, neimisieki te nkop, nebatata te ngolon enye.

¹¹Nejo ilo torrono to ltau lenye, “Etorikine Enkai, eisudoyie ninye enkomom enye, medol toki.”

¹²Tudumunye, iyie Olaitoriani, iyie Enkai, tudumu enkaina ino; mincho kirikino ilo oata osina.

¹³Kainyoo pee eany ilo torrono Enkai, nejo to ltau lenye, “Maaitame ninye nanu!”

¹⁴Idol iyie enyamali o sina, pee itum iyie aiwuang'ie too nkaik inono; ore ilo oshal naa iyie eigarakino; iyie otaa olaretoni loo lokishin.

¹⁵Tigila iyie engolon e ilo torrono o eno larruoni; tusuja entorroni enye o metaba anaa neishunye.

¹⁶Olaitoriani ninye olaiguanani ntarasi o ntarasi; keidak iloshon te nkaina enye.

¹⁷Iyie Olaitoriani, ining iyie eyieunoto eilo obor; nintagol iyie ninye oshoke nirrugoki enkiok ino

¹⁸pee inguanare te sipata ilo okishi o ilo oibookoki enkop, paa ore ilo tung'ani le nkop nemeigil ae kata aitureisho.